উত্তৰকাশী (উত্তৰাখণ্ড), ১৬ জুলাই (হি.স.)। উত্তৰকাশী জিলাৰ নিৰ্মাণাধীন ছিলকিয়াৰা সুৰংগত বুধবাৰৰ পৰা বৃহস্পতিবাৰে নিশা প্ৰায় ২ বজাত সংঘটিত হোৱা এক দুৰ্ঘটনাত এজন লোকৰ মৃত্যু হোৱাৰ খবৰ পোৱা গৈছে । প্ৰাথমিক তথ্য অনুসৰি সুৰংগটোৰ কংক্ৰিটৰ (শ্বটক্ৰিট) আৱৰণৰ এটা ব্লক ভাঙি সৰি পৰাৰ ফলত ঝাৰখণ্ডৰ এজন ২১ বছৰীয়া শ্ৰমিকৰ খুন্দাত থিতাতে মৃত্যু হয় ।

উত্তৰকাশী জিলা জৰুৰীকালীন অভিযান কেন্দ্ৰৰ তথ্য অনুসৰি দুৰ্ঘটনাৰ পিছতে বিষয়া-কৰ্মচাৰীয়ে ততাতৈয়াকৈ উদ্ধাৰ আৰু সাহায্য অভিযান আৰম্ভ কৰে। উদ্ধাৰ হৈছে শ্ৰমিকজনৰ মৃতদেহ। ৰাষ্ট্ৰীয় ঘাইপথ আৰু আন্তঃগাঁথনি উন্নয়ন নিগম লিমিটেডে আৰম্ভ কৰিছে বিতং তদন্ত। এটা বাস্তৱিক প্ৰতিবেদন প্ৰস্তুত কৰা হৈছে। প্ৰশাসন আৰু আনুষংগিক সংস্থাসমূহেও তদন্ত অব্যাহত ৰাখিছে। বিষয়াসকলৰ মতে, সুৰংগ নিৰ্মাণ স্থানত নিৰাপত্তাৰ ব্যৱস্থা পুনৰীক্ষণ কৰা হৈছে। পৰিয়ালৰ লোকক অৱগত কৰা হৈছে।

জিলা দণ্ডাধীশ প্ৰশান্ত আৰ্য্যই এই ঘটনাৰ প্ৰতি লক্ষ্য ৰাখি মহকুমাধিপতি বৰকোটক ততাতৈয়াকৈ সেই স্থানত উপস্থিত হ’বলৈ নিৰ্দেশ দিছে। তেওঁ এছডিএমক স্থানত উপস্থিত হৈ পৰিস্থিতিৰ বিশদ মূল্যায়ন কৰিবলৈ, দুৰ্ঘটনাৰ প্ৰকৃত কাৰণৰ তদন্ত কৰিবলৈ আৰু কাৰ্যকৰী সংস্থাই পালন কৰা সুৰক্ষাৰ মানদণ্ডসমূহ ভালদৰে পৰ্যালোচনা কৰিবলৈ কয়।

জিলা দণ্ডাধীশে মৃতকৰ পৰিয়ালক সম্ভৱপৰ সকলো সাহায্য প্ৰদান কৰাৰ লগতে প্ৰয়োজনীয় সকলো আইনী পদ্ধতি ক্ষিপ্ৰতাৰে সম্পূৰ্ণ কৰিবলৈ বিষয়াসকলক নিৰ্দেশ দিছে। লগতে সুৰংগটোৰ ভিতৰত কাম কৰা আন শ্ৰমিকসকলৰ সুৰক্ষা সুনিশ্চিত কৰাৰ বাবে অনতিপলমে প্ৰয়োজনীয় পদক্ষেপ গ্ৰহণ কৰিবলৈ নিৰ্দেশ দিয়ে।

হিন্দুস্থান সমাচাৰ / অৰৱিন্দ