তেহৰাণ/ৱাশ্বিংটন, ১৯ জুলাই (হি.স.)। ৰাষ্ট্ৰপতি ড’নাল্ড ট্ৰাম্পৰ নিৰ্দেশত শনিবাৰে নিশা একেৰাহে অষ্টমবাৰৰ বাবে আমেৰিকাৰ সেনাই ইৰাণৰ ওপৰত বিমান আক্ৰমণ চলায়। জৰ্ডানত থকা আমেৰিকাৰ সামৰিক ঘাটিত ইৰাণৰ আক্ৰমণৰ প্ৰতিক্ৰিয়া স্বৰূপে এই কাৰ্য্য গ্ৰহণ কৰা হৈছে, য’ত দুজন আমেৰিকান সৈনিকৰ মৃত্যু হৈছিল।
আমেৰিকাৰ চেণ্ট্ৰেল কমাণ্ডে (চিচিঅ’এম) এক্সত শ্বেয়াৰ কৰা এটা বাৰ্তাত কোৱা হৈছে যে আজি সন্ধিয়া ৬ বজাত মুখ্য সেনাধ্যক্ষৰ নিৰ্দেশত আমেৰিকাৰ সেনাই ইৰাণৰ বিৰুদ্ধে নতুন বিমান আক্ৰমণ চলায়। এই আক্ৰমণৰ লক্ষ্য হৈছে ইৰাণৰ হৰমুজ জলদ্বীপৰ মাজেৰে বাণিজ্যিক জাহাজ চলোৱাত বাধাৰ সৃষ্টি কৰাৰ ক্ষমতাক আৰু অধিক অৱনমিত কৰা আৰু যোৱা নিশা জৰ্ডানত আমেৰিকাৰ সৈন্যক আক্ৰমণ কৰা ইছলামিক ৰিভল্যুচনেৰী গাৰ্ড কৰ্পছৰ বাহিনীক শাস্তি প্ৰদান কৰা।
শেহতীয়া আক্ৰমণত আমেৰিকাৰ যুদ্ধ বিমান আৰু ক্ষেপণাস্ত্ৰই ইৰাণৰ দক্ষিণৰ উপকূলীয় চহৰ ছিৰিক, হাজিয়াবাদ, বন্দৰ আব্বাছ, আৰু কেছম দ্বীপৰ সামৰিক ঘাটিসমূহক লক্ষ্য কৰি লৈছিল। ইয়াৰ পূৰ্বে বিগত কেইদিনমানৰ পৰা আমেৰিকাই ইৰাণত ধাৰাবাহিকভাৱে আক্ৰমণ চলাই কেইবাখনো দলং, ৰেলৱে ষ্টেচন, বিমানবন্দৰ, পাৱাৰ গ্ৰীড, আৰু এটা জল প্লাণ্ট ধ্বংস কৰিছিল।
ইৰাণেও উপসাগৰীয় দেশসমূহত থকা আমেৰিকাৰ সামৰিক ঘাটিসমূহক লক্ষ্য কৰি আমেৰিকাৰ আক্ৰমণৰ প্ৰতিশোধ গ্ৰহণ কৰিছে । ইৰাণৰ সেনাই কুৱেইট আৰু বাহৰেইনত থকা আমেৰিকাৰ সামৰিক ঘাটিৰ লগতে পঞ্চম বহৰৰ কমাণ্ড চেণ্টাৰত ড্ৰ’ন আৰু বেলিষ্টিক মিছাইল নিক্ষেপ কৰিছে। ইৰাকৰ আৰবিলত থকা আমেৰিকাৰ কনছুলেটে বিমান আক্ৰমণৰ পৰা ৰক্ষা পাবলৈ নিজৰ এয়াৰ ডিফেন্স চিষ্টেম সক্ৰিয় কৰিছে।
ইৰাণৰ স্বাস্থ্য মন্ত্ৰালয়ে দাবী কৰিছে যে ২৭ জুনৰ পৰা ১৮ জুলাইৰ ভিতৰত আমেৰিকাৰ বিমান আক্ৰমণত ৫০ জন লোকৰ মৃত্যু হোৱাৰ লগতে ৫০০ৰো অধিক লোক আহত হৈছে ।
--------------
হিন্দুস্থান সমাচাৰ / অৰৱিন্দ
20 Jul 2026
