বঙাইগাঁও, ০১ অক্টোবৰ (হি.স.)। হিন্দীৰ প্ৰতি সজাগতা বৃদ্ধি, সৃজনশীল অভিব্যক্তি আৰু ৰাজভাষা হিচাপে হিন্দীৰ ব্যৱহাৰক উৎসাহিত কৰাৰ উদ্দেশ্যে নগৰ ৰাজভাষা কাৰ্যকৰী সমিতি (নৰাকাছ), বঙাইগাঁও আৰু সমিতিৰ আহ্বায়ক ইণ্ডিয়ান অইল কৰ্প’ৰেচন লিমিটেড, বঙাইগাঁও ৰিফাইনেৰীৰ উদ্যোগত আয়োজিত হিন্দী পষেক–২০২৬ বিভিন্ন কাৰ্যসূচীৰে সফলতাৰে সম্পন্ন হয়। পষেকৰ সময়ছোৱাত বঙাইগাঁও, কোকৰাঝাৰ আৰু চিৰাং জিলাত হিন্দী গ্ৰন্থ প্ৰদৰ্শনী, সৃজনশীল হিন্দী লেখন কৰ্মশালা আৰু সদস্য কাৰ্যালয়সমূহৰ বাবে বিভিন্ন সাহিত্যিক প্ৰতিযোগিতা অনুষ্ঠিত কৰা হয়।

হিন্দী পষেকৰ অন্যতম উল্লেখযোগ্য কাৰ্যসূচী আছিল বিভিন্ন শিক্ষানুষ্ঠান আৰু কাৰ্যালয়ত আয়োজিত হিন্দী গ্ৰন্থ প্ৰদৰ্শনী। কোকৰাঝাৰৰ কেন্দ্ৰীয় বিদ্যালয়, নিউ বঙাইগাঁৱৰ কেন্দ্ৰীয় বিদ্যালয়, চিৰাঙৰ জৱাহৰ নৱোদয় বিদ্যালয়, কোকৰাঝাৰৰ জৱাহৰ নৱোদয় বিদ্যালয়, সিদলীৰ আদৰ্শ বিদ্যালয়, বিজনীৰ আদৰ্শ বিদ্যালয়, বঙাইগাঁও ৰিফাইনেৰী, বঙাইগাঁওৰ এছ এছ বি ক্ষেত্ৰক মুখ্য কাৰ্যালয়, ভাৰতীয় খাদ্য নিগম, নিউ বঙাইগাঁওৰ উত্তৰ-পূব সীমান্ত ৰে’লৱে পৰ্যবেক্ষক প্ৰশিক্ষণ কেন্দ্ৰ আৰু বঙাইগাঁও ৰিফাইনেৰী টাউনশ্বিপত অনুষ্ঠিত এই প্ৰদৰ্শনীসমূহত সাহিত্য, কবিতা, গল্প, জীৱনী, ভ্ৰমণ কাহিনী তথা জ্ঞান-বিজ্ঞানকে ধৰি বিভিন্ন বিষয়ৰ গ্ৰন্থ প্ৰদৰ্শন কৰা হয়।

এই গ্ৰন্থ প্ৰদৰ্শনীৰ জৰিয়তে শিক্ষাৰ্থী আৰু কৰ্মচাৰী সকলৰ মাজত পঢ়াৰ অভ্যাস গঢ়ি তোলা আৰু হিন্দী সাহিত্যৰ সমৃদ্ধ পৰম্পৰাৰ সৈতে পৰিচয় কৰাই দিয়াৰ প্ৰয়াস কৰা হয়। বিদ্যালয় সমূহত শিক্ষাৰ্থী সকলে গ্ৰন্থৰ প্ৰতি বিশেষ আগ্ৰহ প্ৰকাশ কৰাৰ লগতে বিভিন্ন সাহিত্যিক ধাৰাৰ বিষয়ে জ্ঞান আহৰণ কৰে। একেদৰে সদস্য কাৰ্যালয়সমূহৰ কৰ্মচাৰীসকলেও হিন্দী গ্ৰন্থ পঠন আৰু অধ্যয়নৰ প্ৰতি উৎসাহ প্ৰদৰ্শন কৰে।

পষেকৰ অধীনত অনুষ্ঠিত সৃজনশীল হিন্দী লেখন কৰ্মশালাসমূহেও বিশেষ সঁহাৰি লাভ কৰে। কেন্দ্ৰীয় বিদ্যালয়, কোকৰাঝাৰ আৰু নিউ বঙাইগাঁও, জৱাহৰ নৱোদয় বিদ্যালয়, চিৰাং আৰু কোকৰাঝাৰ, আদৰ্শ বিদ্যালয়, সিদলী, এছ এছ বি ক্ষেত্ৰক মুখ্য কাৰ্যালয়, বঙাইগাঁও, ভাৰতীয় খাদ্য নিগম, বঙাইগাঁও আৰু উত্তৰ-পূব সীমান্ত ৰে’লৱে পৰ্যবেক্ষক প্ৰশিক্ষণ কেন্দ্ৰ, নিউ বঙাইগাঁৱত অনুষ্ঠিত কৰ্মশালাত অংশগ্ৰহণকাৰীসকলক হিন্দীত মৌলিক লেখা-লিখিৰ বাবে উৎসাহিত কৰা হয়।

কৰ্মশালাসমূহত কবিতা, গল্প, স্মৃতিচাৰণ, সংলাপ আৰু অভিজ্ঞতা লিখনৰ লগতে বিভিন্ন সৃজনশীল ধাৰাৰ জৰিয়তে নিজৰ চিন্তা আৰু অনুভৱ আকৰ্ষণীয় তথা ফলপ্ৰসূভাৱে প্ৰকাশ কৰাৰ কৌশলৰ বিষয়ে আলোচনা কৰা হয়। শিক্ষাৰ্থীসকলক সৃজনশীল লেখন কেৱল সাহিত্যিকসকলৰ মাজতে সীমাবদ্ধ নহয় বুলি অৱগত কৰি নিজৰ অভিজ্ঞতা আৰু চিন্তাক ভাষাৰ জৰিয়তে সৃষ্টিশীল ৰূপ দিবলৈ উৎসাহিত কৰা হয়।

নৰাকাছৰ কাৰ্যসূচীত সদস্য কাৰ্যালয়সমূহৰ সক্ৰিয় অংশগ্ৰহণ নিশ্চিত কৰাৰ উদ্দেশ্যে বিভিন্ন সাহিত্যিক প্ৰতিযোগিতাও অনুষ্ঠিত কৰা হয়। বঙাইগাঁও ৰিফাইনেৰীৰ উদ্যোগত হিন্দী ভ্ৰমণ স্মৃতিচাৰণ প্ৰতিযোগিতা, ভাৰতীয় খাদ্য নিগম, বঙাইগাঁৱৰ উদ্যোগত হিন্দী গল্প লিখন প্ৰতিযোগিতা, ইণ্ডিয়ান অইল গুৱাহাটী–শিলিগুৰি পাইপলাইন, বঙাইগাঁও ষ্টেচনৰ উদ্যোগত হিন্দী কাব্য লিখন প্ৰতিযোগিতা আৰু ভাৰতীয় খাদ্য নিগম, কোকৰাঝাৰৰ উদ্যোগত স্বৰচিত হিন্দী কবিতা পাঠ প্ৰতিযোগিতা অনুষ্ঠিত হয়। এই প্ৰতিযোগিতাসমূহে কৰ্মচাৰীসকলক নিজৰ অভিজ্ঞতা, কল্পনা আৰু সৃজনশীল প্ৰতিভা হিন্দীৰ জৰিয়তে প্ৰকাশ কৰাৰ সুযোগ প্ৰদান কৰে।

এই উপলক্ষে নৰাকাছ, বঙাইগাঁৱৰ সভাপতি তথা বঙাইগাঁও ৰিফাইনেৰীৰ কাৰ্যবাহী সঞ্চালক আৰু ৰিফাইনেৰী প্ৰধান নয়ন কুমাৰ বৰুৱাই কয় যে হিন্দী পষেকৰ কাৰ্যসূচীৰ উদ্দেশ্য কেৱল হিন্দীৰ প্ৰতি আনুষ্ঠানিক সজাগতা সৃষ্টি কৰা নহয়, বৰং ইয়াৰ নিৰন্তৰ আৰু স্বাভাৱিক ব্যৱহাৰক উৎসাহিত কৰাহে। বিদ্যালয়, যুৱ প্ৰজন্ম আৰু সমাজৰ বিভিন্ন শ্ৰেণীৰ সৈতে হিন্দী সংযুক্ত হ’লেহে ৰাজভাষাৰ উদ্দেশ্য অধিক ব্যাপকভাৱে সফল হ’ব বুলি তেওঁ উল্লেখ কৰে।

নৰাকাছ, বঙাইগাঁৱৰ সদস্য সচিব শৰদ কুমাৰে কয় যে এইবাৰ সমিতিয়ে হিন্দীৰ কাৰ্যকলাপ কাৰ্যালয়ৰ সীমাৰ বাহিৰলৈ লৈ গৈ শিক্ষাৰ্থী আৰু যুৱ সৃষ্টিশীল ব্যক্তিসকলৰ সৈতে সংযোগ স্থাপনৰ ওপৰত বিশেষ গুৰুত্ব আৰোপ কৰিছে। গ্ৰন্থ প্ৰদৰ্শনী আৰু সৃজনশীল লেখন কৰ্মশালাৰ জৰিয়তে নতুন প্ৰজন্মক হিন্দী সাহিত্যৰ সৈতে সংযোগ কৰাৰ লগতে প্ৰতিযোগিতাৰ জৰিয়তে সদস্য কাৰ্যালয়ৰ কৰ্মচাৰীসকলক নিজৰ সৃজনশীল প্ৰতিভা প্ৰকাশৰ সুযোগ প্ৰদান কৰা হয়। কৰ্মশালাৰ ফেকাল্টী সদস্য হিচাপে যুৱ কবি তথা ৰংকৰ্মী মহম্মদ ৰহমানৰ অৱদান উল্লেখযোগ্য আছিল। আনহাতে, বিকাশ ৰাৱালৰ নেতৃত্বত হিন্দীস্থান প্ৰকাশনৰ হিন্দী গ্ৰন্থ প্ৰদৰ্শনীয়েও বিশেষ সঁহাৰি লাভ কৰে।

হিন্দী পষেকৰ সফল আয়োজনত নৰাকাছ, বঙাইগাঁৱৰ সদস্য কাৰ্যালয়সমূহৰ লগতে বিভিন্ন শিক্ষানুষ্ঠান, বিষয়া-কৰ্মচাৰী, শিক্ষক আৰু শিক্ষাৰ্থীসকলে সক্ৰিয়ভাৱে অংশগ্ৰহণ কৰে। বিস্তৃত পৰিসৰত অনুষ্ঠিত এই কাৰ্যসূচীসমূহে বঙাইগাঁও, কোকৰাঝাৰ আৰু চিৰাং অঞ্চলত হিন্দীৰ প্ৰতি ইতিবাচক পৰিৱেশ গঢ়ি তোলাৰ লগতে পঠন, লেখন আৰু সৃজনশীল অভিব্যক্তিৰ সংস্কৃতি শক্তিশালী কৰাৰ ক্ষেত্ৰত এক গুৰুত্বপূৰ্ণ পদক্ষেপ হিচাপে পৰিগণিত হয়।

হিন্দুস্থান সমাচাৰ / কিশোৰ মিশ্ৰ