কাঠমাণ্ডু, ২৯ জুলাই (হি.স.)। নেপালত বাঘৰ সংখ্যা ৪২৯ লৈ বৃদ্ধি পাইছে । ইয়াৰ ভিতৰত চিতৱান ৰাষ্ট্ৰীয় উদ্যানত সৰ্বাধিক বাঘৰ সংখ্যা হৈছে ১৪৫টা, তাৰ পিছতে আছে বৰদিয়া ৰাষ্ট্ৰীয় উদ্যানত ১১২টা, পাৰ্ছা ৰাষ্ট্ৰীয় উদ্যানত ৭১টা, বাংকে ৰাষ্ট্ৰীয় উদ্যানত ৫১টা, আৰু শুক্লফণ্টা ৰাষ্ট্ৰীয় উদ্যানত বাঘৰ সংখ্যা ৫০টা।

আন্তঃৰাষ্ট্ৰীয় বাঘ দিৱস উপলক্ষে বন আৰু পৰিৱেশ মন্ত্ৰালয়ে প্ৰকাশ কৰে বাঘ লোকপিয়ল প্ৰতিবেদন ২০২৬। বন আৰু পৰিৱেশ মন্ত্ৰী গীতা চৌধাৰীয়ে উন্মোচন কৰে এই প্ৰতিবেদন। শেহতীয়া ৰাষ্ট্ৰীয় বাঘৰ লোকপিয়ল অনুসৰি শেহতীয়া বছৰবোৰত বাঘৰ সংখ্যা বৃদ্ধি পোৱাৰ কাৰণ হৈছে সংৰক্ষিত অঞ্চল আৰু বাসস্থান ব্যৱস্থাপনাৰ উন্নতি।

২০০৯ চনৰ পৰা মন্ত্ৰালয়ে নিয়মীয়াকৈ বাঘৰ লোকপিয়ল চলাই আহিছে । নেপালত প্ৰতি চাৰি বছৰৰ মূৰে মূৰে বাঘৰ লোকপিয়ল কৰা হয়। ২০২২ চনত কৰা শেষৰ লোকপিয়লত নেপালত ৩৫৫টা বাঘৰ তথ্য পোৱা গৈছে। সেই সময়ত চিতৱানত ১২৮টা, বৰদিয়াত ১২৫টা, পাৰ্ছাত ৪১টা, শুক্লফন্তত ৩৬টা, বাংকেত ২৫টা বাঘ আছিল । নেপালত ২০১০ চনত ১২১টা, ২০১৪ চনত ১৯৮টা, ২০১৮ চনত ২৩৫টা, ২০২২ চনত ৩৫৫টা, আৰু ২০২৬ চনত এতিয়া ৪২৯টা বাঘৰ ৰেকৰ্ড গঢ়িছিল।

উল্লেখ্য যে প্ৰতি বছৰে ২৯ জুলাইত আন্তঃৰাষ্ট্ৰীয় বাঘ দিৱস পালন কৰা হয় । ২০১০ চনত ৰাছিয়াৰ ছেইণ্ট পিটাৰ্ছবাৰ্গত বাঘ সন্মিলনৰ পিছত বাঘৰ সংখ্যা হ্ৰাস ৰোধ কৰাৰ লগতে ইয়াৰ প্ৰাকৃতিক বাসস্থান সংৰক্ষণৰ প্ৰসাৰৰ লক্ষ্যৰে এই দিৱস আৰম্ভ কৰা হৈছিল।

-----------------

হিন্দুস্থান সমাচাৰ / অৰৱিন্দ