নতুন দিল্লী, ৩১ জুলাই (হি.স.)। ৱেষ্ট ইণ্ডিজৰ বিৰুদ্ধে দেওবাৰৰ পৰা প’ৰ্ট অৱ স্পেইনত আৰম্ভ হ’বলগীয়া দ্বিতীয়খন টেষ্টত পাকিস্তানৰ শ্বান মাছুদে অংশগ্ৰহণ কৰিব নোৱাৰিব। বাওঁহাতৰ বেটছমেনগৰাকী আঙুলিৰ আঘাতৰ বাবে দলৰ পৰা বাহিৰ হৈছে।

তাৰুবাত অনুষ্ঠিত প্ৰথম টেষ্টৰ প্ৰথম ইনিংছত বেটিং কৰি থকা অৱস্থাত জেডেন ছিলছৰ বলত আঘাত পোৱা মাছুদে বাওঁ তৰ্জনী আঙুলিত আঘাত পাইছিল; খেলখনত ৯০ ৰানত পৰাস্ত হয় পাকিস্তান।

ইংলেণ্ডৰ বিৰুদ্ধে আগন্তুক টেষ্ট শৃংখলাত মাছুদৰ অংশগ্ৰহণৰ ওপৰতো সন্দেহৰ সৃষ্টি হৈছে।

পাকিস্তান ক্ৰিকেট ব’ৰ্ডে প্ৰকাশ কৰিছে যে ১৯ আগষ্টৰ পৰা লিডছত আৰম্ভ হ’বলগীয়া প্ৰথমখন টেষ্টৰ বাবে তেওঁৰ উপলব্ধতা তেওঁৰ সুস্থতাৰ ওপৰত নিৰ্ভৰ কৰিব।

পিচিবিয়ে এক বিবৃতিত কয় যে, ট্ৰিনিদাদৰ ব্রায়ান লাৰা ক্ৰিকেট একাডেমীত অনুষ্ঠিত হোৱা প্ৰথমখন টেষ্টৰ সময়ত বাওঁ তৰ্জনী আঙুলিৰ আঘাতৰ বাবে ৱেষ্ট ইণ্ডিজৰ বিৰুদ্ধে দ্বিতীয়খন টেষ্ট খেলৰ পৰা বাহিৰ হৈছে পাকিস্তান টেষ্ট বেটছমেন শ্বান মাছুদ। স্কেন আৰু ক্লিনিকেল মূল্যায়নৰ পিছত বৰ্তমান শ্বানক পাকিস্তান দলৰ মেডিকেল পেনেলে চিকিৎসা কৰি আছে।

পিচিবিয়ে কয় যে ১৯ আগষ্টৰ পৰা ইংলেণ্ডৰ বিৰুদ্ধে লিডছত অনুষ্ঠিত হ’বলগীয়া প্ৰথমখন টেষ্টৰ বাবে তেওঁৰ উপলব্ধতা তেওঁৰ আৰোগ্য আৰু ক্লিনিকেল অগ্ৰগতিৰ ওপৰত নিৰ্ভৰ কৰিব। ইয়াৰ উপৰিও কোৱা হৈছে যে মাছুদ “দলৰ সৈতে থাকিব”।

প্ৰথমখন টেষ্টত পাকিস্তানৰ বেটিং লৰচৰ কৰিছিল আৰু মাছুদৰ অনুপস্থিতিয়ে কুইনছ পাৰ্ক অ’ভেলত অনুষ্ঠিত হ’বলগীয়া দ্বিতীয়খন মেচৰ বাবে নিৰ্বাচনৰ প্ৰত্যাহ্বানৰ সৃষ্টি কৰিব। পিঠিৰ আঘাতৰ বাবে আব্দুল্লা ফাজালক শৃংখলাৰ পৰা বাহিৰ হোৱাৰ পিছত দলত অন্তৰ্ভুক্ত হোৱা আব্দুল্লা শ্বাফিক আৰু ছৌদ শ্বাকিল—মাছুদৰ ঠাইত প্ৰতিদ্বন্দ্বিতা কৰা খেলুৱৈসকলৰ ভিতৰত অন্যতম। টেষ্টত অভিষেক ঘটোৱাৰ বাবেও অনকেপড বেটছমেন আৱাইছ জাফৰে দৌৰত নামিছে।

-----------------

হিন্দুস্থান সমাচাৰ / অৰৱিন্দ