কোকৰাঝাৰ, ১৪ নৱেম্বৰ (হি.স.)। লোক আস্থাৰ মহাপৰ্ব ছট পূজাৰ দ্বিতীয় দিনা আজি শনিবাৰে সমগ্ৰ অঞ্চলতে গভীৰ শ্ৰদ্ধা, ভক্তি আৰু ধৰ্মীয় পৰম্পৰাৰে খৰণা পালন কৰা হয়। খৰণা পৰ্বৰ জৰিয়তে চাৰিদিনীয়া ছট মহাপৰ্বৰ কঠোৰ ধৰ্মীয় নীতি-নিয়ম আৰু উপবাসৰ প্ৰক্ৰিয়া আৰম্ভ হয়।

খৰণা উপলক্ষে ব্ৰতধাৰী সকলে আজি গোটেই দিনটো নিৰ্জলা উপবাস পালন কৰে। সন্ধিয়া স্নান কৰি পৰিষ্কাৰ-পৰিচ্ছন্ন বস্ত্ৰ পৰিধান কৰাৰ পিছত নিজ নিজ ঘৰত পৰম্পৰাগত ৰীতি-নীতি অনুসৰি খৰণা পূজা সম্পন্ন কৰে। এই উপলক্ষে ভগৱান সূৰ্য আৰু ছটী মাইয়াৰ আৰাধনা কৰি গুড়ৰ খীৰ আৰু ৰুটি প্ৰস্তুত কৰা হয়। পূজা-অৰ্চনাৰ অন্তত দেৱতাৰ ওচৰত নৈবেদ্য আগবঢ়াই ব্ৰতধাৰীসকলে প্ৰসাদ গ্ৰহণ কৰে। পৰৱৰ্তী সময়ত পৰিয়ালৰ সদস্য আৰু ভক্তসকলৰ মাজতো এই প্ৰসাদ বিতৰণ কৰা হয়।

খৰণা পৰ্বৰ প্ৰসাদ গ্ৰহণ কৰাৰ পিছতে ব্ৰতধাৰীসকলে প্ৰায় ৩৬ ঘণ্টীয়া কঠোৰ নিৰ্জলা উপবাসৰ সংকল্প গ্ৰহণ কৰে। ছট পূজাৰ তৃতীয় দিনা অস্তগামী সূৰ্যক অৰ্ঘ্য আগবঢ়োৱা হ’ব। আনহাতে, চতুৰ্থ তথা অন্তিম দিনা উদীয়মান সূৰ্যক অৰ্ঘ্য প্ৰদানৰ জৰিয়তে চাৰিদিনীয়া ছট মহাপৰ্বৰ সামৰণি পৰিব।

ছট মহাপৰ্বক কেন্দ্ৰ কৰি ফকিৰাগ্ৰামকে ধৰি বিভিন্ন অঞ্চলৰ ঘৰ-দুৱাৰ আৰু পূজা ঘাটসমূহত এক ভক্তিময় পৰিৱেশৰ সৃষ্টি হৈছে। পৱিত্ৰতা, নিষ্ঠা, অনুশাসন আৰু পাৰিবাৰিক ঐক্যৰ প্ৰতীক হিচাপে পৰিচিত এই মহাপৰ্বই সমাজত ভক্তি, সমৰ্পণ আৰু সম্প্ৰীতিৰ এক অনন্য বাৰ্তা কঢ়িয়াই আনিছে।

হিন্দুস্থান সমাচাৰ / কিশোৰ মিশ্ৰ