কাঠমাণ্ডু, ১৯ অক্টোবৰ (হি.স.)। আয়ুষ্মান খুৰানা আৰু চাৰা আলী খান অভিনীত উড়তা তীৰ ছবিখন নেপালত মুক্তিৰ ক্ষেত্ৰত নিষেধাজ্ঞা আৰোপ কৰা হৈছে। আকাশ কৌশিকৰ পৰিচালনাত নিৰ্মিত ছবিখন শুকুৰবাৰে ছবিগৃহত মুক্তি পোৱাৰ কথা আছিল।
তথ্য আৰু যোগাযোগ মন্ত্ৰালয়ে ছবি বিতৰণ কোম্পানী নেশ্যনেল চিনে গ্ৰুপলৈ পত্ৰ প্ৰেৰণ কৰি ছবিখন নেপালত মুক্তিৰ অনুমতি দিয়া হোৱা নাই বুলি জনাইছে। মন্ত্ৰালয়ৰ দৃশ্য-শ্ৰাব্য আৰু সম্প্ৰচাৰ শাখাই উল্লেখ কৰিছে যে ছবিখনত চলচ্চিত্ৰ নিৰ্মাণ, প্ৰদৰ্শনী আৰু বিতৰণ আইন, ২০২৬ৰ ধাৰা ৮ (৩)ৰ অধীনত নিষিদ্ধ বিষয়বস্তু আছে। এই ব্যৱস্থা অনুসৰি ছবিখন ৰাজহুৱা প্ৰদৰ্শনৰ বাবে অনুমতি দিব নোৱাৰিব।
ছবিখনত ভাৰত আৰু পাকিস্তানৰ মাজত থকা উত্তেজনাৰ এক কুটিল কাহিনী উপস্থাপন কৰা হৈছে । ফলস্বৰূপে কেন্দ্ৰীয় চলচ্চিত্ৰ প্ৰদৰ্শন সমিতিয়ে ইয়াৰ ৰাজহুৱা প্ৰদৰ্শনত নিষেধাজ্ঞা আৰোপ কৰিছে।
নেপালী চলচ্চিত্ৰ লেখক তথা সমালোচক সমপ্যৰাজ টিমিলছিনাই কয় যে, “আন এখন দেশৰ ভাবমূর্তিৰ ক্ষতি কৰিব পৰা ছবি নিষিদ্ধ কৰাৰ ব্যৱস্থা আছে, কিয়নো দুয়োখন দেশ বন্ধুত্বপূৰ্ণ ৰাষ্ট্ৰ ৷”
তেওঁ কয় যে যিকোনো দেশৰ ৰাষ্ট্ৰীয়তা বা সম্প্ৰদায়ক প্ৰত্যক্ষভাৱে প্ৰভাৱিত কৰা ছবি নিষিদ্ধ কৰাৰ ব্যৱস্থা আছে।
হিন্দুস্থান সমাচাৰ / মনোজ কুমাৰ শইকীয়া
