তেহৰাণ (ইৰাণ), ১৯ অক্টোবৰ (হি.স.)। মহাকাশ প্ৰযুক্তি আৰু সামৰিক ঔদ্যোগিক উৎপাদনৰ বিশেষজ্ঞ মেহৰদাদ আখলাঘী কেটাবচিক ইৰাণৰ প্ৰতিৰক্ষা মন্ত্ৰী হিচাপে নিযুক্তি দিয়া হৈছে। আমেৰিকাৰ সৈতে যুদ্ধৰ সম্ভাৱনা বৃদ্ধি পোৱাৰ আশংকা থকাৰ সময়তে তেওঁক নিযুক্তি দিয়া হৈছে। দেওবাৰে অনলাইন বৈঠকত সংসদে অনুমোদন জনাইছিল ৬৮ বছৰীয়া অখলাঘীৰ নিযুক্তি । ২৮ ফেব্ৰুৱাৰীত ইৰাণৰ ওপৰত আমেৰিকা-ইজৰাইলৰ বিমান আক্ৰমণৰ পিছৰে পৰা সংসদৰ অনলাইন বৈঠক অনুষ্ঠিত হৈ আহিছে । আখলাঘীয়ে প্ৰতিৰক্ষা আৰু সশস্ত্ৰ বাহিনীৰ লজিষ্টিক মন্ত্ৰালয়ৰ নেতৃত্ব দিব। মুঠ ২৩৭ জন সাংসদে তেওঁৰ নিযুক্তিৰ সপক্ষে ভোটদান কৰাৰ বিপৰীতে ১৫ জন সাংসদে বিপক্ষে ভোটদান কৰে।
আল জাজিৰাৰ মতে, কিছুদিনৰ পৰা এই পদত অধিষ্ঠিত হোৱা মজিদ ইবনে-ই ৰেজাই এতিয়া আখলাঘীৰ ডেপুটি হিচাপে কাৰ্যনিৰ্বাহ কৰিব। আমেৰিকা আৰু ইজৰাইলৰ আক্ৰমণৰ তীব্ৰ লক্ষ্য হৈ পৰা ইৰাণৰ সামৰিক উদ্যোগিক আন্তঃগাঁথনি পুনৰ নিৰ্মাণ আৰু সম্প্ৰসাৰণৰ দায়িত্ব অখলাঘীয়ে ল’ব। নতুন মন্ত্ৰীগৰাকীৰ প্ৰতিৰক্ষা পৰিকল্পনাত ইতিমধ্যে জ্যেষ্ঠ সামৰিক বিষয়া ৰাষ্ট্ৰপতি মাছুদ পেজেছকিয়ান আৰু সংসদৰ ৰাষ্ট্ৰীয় নিৰাপত্তা আৰু বৈদেশিক নীতি আয়োগে অনুমোদন জনাইছে ।
ৰাষ্ট্ৰপতি পেজেস্কিয়ানে কয় যে ইৰাণ ইছলামিক ৰিপাব্লিকে কোনো দেশৰ বিৰুদ্ধে আগ্ৰাসন আৰম্ভ নকৰে, কিন্তু যদি আক্ৰমণ হয় তেন্তে দেশখনৰ ভূখণ্ডৰ অখণ্ডতা ৰক্ষাৰ বাবে নিজৰ সকলো শক্তিৰে আৰু শেষলৈকে যুঁজিব । ৰাষ্ট্ৰপতিগৰাকীয়ে কয় যে অখলাঘীৰ প্ৰতিৰক্ষা মন্ত্ৰালয় আৰু ইয়াৰ সংযুক্ত সংগঠনসমূহত ৪২ বছৰৰো অধিক অভিজ্ঞতা আছে । ৰাষ্ট্ৰীয় সংবাদ মাধ্যমৰ মতে তেওঁৰ মূল বিশেষজ্ঞতা হৈছে বেলিষ্টিক মিছাইল, কঠিন ইন্ধন প্ৰপালচন, মহাকাশ প্ৰযুক্তি আৰু সামৰিক ঔদ্যোগিক উৎপাদন ।
ইয়াৰ পূৰ্বে তেওঁ শ্বাহিদ বাঘেৰী ঔদ্যোগিক গোট, মহাকাশ উদ্যোগ সংস্থা, আৰু প্ৰতিৰক্ষা উদ্যোগ সংস্থাৰ মুৰব্বী হিচাপে কাৰ্যনিৰ্বাহ কৰিছিল। আখলাঘী আৰু এই সকলোবোৰ সংগঠন আমেৰিকাৰ নিষেধাজ্ঞা আৰু ৰাষ্ট্ৰসংঘৰ নিষেধাজ্ঞাৰ অধীনত আছে। তাছনিমৰ মতে, বিগত কেইটামান দশক ধৰি তেওঁ বিভিন্ন মিছাইল আৰু অস্ত্ৰ উন্নয়ন প্ৰকল্পৰ সৈতে জড়িত হৈ আছে।
ইৰাণৰ ফ্লেগশ্বিপ ছাজিল আৰু জোলফাঘৰ বেলিষ্টিক মিছাইল ৰেঞ্জ সম্প্ৰসাৰণৰ লগতে আলমাছ মিছাইল আৰু ইয়াচিন গাইডেড বোমা আদি নিখুঁতভাৱে নিৰ্দেশিত অস্ত্ৰ নিৰ্মাণত আখলাঘীয়ে গুৰুত্বপূৰ্ণ ভূমিকা পালন কৰা বুলি কোৱা হয়। মহাকাশ লঞ্চাৰ, গৱেষণা ৰকেট, চেমনানৰ ইমাম খোমেইনী মহাকাশ কেন্দ্ৰৰ সৈতে জড়িত আন্তঃগাঁথনিৰ ক্ষেত্ৰতো তেওঁৰ বিশেষজ্ঞতা আছে বুলি কোৱা হয়। এই সকলোবোৰেই ইজৰাইল আৰু আমেৰিকাৰ বিৰুদ্ধে ইৰাণৰ যুদ্ধৰ মূল উপাদান হৈ আহিছে ।
-----------------
হিন্দুস্থান সমাচাৰ / অৰৱিন্দ
