গান্ধীনগৰ, ১৭ জুলাই ঃ নিষিদ্ধ সন্ত্ৰাসবাদী সংগঠন জৈছ-ই-মহম্মদৰ সৈতে জড়িত আৰু পাঁচজন অভিযুক্তক গ্ৰেপ্তাৰ কৰিছে গুজৰাট এণ্টি টেৰ’ৰিষ্ট স্কোয়াডে (এটিএছ)। এই গোচৰৰ পূৰ্বে এ টি এছে আঠজন অভিযুক্তক গ্ৰেপ্তাৰ কৰিছিল। এই অভিযুক্তসকলৰ জেৰাৰ সময়ত লাভ কৰা ইনপুটৰ ভিত্তিত এই পাঁচজন ব্যক্তিক গ্ৰেপ্তাৰ কৰা হৈছে। আটাইকেইজন অভিযুক্ত গুজৰাটৰ বিভিন্ন জিলাৰ বাসিন্দা। উচচ ন্যায়ালয়ে পাঁচোজন অভিযুক্তক আঠ দিনৰ পুলিচ ৰিমাণ্ডলৈ প্ৰেৰণ কৰিছে।

এ টি এছৰ তথ্য অনুসৰি গ্ৰেপ্তাৰ কৰা ৫ অভিযুক্তই পূৰ্বে গ্ৰেপ্তাৰ হোৱা আঠজন অভিযুক্তৰ সংস্পৰ্শত আছিল আৰু বিস্ফোৰক সামগ্ৰী পৰীক্ষা কৰি থকাৰ অভিযোগ উত্থাপন হৈছে। তদন্তত অভিযুক্তই বিভিন্ন স্থানত কেইবাবাৰো বিস্ফোৰক পৰীক্ষা কৰাৰ কথাও পোহৰলৈ আহিছে। তদন্তকাৰী সংস্থাটোৱে অভিযুক্তৰ মোবাইল ফোনত বোমা নিৰ্মাণৰ সৈতে জড়িত পিডিএফ নথি, জেহাদী সাহিত্য, বিস্ফোৰক প্ৰস্তুত কৰাৰ তথ্য উদ্ধাৰ কৰিছে। প্ৰাথমিক তদন্তত প্ৰকাশ পাইছে যে অভিযুক্তসকলে উগ্ৰ মতাদৰ্শৰ দ্বাৰা প্ৰভাৱিত হৈ নিষিদ্ধ সন্ত্ৰাসবাদী সংগঠন জৈছ-ই-মহম্মদৰ সৈতে জড়িত সাহিত্য অধ্যয়ন কৰি আছিল।

এ টি এছৰ তদন্তত এই গোচৰৰ কথিত মাষ্টাৰমাইণ্ড মহম্মদ আমিনৰ পৰাও উদ্ধাৰ কৰা হৈছে বোমা নিৰ্মাণৰ সামগ্ৰী। অভিযোগ কৰা হৈছে যে মহম্মদ আয়ুব কাদিৱালাই এই সামগ্ৰীসমূহ ব্যৱহাৰ কৰি টাইম বোমা নিৰ্মাণৰ চেষ্টা কৰিছিল যদিও তেওঁ ব্যৰ্থ হৈছিল। এই সামগ্ৰীসমূহ পিছত বিলাল আবিদভাই শ্বেৰালৈ প্ৰেৰণ কৰা হয়।

গ্ৰেপ্তাৰ হোৱা পাঁচজন অভিযুক্তৰ নামঃ

-বিলাল অবিদভাই শ্বেৰা

-মহম্মদ আয়ুব কাদিৱালা

-মহম্মদ পলানপুৰী ওৰফে খল্লী আয়ুব সুনছাৰা

-শ্বাফী ৰাইছ মুখী

-মহম্মদ হাছান হানিফভাই কাৰ্ডিয়া

পাঁচোজন অভিযুক্তক উচ্চ ন্যায়ালয়ত হাজিৰ কৰোৱা হয়। শুনানিৰ সময়ত সহকাৰী ৰাজহুৱা অভিযুক্ত (চৰকাৰী অধিবক্তা) পি আৰ দন্তানীয়ে আদালতৰ সন্মুখত বিতং যুক্তি দাঙি ধৰি আৰক্ষীৰ ৰিমাণ্ড বিচাৰিছিল। তেওঁ মুঠ ১৩টা মূল কথাৰ ওপৰত অধিক তদন্তৰ প্ৰয়োজনীয়তাৰ কথা উল্লেখ কৰে। ইয়াৰ ভিতৰত আছিল গুৰুত্বপূৰ্ণ প্ৰশ্ন যেনে টাইম বোমা নিৰ্মাণৰ সামগ্ৰী ক’ৰ পৰা আহৰণ কৰা হৈছিল, ক’ৰ পৰা লুকুৱাই ৰখা হৈছিল, জেহাদী সাহিত্য আৰু জয়ছ-ই-মহম্মদৰ সৈতে জড়িত গ্ৰন্থ কোনে লাভ কৰিছিল, জাতিবিৰোধী কাৰ্যকলাপৰ বাবে সংগ্ৰহ কৰা সম্পদ আৰু ধনৰ উৎস, অন্যান্য সহযোগীসকলৰ পৰিচয়।

চৰকাৰৰ যুক্তি মানি লৈ উচ্চ ন্যায়ালয়ে পাঁচোজন অভিযুক্তক আঠ দিনৰ পুলিচ ৰিমাণ্ড প্ৰদান কৰে। এই সন্ত্ৰাসবাদী নেটৱৰ্কৰ সৈতে জড়িত অন্যান্য ব্যক্তি, তেওঁলোকৰ আৰ্থিক উৎস, বিস্ফোৰক সামগ্ৰীৰ উপলব্ধতা, আৰু কথিত ষড়যন্ত্ৰৰ আঁৰৰ উদ্দেশ্য আদিৰ ওপৰত এতিয়া এ টি এছে এক সম্যক তদন্ত চলাই আছে।

-----------------

হিন্দুস্থান সমাচাৰ / অৰৱিন্দ