নতুন দিল্লী, ১৯ জুলাই (হি.স.)। বিজ্ঞান আৰু প্ৰযুক্তি বিভাগ (ডিএছটি)ৰ টেকন’লজি ডেভেলপমেণ্ট ব’ৰ্ডে (টিডিবি) স্কাইৰুট এৰ’স্পেচ প্ৰাইভেট লিমিটেডৰ সফল বিক্ৰম-১ অভিযানৰ বাবে অভিনন্দন জনাই ভাৰতৰ ব্যক্তিগত মহাকাশ খণ্ডৰ বাবে ইয়াক এক ল্যাণ্ডমাৰ্ক কৃতিত্ব বুলি অভিহিত কৰে। ব’ৰ্ডে উল্লেখ কৰে যে এই সফলতাই থলুৱা মহাকাশ প্ৰযুক্তিৰ ক্ষেত্ৰত ভাৰতৰ বিশ্বব্যাপী স্বীকৃতি আৰু উদ্ভাৱনৰ ক্ষমতাক শক্তিশালী কৰিছে।

টিডিবিয়ে এক বিবৃতিত কয় যে স্কাইৰুট এৰ’স্পেচৰ এই কৃতিত্বই থলুৱা প্ৰযুক্তি চিনাক্তকৰণ, প্ৰচাৰ আৰু বাণিজ্যিকীকৰণৰ ক্ষেত্ৰত এক গুৰুত্বপূৰ্ণ মাইলৰ খুঁটি প্ৰতিনিধিত্ব কৰে। ২০২২ চনত ৰাষ্ট্ৰীয় প্ৰযুক্তি দিৱস উপলক্ষে ব’ৰ্ডে থলুৱা লঞ্চ বাহন প্ৰযুক্তি বিকাশৰ বাবে স্কাইৰুট এৰ’স্পেচক ৰাষ্ট্ৰীয় প্ৰযুক্তি ষ্টাৰ্টআপ বঁটাৰে সন্মানিত কৰে।

সেই সময়ত বিজ্ঞান আৰু প্ৰযুক্তি বিভাগৰ কেন্দ্ৰীয় ৰাজ্যিক মন্ত্ৰী (স্বতন্ত্ৰ দায়িত্ব) ড° জিতেন্দ্ৰ সিঙে এই বঁটা প্ৰদান কৰিছিল। ক্ষুদ্ৰ উপগ্ৰহ উৎক্ষেপণ বজাৰৰ বাবে থলুৱা ক্ৰাইজেনিক, লিকুইড, আৰু কঠিন প্ৰপালচন প্ৰযুক্তিৰ বিকাশত উল্লেখযোগ্য অৱদানৰ বাবে স্কাইৰুটক সন্মানিত কৰা হয়। টিডিবিয়ে উল্লেখ কৰে যে বিক্ৰম-১ অভিযানৰ সফলতাই প্ৰমাণ যে আশাব্যঞ্জক ভাৰতীয় ষ্টাৰ্টআপক প্ৰাৰম্ভিক পৰ্যায়ত চিনাক্ত আৰু উৎসাহিত কৰাৰ নীতিয়ে সুদূৰপ্ৰসাৰী আৰু ইতিবাচক ফলাফল দিয়ে।

প্ৰযুক্তি উন্নয়ন ব’ৰ্ডৰ সম্পাদক ৰাজেশ কুমাৰ পাঠকে কয় যে স্কাইৰুট এৰ’স্পেচৰ সফলতা সমগ্ৰ দেশৰ বাবে গৌৰৱৰ বিষয়। এটা উদীয়মান ষ্টাৰ্টআপ হোৱাৰ পৰা ৰাষ্ট্ৰীয় প্ৰযুক্তি ষ্টাৰ্টআপ বঁটা লাভ কৰা আৰু ভাৰতৰ ব্যক্তিগত মহাকাশ কাৰ্যসূচীত এক ঐতিহাসিক মাইলৰ খুঁটি অৰ্জন কৰালৈকে ইয়াৰ যাত্ৰাই দেশৰ শক্তিশালী উদ্ভাৱন পৰিৱেশ তন্ত্ৰক প্ৰতিফলিত কৰে। তেওঁ লগতে কয় যে স্কাইৰুট এৰ’স্পেছে ৰিচাৰ্চ, ডেভেলপমেণ্ট, এণ্ড ইনোভেচন (আৰডিআই) ফাণ্ডৰ অধীনত টিডিবিলৈও প্ৰস্তাৱ দাখিল কৰিছে, যিটো বৰ্তমান বিবেচনাধীন।

ব’ৰ্ডে কয় যে তেওঁলোকে মহাকাশ, প্ৰতিৰক্ষা, স্বাস্থ্যসেৱা, স্বচ্ছ শক্তি, জৈৱ প্ৰযুক্তি, উন্নত উৎপাদন, আৰু ডিজিটেল প্ৰযুক্তিৰ দৰে কৌশলগত খণ্ডত থলুৱা প্ৰযুক্তিৰ বিকাশ, বাণিজ্যিকীকৰণ, আৰু উদ্ভাৱন ভিত্তিক উদ্যোগক ধাৰাবাহিকভাৱে উৎসাহিত কৰি আহিছে। স্কাইৰুট এৰ’স্পেচৰ সফলতাই প্ৰমাণ যে সময়মতে প্ৰতিষ্ঠানিক স্বীকৃতি, নীতিগত সমৰ্থন, আৰু অবিৰত সহযোগিতাৰ দ্বাৰা ভাৰতীয় উদ্ভাৱন ভিত্তিক উদ্যোগসমূহে বিশ্বজুৰি নতুন মাইলৰ খুঁটি লাভ কৰিব পাৰে।

হিন্দুস্থান সমাচাৰ / অৰৱিন্দ