ডাভোছ (ছুইজাৰলেণ্ড), ২২ জানুৱাৰী (হি.স.): সম্প্ৰতি আমেৰিকাই গ্ৰীণলেণ্ড অধিগ্ৰহণৰ বাবে ইউৰোপীয় দেশসমূহৰ ওপৰত শুল্ক আৰোপ কৰাৰ ভাবুকিৰ পৰা পিছুৱাই গৈছে ৰাষ্ট্ৰপতি ট্ৰাম্প। আৰ্কটিক নিৰাপত্তাৰ ক্ষেত্ৰত ভৱিষ্যতে চুক্তিৰ কাঠামোৰ ওপৰত নৰ্থ আটলাণ্টিক ট্ৰিটি অৰ্গেনাইজেচনৰ (নাটো) সচিব প্ৰধান মাৰ্ক ৰুটেৰ সৈতে একমত হোৱাৰ পিছতে এই সিদ্ধান্ত গ্ৰহণ কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে।

চিবিএছ নিউজৰ এক প্ৰতিবেদন অনুসৰি ৰাষ্ট্ৰপতি ট্ৰাম্পে কয় যে, যদি এই চুক্তি সম্পূৰ্ণ হয় তেন্তে ই আমেৰিকা আৰু নাটোৰ সকলো দেশৰ বাবে অতি ভাল হ'ব। এই বুজাবুজিৰ ভিত্তিত মই ১ ফেব্ৰুৱাৰীৰ পৰা কাৰ্যকৰী হ'বলগীয়া শুল্ক আৰোপ নকৰো। ইয়াত নাটোৰ মহাসচিবক লগ পোৱাৰ পিছত ৰাষ্ট্ৰপতিগৰাকীয়ে ট্ৰুথৰ সামাজিক পোষ্টত এই কথা লিখিছে।

চিএনবিচিৰ সৈতে হোৱা এক সাক্ষাৎকাৰত ৰাষ্ট্ৰপতি ট্ৰাম্পে কয় যে, আমাৰ হাতত চুক্তিৰ আকৃতি আছে। আমেৰিকাৰ বাবে আৰু তেওঁলোকৰ বাবেও ই এক অতি ভাল চুক্তি হ'ব। তেওঁ লগতে কয়, আমি আৰ্কটিক আৰু গ্ৰীণলেণ্ডৰ ওপৰত একেলগে কাম কৰিবলৈ ওলাইছো। আৰু তাৰ সৈতে শক্তিশালী নিৰাপত্তা আৰু অন্যান্য বিষয়ৰ সম্পৰ্ক আছে। ট্ৰাম্পে কয় যে এই ধৰণৰ চুক্তি মই কৰিব বিচাৰিছিলো।

ৱাশ্বিংটনৰ দুটা কূটনৈতিক সূত্ৰই কয় যে ৰাষ্ট্ৰপতিগৰাকীৰ এই পদক্ষেপে ১৯৫১ চনৰ আমেৰিকাৰ চুক্তিৰ বাহিৰেও গ্ৰীণলেণ্ডৰ নিৰাপত্তা বৃদ্ধি কৰিব। ইয়াৰ ফলত ৰাছিয়া আৰু চীনে গ্ৰীণলেণ্ডত স্থান লাভ কৰাত বাধা দিব। নাটোৰ মুখপাত্ৰ এলিছন হাৰ্টে কয় যে ট্ৰাম্প আৰু সচিব প্ৰধানৰ মাজত হোৱা বৈঠকখন অতি সাৰ্থক আছিল। এতিয়া ডেনমাৰ্ক, গ্রীনলেণ্ড আৰু আমেৰিকাৰ মাজত আলোচনা আগবাঢ়িব, যাৰ লক্ষ্য হ’ল ৰাছিয়া আৰু চীনে যাতে গ্ৰীণলেণ্ডত কেতিয়াও অৰ্থনৈতিক বা সামৰিক স্থান লাভ নকৰে।

ডেনমাৰ্কৰ বৈদেশিক মন্ত্ৰী লাৰ্ছ ল’কে ৰাছমুচেনেও এক বিবৃতি প্ৰকাশ কৰি কয় যে, “দিনটো ইতিবাচক ৰূপত শেষ হৈছে।” বিবৃতিটোত কোৱা হৈছে যে, আমি আদৰণি জনাইছো যে ৰাষ্ট্ৰপতি ট্ৰাম্পে গ্ৰীণলেণ্ডক বলপূৰ্বকভাৱে ল'বলৈ অস্বীকাৰ কৰি ইউৰোপৰ সৈতে বাণিজ্যিক যুদ্ধ বন্ধ কৰিছে। এতিয়া, আহক আমি বহি ডেনমাৰ্ক ৰাজ্যৰ ৰঙা ৰেখাক সন্মান জনাই আৰ্কটিকত আমেৰিকাৰ নিৰাপত্তাজনিত উদ্বেগক কেনেকৈ সমাধান কৰিব পাৰো সেই বিষয়ে বিবেচনা কৰোঁ।

ইয়াৰ পূৰ্বে দিনটোৰ বিশ্ব অৰ্থনৈতিক মঞ্চত বিশ্ব নেতাসকলৰ বাৰ্ষিক বৈঠকত ৰাষ্ট্ৰপতি ট্ৰাম্পে ভাষণ দি নিৰাপত্তাজনিত কাৰণত আমেৰিকাই অৰ্ধস্বায়ত্তশাসিত ডেনিছ ভূখণ্ডৰ ওপৰত নিয়ন্ত্ৰণ ৰাখিব লাগে বুলি জোৰ দিয়ে। কিন্তু প্ৰথমবাৰৰ বাবে তেওঁ দ্বীপটোৰ নিয়ন্ত্ৰণ দখল কৰিবলৈ সামৰিক শক্তিৰ ব্যৱহাৰ কৰাটো নুই কৰি কয় যে তেওঁ ইয়াৰ পৰিৱৰ্তে ভূখণ্ডটোৰ ওপৰত “তাৎক্ষণিক আলোচনা” বিচাৰে।

ইয়াৰ কিছুদিন পূৰ্বে ৰাষ্ট্ৰপতিগৰাকীয়ে ইউৰোপৰ আঠখন দেশৰ ওপৰত ১০ শতাংশ শুল্ক আৰোপ কৰাৰ ভাবুকি দিছিল। আমেৰিকাই দ্বীপটো অধিগ্ৰহণ কৰাত ব্যৰ্থ হ’লে শুল্ক ২৫ শতাংশলৈ বৃদ্ধি কৰাৰ হুংকাৰ দিয়ে। দীৰ্ঘদিনীয়া মিত্ৰ দেশসমূহৰ সৈতে বাণিজ্য যুদ্ধৰ ভাবুকিয়ে ইউৰোপৰ ৰাজধানীসমূহক জোকাৰি গৈছে। ডাভোছত গোট খোৱাৰ পূৰ্বে নেতাসকলে এই ভাবুকিৰ সৈতে মোকাবিলা কৰিবলৈ আৰু গ্ৰীনলেণ্ড আৰু ডেনমাৰ্কৰ স্বায়ত্তশাসন ৰক্ষাৰ বাবে হেতা-ওপৰা লগাই যথেষ্ট সফলতা লাভ কৰিছিল।

हिन्दुस्थान समाचार / অৰৱিন্দ