কাঠমাণ্ডু, ২১ জানুৱাৰী (হি.স.)। বাণিজ্যৰ সুবিধা আৰু শুল্ক নিয়ন্ত্ৰণ অধিক ফলপ্ৰসূ কৰাৰ বাবে নেপাল আৰু ভাৰতৰ মাজত বুজাবুজিৰ চুক্তি স্বাক্ষৰিত হৈছে।

নতুন দিল্লীত বুধবাৰে নেপালৰ শুল্ক বিভাগৰ সঞ্চালক প্ৰধান শ্যাম প্ৰসাদ ভাণ্ডাৰী আৰু ভাৰতৰ কেন্দ্ৰীয় পৰোক্ষ কৰ আৰু শুল্ক ব’ৰ্ডৰ অধ্যক্ষ বিবেক চতুৰ্বেদীৰ মাজত এক আনুষ্ঠানিক অনুষ্ঠানত স্বাক্ষৰিত হয় এই বুজাবুজি চুক্তি।

আন্তঃৰাষ্ট্ৰীয় প্ৰথা অনুসৰি নেপালে এতিয়া নিজৰ প্ৰধান বাণিজ্যিক অংশীদাৰ ভাৰতৰ সৈতে ৰপ্তানি সামগ্ৰীৰ সবিশেষ আগতীয়াকৈ ভাগ-বতৰা কৰিব। এই ব্যৱস্থাৰ লক্ষ্য হৈছে বিপদ ব্যৱস্থাপনাৰ জৰিয়তে শুল্ক নিষ্কাশন প্ৰক্ৰিয়া ক্ষিপ্ৰ আৰু সৰল কৰা।

এই বুজাবুজি চুক্তিত বিপদ বিশ্লেষণৰ জৰিয়তে শুল্ক নিয়ন্ত্ৰণ আৰু বাণিজ্যৰ সুবিধাৰ ব্যৱস্থা সুশৃংখলিত কৰা, শুল্ক প্ৰক্ৰিয়াকৰণৰ সময় হ্ৰাস কৰা, আৰু নিৰাপদ আন্তঃৰাষ্ট্ৰীয় বাণিজ্য নিশ্চিত কৰাৰ ব্যৱস্থা কৰা হৈছে।

এই চুক্তিৰ অধীনত ৰাষ্ট্ৰীয় আইনৰ কাঠামোৰ ভিতৰত ইলেক্ট্ৰনিকভাৱে তথ্য বিনিময় কৰা হ’ব, আৰু এই তথ্যৰ ব্যৱহাৰ চুক্তিৰ উদ্দেশ্যত সীমাবদ্ধ থাকিব।

প্ৰথম অৱস্থাত ইয়াক দুয়োপক্ষই সহমতত উপনীত হোৱা নিৰ্বাচিত সংখ্যক সামগ্ৰীৰ ওপৰত পাইলট প্ৰকল্প হিচাপে ৰূপায়ণ কৰা হ’ব, আৰু পৰৱৰ্তী সময়ত ইয়াক সকলো সামগ্ৰীলৈ সম্প্ৰসাৰিত কৰা হ’ব।

স্বাক্ষৰ অনুষ্ঠানত সঞ্চালক প্ৰধান ভাণ্ডাৰীয়ে এই চুক্তিয়ে দুয়োখন দেশৰ শুল্ক প্ৰশাসনৰ মাজৰ সম্পৰ্ক আৰু অধিক শক্তিশালী কৰিব বুলি উল্লেখ কৰে। তেওঁ কয়, ৰপ্তানি সামগ্ৰী আগমনৰ পূৰ্বে তথ্য বিনিময় কৰিলে বিপদ বিশ্লেষণৰ সুবিধা হ'ব। ইয়াৰ দ্বাৰা বিপদজনক সামগ্ৰী নিৰীক্ষণ কৰাত সহায়ক হ'ব আৰু শুল্ক নিষ্পত্তি প্ৰক্ৰিয়া ক্ষিপ্ৰ হ'ব, যাৰ ফলত সৎ ব্যৱসায়ীসকলক সুবিধা প্ৰদান কৰা হ'ব।

ভাৰতীয় পক্ষৰ পৰা বিবেক চতুৰ্বেদীয়ে নেপালৰ সৈতে হোৱা এই গুৰুত্বপূৰ্ণ চুক্তিক লৈ সুখ প্ৰকাশ কৰি কয় যে ভাৰত ইয়াৰ আগতীয়া ৰূপায়ণৰ বাবে সম্পূৰ্ণ দায়বদ্ধ।

নেপাল চৰকাৰৰ মন্ত্ৰী পৰিষদৰ অনুমোদনৰ পিছত শুল্ক বিভাগে এই চুক্তি চূড়ান্ত কৰে। এই উপলক্ষে দুয়োখন দেশৰ শুল্ক বিভাগৰ জ্যেষ্ঠ বিষয়াসকল উপস্থিত থাকে।

हिन्दुस्थान समाचार / অৰৱিন্দ