নতুন দিল্লী, ১৬ জুলাই (হি.স.)। কংগ্ৰেছৰ সভাপতি তথা ৰাজ্যসভাৰ বিৰোধী দলৰ নেতা মল্লিকাৰ্জুন খৰ্গেয়ে মহিলা সংৰক্ষণ আৰু আনুষংগিক সীমা নিৰ্ধাৰণৰ বিষয়ত প্ৰধানমন্ত্ৰী নৰেন্দ্ৰ মোডীলৈ পত্ৰ প্ৰেৰণ কৰি আগন্তুক বৰ্ষাকালিন অধিৱেশনৰ পূৰ্বে সৰ্বদলীয় বৈঠকৰ দাবী জনাইছে । খৰ্গেয়ে কয় যে যদি চৰকাৰে সংবিধান (১৩১ নং সংশোধনী) বিধেয়ক, ২০২৬ সংশোধিত ৰূপত পুনৰ উত্থাপন কৰিবলৈ গৈ আছে তেন্তে প্ৰথমে সকলো ৰাজনৈতিক দলৰ সৈতে বিস্তৃতভাৱে আলোচনা কৰা উচিত।

বৃহস্পতিবাৰে প্ৰধানমন্ত্ৰীলৈ লিখা এখন পত্ৰত খৰ্গেয়ে উল্লেখ কৰে যে মাৰ্চ আৰু এপ্ৰিল মাহৰ ভিতৰত তেওঁ সংসদীয় পৰিক্ৰমা মন্ত্ৰীলৈ কেইবাবাৰো লিখিছিল আৰু সীমা নিৰ্ধাৰণৰ প্ৰস্তাৱসমূহৰ ওপৰত আলোচনা কৰিবলৈ সৰ্বদলীয় বৈঠক অনুষ্ঠিত কৰিবলৈ অনুৰোধ জনাইছিল যদিও তেওঁৰ অনুৰোধ গ্ৰহণ কৰা হোৱা নাছিল । সংবিধান (১৩১ সংশোধনী) বিধেয়ক, ২০২৬, ১৭ এপ্ৰিলত লোকসভাত প্ৰয়োজনীয় দুই তৃতীয়াংশ সংখ্যাগৰিষ্ঠতা লাভ কৰাত ব্যৰ্থ হৈ গৃহীত নহ’ল।

তেওঁ পত্ৰখনত উল্লেখ কৰিছে যে সংবাদ মাধ্যমৰ বাতৰিয়ে ইংগিত দিয়ে যে কেন্দ্ৰীয় চৰকাৰে সংশোধিত ১৩১ নং সাংবিধানিক সংশোধনী বিধেয়কখন আগন্তুক বাৰিষা অধিৱেশনত পুনৰ উত্থাপন কৰিবলৈ সাজু হৈছে। গতিকে চৰকাৰে সীমা নিৰ্ধাৰণ সম্পৰ্কীয় সংশোধিত প্ৰস্তাৱসমূহৰ বিষয়ে সকলো পক্ষৰ সৈতে আলোচনা কৰি সেইবোৰ অধ্যয়ন কৰিবলৈ পৰ্যাপ্ত সময় দিব লাগে ।

বিধেয়কখন সংসদত উত্থাপন কৰাৰ পূৰ্বে সৰ্বদলীয় বৈঠক আহ্বান কৰিবলৈ খৰ্গে প্ৰধানমন্ত্ৰীক আহ্বান জনায়, যাতে ৰাজনৈতিক দলসমূহে প্ৰস্তাৱিত পৰিৱৰ্তনসমূহ বিতংভাৱে অধ্যয়ন কৰি নিজৰ মতামত প্ৰকাশ কৰিব পাৰে ।

উল্লেখযোগ্য যে ২০ জুলাইৰ পৰা আৰম্ভ হ’বলগীয়া সংসদৰ বাৰিষা অধিৱেশন।ইয়াৰ পূৰ্বে বুধবাৰে ছোনিয়া গান্ধীৰ অধ্যক্ষতাত কংগ্ৰেছ সংসদীয় দলৰ কৌশল বৈঠক অনুষ্ঠিত হয়। লোকসভাত বিৰোধী দলৰ নেতা ৰাহুল গান্ধী, মল্লিকাৰ্জুন খৰ্গে,কে ধৰি দলৰ আন আন সাংসদ উপস্থিত থাকে। বৈঠকত বাৰিষা অধিৱেশনৰ সময়ত উত্থাপন কৰিবলগীয়া বিষয়সমূহৰ লগতে বিৰোধীৰ কৌশল সন্দৰ্ভত আলোচনা কৰা হয়।

-----------------

হিন্দুস্থান সমাচাৰ / অৰৱিন্দ