শোণিতপুৰ, ০৫ মাৰ্চ (হি স)। ৰাষ্ট্ৰীয় শিশু অধিকাৰ সুৰক্ষা আয়োগে (NCPCR) শোণিতপুৰ জিলা প্ৰশাসনৰ সহযোগত ০৫ মাৰ্চ ২০২৬ তাৰিখে তেজপুৰ কনভেনচন চেণ্টাৰ, দোলাবাৰীত “শিশু অধিকাৰৰ মূল বিষয়সমূহ” বিষয়ক এখন জিলা পৰ্যায়ৰ সন্মিলনৰ আয়োজন কৰে। এই সন্মিলনখন জিলা আয়ুক্ত শ্ৰী আনন্দ কুমাৰ দাসৰ সভাপতিত্বত অনুষ্ঠিত হয়। অনুষ্ঠানত সহকাৰী আয়ুক্ত তথা ভাৰপ্ৰাপ্ত জিলা শিশু সুৰক্ষা বিষয়া (DCPO) শ্ৰীমতী চয়ানিক হাজৰিকা, শোণিতপুৰৰ বিদ্যালয়সমূহৰ পৰিদৰ্শক শ্ৰী প্ৰভাত দাস, স্বাস্থ্য সেৱাৰ যুটীয়া সঞ্চালক ডাঃ বিমান শৰ্মা আৰু অন্যান্য সংশ্লিষ্ট বিষয়া উপস্থিত থাকে।
সন্মিলনখনৰ লক্ষ্য আছিল শিশু সুৰক্ষা আইন আৰু প্ৰতিষ্ঠানিক ব্যৱস্থাৰ বিষয়ে সজাগতা বৃদ্ধি কৰা আৰু জিলা পৰ্যায়ত ইয়াৰ কাৰ্যকৰী ৰূপায়ণ শক্তিশালী কৰা। সন্মিলনত জিলা প্ৰশাসনৰ বিষয়া আৰু শিশু সুৰক্ষা প্ৰতিষ্ঠানৰ প্ৰতিনিধিসকলে শিশুসকলৰ অধিকাৰ আৰু কল্যাণ সুৰক্ষাৰ বাবে সকলো অংশীদাৰৰ মাজত সমন্বিত পদক্ষেপ গ্ৰহণৰ প্ৰয়োজনীয়তাৰ ওপৰত গুৰুত্ব আৰোপ কৰে। জিলা আয়ুক্ত শ্ৰী আনন্দ কুমাৰ দাসৰ আদৰণি ভাষণ আৰু উদ্দেশ্য ব্যাখ্যাৰ পিছতেই বাল্য বিবাহ, শিশু শ্ৰম, শিশু সৰবৰাহ আৰু শিশুসকলৰ ওপৰত সংঘটিত অন্যান্য শোষণমূলক কাৰ্যকলাপ আদি বিষয়সমূহৰ ওপৰত আলোকপাত কৰা এখন দৃশ্য-শ্ৰাব্য উপস্থাপন কৰা হয়। দৃশ্য-শ্ৰাব্য উপস্থাপনৰ জৰিয়তে দুৰ্দশাগ্ৰস্ত শিশুসকলৰ বাবে তাৎক্ষণিক সহায় আগবঢ়োৱা শিশু সহায়ক হেল্পলাইন নম্বৰ ১০৯৮ৰ বিষয়ে সজাগতা সৃষ্টি কৰা হয়।
লগতে দেশত স্বচ্ছ আৰু আইনী দত্তক গ্ৰহণ ব্যৱস্থা প্ৰচাৰৰ উদ্দেশ্যে কেন্দ্ৰীয় দত্তক সম্পদ কৰ্তৃপক্ষ (CARA)ৰ চৰকাৰী এডপচন পৰ্টেল (https://cara.wcd.gov.in/)ৰবিষয়েও অংশগ্ৰহণকাৰীসকলক অৱগত কৰা হয়। এই সন্মিলনত শিক্ষা, স্বাস্থ্য, আৰক্ষী, মহিলা আৰু শিশু উন্নয়ন বিভাগৰ বিষয়া, শিশু কল্যাণ সমিতি (CWC)ৰ সদস্য, জিলা শিশু সুৰক্ষা ইউনিট (DCPU)ৰ বিষয়া, শিশু যত্ন প্ৰতিষ্ঠান (CCI)ৰ প্ৰতিনিধি, বিদ্যালয়ৰ অধ্যক্ষ আৰু শিক্ষকসকল, আৰু সমাজৰ বিভিন্ন সংগঠনৰ প্ৰতিনিধিসকলসহ বিভিন্ন গুৰুত্বপূৰ্ণ অংশীদাৰৰ অংশগ্ৰহণ কৰে ।
কাৰিকৰী কাৰ্যসূচীসমূহত বিশেষজ্ঞসকলে শিশু সুৰক্ষাৰ সৈতে জড়িত কেইবাটাও গুৰুত্বপূৰ্ণ বিষয়ৰ ওপৰত আলোচনা কৰে। তেজপুৰ বিশ্ববিদ্যালয়ৰ আইন বিভাগৰ সহযোগী অধ্যাপক তথা বিভাগীয় মুৰব্বী ড০ গীতাঞ্জলি ঘোষে “বিদ্যালয়ত বুলিং আৰু চাইবাৰ বুলিং: চিনাক্তকৰণ, প্ৰতিৰোধ আৰু প্ৰতিক্ৰিয়াৰ ব্যৱস্থা” শীৰ্ষক এক অনুষ্ঠান আগবঢ়ায়। তেওঁ চাইবাৰ জগতৰ সৈতে জড়িত বাঢ়ি অহা বিপদসমূহ আৰু শিশুসকলৰ মাজত হোৱা বুলিং আৰু অনলাইন হাৰাশাস্তিৰ সৈতে মোকাবিলা কৰিবলৈ বিদ্যালয়, অভিভাৱক আৰু কৰ্তৃপক্ষই ফলপ্ৰসূ সঁহাৰি ব্যৱস্থা গঢ়ি তোলাৰ প্ৰয়োজনীয়তাৰ ওপৰত গুৰুত্ব আৰোপ কৰে। আন এক কাৰ্যসূচীত শোণিতপুৰৰ শিশু কল্যাণ সমিতিৰ প্ৰাক্তন অধ্যক্ষ শ্ৰীমতী আভা বৰাই “নিৰাপদ পৰিৱেশ গঢ়ি তোলা – শিক্ষক, শিশু আৰু অভিভাৱকক সবলীকৰণ” শীৰ্ষক বিষয়ত বক্তব্য আগবঢ়ায়। তেওঁ বিদ্যালয় আৰু সমাজৰ ভিতৰত শিশুসকলৰ বাবে সুৰক্ষিত পৰিৱেশ সৃষ্টি কৰিবলৈ শিক্ষক, অভিভাৱক আৰু বিদ্যালয় কৰ্তৃপক্ষৰ মাজত সজাগতা, সংবেদনশীলতা আৰু সক্ষমতা বিকাশৰ প্ৰয়োজনীয়তাৰ ওপৰত আলোকপাত কৰে।
ইয়াৰ উপৰিও শোণিতপুৰ জিলা আইন সেৱা প্ৰাধিকৰণ (DLSA)ৰ প্ৰতিনিধি তথা উপ-মুখ্য এল এ ডি চি শ্ৰী হেমন্ত দাহালে “শিশু সৰবৰাহ প্ৰতিৰোধৰ সৈতে জড়িত বিষয়সমূহ” শীৰ্ষক বাখ্যা আগবঢ়ায়। আলোচনাত স্পৰ্শকাতৰ পৰিস্থিতি চিনাক্তকৰণ, প্ৰতিৰোধমূলক ব্যৱস্থা শক্তিশালী কৰা আৰু ভুক্তভোগীসকলৰ বাবে সময়মতে আইনী আৰু প্ৰতিষ্ঠানিক সহায় নিশ্চিত কৰাৰ ওপৰত গুৰুত্ব আৰোপ কৰা হয়। জ্যেষ্ঠ বিষয়াসকলে কিশোৰ ন্যায় (শিশুৰ যত্ন আৰু সুৰক্ষা) আইন, ২০১৫ আৰু শিশুৰ ওপৰত যৌন অপৰাধৰ পৰা সুৰক্ষা (POCSO) আইন, ২০১২কে ধৰি প্ৰধান আইনসমূহৰ ফলপ্ৰসূ ৰূপায়ণৰ গুৰুত্বৰ ওপৰত আলোকপাত কৰে লগতে শিশুসকলৰ সুৰক্ষা নিশ্চিত কৰিবলৈ প্ৰতিষ্ঠানসমূহৰ মাজত অধিক সমন্বয়, সময়মতে ঘটনাৰ প্ৰতিবেদন আৰু তৃণমূল পৰ্যায়ত অধিক সজাগতাৰ প্ৰয়োজনীয়তাৰ ওপৰত আলোচনা কৰা হয়।
এই সন্মিলনত শিক্ষা বিভাগৰ বিষয়া, জিলা শিক্ষা বিষয়া, বিদ্যালয়ৰ অধ্যক্ষ আৰু শিক্ষক, বিশেষ কিশোৰ আৰক্ষী বিষয়া (SJPO) আৰু শিশু কল্যাণ আৰক্ষী বিষয়া (CWPO)সহ আৰক্ষী বিষয়া, শিশু কল্যাণ সমিতিৰ সদস্য, মহিলা আৰু শিশু উন্নয়ন বিভাগৰ বিষয়া আৰু নাগৰিক সমাজৰ সংগঠনৰ প্ৰতিনিধিসকলৰ সক্ৰিয় অংশগ্ৰহণ পৰিলক্ষিত হয়। মুকলি আলোচনা কাৰ্যসূচীৰ সময়ত অংশগ্ৰহণকাৰীসকলে ক্ষেত্ৰভিত্তিক অভিজ্ঞতা সন্দৰ্ভত মত বিনিময় কৰে, শিশু সুৰক্ষা আইনসমূহৰ ৰূপায়ণত থকা ব্যৱহাৰিক প্ৰত্যাহ্বানসমূহ উত্থাপন কৰে আৰু শিশুসকলৰ সুৰক্ষা আৰু সামগ্ৰিক কল্যাণ নিশ্চিত কৰাৰ বাবে জিলা পৰ্যায়ৰ ব্যৱস্থাসমূহ অধিক শক্তিশালী কৰাৰ প্ৰতি তেওঁলোকৰ প্ৰতিশ্ৰুতি পুনৰ দৃঢ় কৰে।
উল্লেখযোগ্য যে ৰাষ্ট্ৰীয় শিশু অধিকাৰ সুৰক্ষা আয়োগ (NCPCR) ২০০৭ চনত শিশু অধিকাৰ সুৰক্ষা আয়োগ আইন, ২০০৫ৰ অধীনত স্থাপিত হৈছিল। এই আয়োগে নিশ্চিত কৰে যে দেশৰ সকলো আইন, নীতি, কাৰ্যসূচী আৰু প্ৰশাসনিক ব্যৱস্থা ভাৰতৰ সংবিধান আৰু ৰাষ্ট্ৰসংঘৰ Convention on the Rights of the Childৰ সৈতে সামঞ্জস্য ৰাখি শিশু অধিকাৰৰ দৃষ্টিভংগীৰ সৈতে মিল থকা হয়। “ভৱিষ্য ৰক্ষতি ৰক্ষিতঃ” (“The Future Protects Those Who Protect It”) মূলমন্ত্ৰৰে পৰিচালিত হৈ আয়োগে প্ৰতিটো শিশুৰ অধিকাৰ আৰু মংগল সুৰক্ষিত কৰাৰ বাবে সদায় প্ৰতিশ্ৰুতিবদ্ধ।
হিন্দুস্থান সমাচাৰ / সমীৰ কাৰ
