নতুন দিল্লী, ১৩ জানুৱাৰী (হি.স.)। ভাৰতীয় কাৰাটেৰ বাবে এই বছৰটো ঐতিহাসিক বছৰ বুলি প্ৰমাণিত হৈছে। জৰ্জিয়াৰ টিবিলিচিত অনুষ্ঠিত হোৱা ডব্লিউ কে এফ ছিৰিজ এ কাৰাটে চেম্পিয়নশ্বিপত আলিছা চুবুধিয়ে ব্ৰঞ্জৰ পদক লাভ কৰাটো স্পষ্ট প্ৰমাণ যে অমূলসুঁতিৰ ক্ৰীড়াই যদি সামঞ্জস্যপূৰ্ণ আৰু গাঁথনিগত সমৰ্থন লাভ কৰে তেন্তে আন্তঃৰাষ্ট্ৰীয় পৰ্যায়ত উল্লেখযোগ্য ফলাফল লাভ কৰিব পাৰে। এই সফলতাই ভাৰতীয় ক্ৰীড়া কৰ্তৃপক্ষৰ (ছাই) টাৰ্গেট এছিয়ান গেমছ গ্ৰুপ (টিএজিজি) আঁচনিৰ প্ৰভাৱৰ ওপৰতো আলোকপাত কৰে।

টেগ আঁচনিৰ অধীনত সহায় লাভ কৰা আলিছা সুবুধি কাৰাটে ১ - ছিৰিজ এ প্ৰতিযোগিতাত পদক লাভ কৰা প্ৰথমগৰাকী ভাৰতীয় মহিলা খেলুৱৈ হিচাপে পৰিগণিত হয়। ব্ৰঞ্জৰ পদকৰ মেচত ক্ৰ’ৱেচিয়ান প্ৰতিদ্বন্দ্বীক ৮-০ ব্যৱধানত পৰাস্ত কৰে। এই কৃতিত্ব ছাই-এ সৃষ্টি কৰা শক্তিশালী উচ্চ-কাৰ্যক্ষম পৰিৱেশ তন্ত্ৰৰ ফল, য’ত লক্ষ্য নিৰ্ধাৰণ কৰা আৰ্থিক সহায়, শীৰ্ষ পৰ্যায়ৰ প্ৰশিক্ষণ, আৰু নিবিড় ৰাষ্ট্ৰীয় শিবিৰ অন্তৰ্ভুক্ত কৰা হৈছে।

ৰাষ্ট্ৰীয় প্ৰশিক্ষক শিবিৰত এক নিৰ্ণায়ক সুবিধা

২০২৫ চনৰ নৱেম্বৰ-ডিচেম্বৰ মাহত লক্ষ্ণৌৰ এছ এ আই আঞ্চলিক কেন্দ্ৰত ছাইয়ে জ্যেষ্ঠ ৰাষ্ট্ৰীয় প্ৰশিক্ষক শিবিৰৰ আয়োজন কৰিছিল।এই ৪৫ দিনীয়া শিবিৰত এএনএছএফ আঁচনিৰ অধীনত ১.২ কোটি টকাৰে পুঁজিৰে অংশগ্ৰহণ কৰা হৈছিল, আৰু মুঠ ৪৮ জন খেলুৱৈয়ে অংশগ্ৰহণ কৰিছিল। শিবিৰত মেচ চিমুলেচন, কৌশলগত প্ৰস্তুতি, মানসিক শক্তি, আৰু আৰোগ্য প্ৰট’কলৰ ওপৰত গুৰুত্ব আৰোপ কৰা হৈছিল। আলিশাও এই শিবিৰৰ অংশ আছিল।

তেওঁৰ সফলতাৰ বিষয়ে আলিছাই কয় যে, “আমাক আৰ্থিক সহায় আগবঢ়োৱা আৰু ডব্লিউ কে এফ ছিৰিজ এৰ বাবে প্ৰস্তুতি চলাবলৈ লক্ষ্ণৌত এক উৎকৃষ্ট ৰাষ্ট্ৰীয় শিবিৰ আয়োজন কৰাৰ বাবে মই বিশেষভাৱে টেগক ধন্যবাদ জনাইছো।”

ৰাষ্ট্ৰীয় ফেডাৰেচনৰ অনুপস্থিতিত এছ এ আইৰ মূল পদক্ষেপ

কাৰাটেৰ বাবে স্বীকৃতিপ্ৰাপ্ত ৰাষ্ট্ৰীয় ক্ৰীড়া ফেডাৰেচনৰ অনুপস্থিতিৰ পিছতো এছ এ আইয়ে খেলুৱৈসকলৰ প্ৰস্তুতিত কোনো বাধাৰ সৃষ্টি হোৱাটো নিশ্চিত কৰিছিল। ইয়াৰ বাবে এছ এ আইয়ে এখন কাৰাটে আয়োজক সমিতি গঠন কৰে, যিয়ে বাছনি পৰীক্ষা, ৰাষ্ট্ৰীয় শিবিৰ, আন্তঃৰাষ্ট্ৰীয় প্ৰতিযোগিতাৰ সৈতে পৰিচিত হোৱাৰ কাম চম্ভালিছিল। ইয়াৰ ফলত খেলুৱৈসকলৰ বাবে সম্পূৰ্ণ সুৰক্ষিত প্ৰদৰ্শনৰ পথ নিশ্চিত হৈছিল।

স্বচ্ছ নিৰ্বাচন প্ৰক্ৰিয়া আৰু আন্তঃৰাষ্ট্ৰীয় মানদণ্ড

তদুপৰি সমিতিখনে শিলচৰৰ এন ই হু কেম্পাছৰ এছ এ আই প্ৰশিক্ষণ কেন্দ্ৰত অহা ১২ অক্টোবৰৰ পৰা ১৪ অক্টোবৰলৈ ছিনিয়ৰ শাখাৰ বাবে মুকলি ৰাষ্ট্ৰীয় বাছনি পৰীক্ষা অনুষ্ঠিত কৰে। আন্তঃৰাষ্ট্ৰীয় মানদণ্ড, এণ্টি-ডপিং নিয়ম, আৰু ভিডিঅ’ ভিত্তিক মূল্যায়ন ব্যৱস্থা অনুসৰি নিৰ্বাচন প্ৰক্ৰিয়াটো সম্পূৰ্ণ স্বচ্ছতাৰে কৰা হৈছিল।

এছিয়ান গেমছ ২০২৬ৰ দিশত এক শক্তিশালী পদক্ষেপ

এইবাৰৰ এছিয়ান গেমছৰ কাষ চাপি অহাৰ লগে লগে টেগ আঁচনি আৰু ছাইৰ দ্বাৰা পৰিচালিত ৰাষ্ট্ৰীয় শিবিৰৰ জৰিয়তে প্ৰদান কৰা অবিৰত সহায় ভাৰতৰ বাবে গুৰুত্বপূৰ্ণ বুলি প্ৰমাণিত হ’ব পাৰে—বিশেষকৈ এনে ক্ৰীড়াক্ষেত্ৰত য’ত দেশখনে এতিয়াও আন্তঃৰাষ্ট্ৰীয় পৰ্যায়ত বিশেষ প্ৰভাৱ পেলাব পৰা নাই। আলিছাৰ ব্ৰঞ্জৰ পদক কেৱল ব্যক্তিগত কৃতিত্বই নহয় ভাৰতীয় কাৰাটেৰ উজ্জ্বল ভৱিষ্যতৰ এক শক্তিশালী আভাসও প্ৰদান কৰে।

हिन्दुस्थान समाचार