নতুন দিল্লী, ১৩ জানুৱাৰী (হি.স.)। ৱেষ্ট ইণ্ডিজ ক্ৰিকেট ব’ৰ্ডে আফগানিস্তানৰ বিৰুদ্ধে তিনিখন খেলৰ টি-২০ শৃংখলাৰ বাবে ১৬ জনীয়া দল ঘোষণা কৰিছে । নিয়মীয়া টি-২০ আইৰ অধিনায়ক শ্বাই হোপৰ অনুপস্থিতিত ব্ৰেণ্ডন কিঙক অধিনায়ক হিচাপে নিযুক্তি দিয়া হৈছে। এই শৃংখলাৰ বাবে দললৈ ঘূৰি আহিছে দ্ৰুত বলাৰ শ্বামাৰ জোচেফ আৰু বিস্ফোৰক বেটছমেন ইভিন লুইছ।

ক্ৰিকেট ৱেষ্ট ইণ্ডিজৰ মতে, অধিনায়ক শ্বাই হোপৰ লগতে ৰষ্টন চেজ, আকিয়েল হুছেইন, আৰু শ্বাৰফেন ৰাদাৰফোৰ্ডক নিৰ্বাচিত কৰা হোৱা নাছিল কাৰণ তেওঁলোকে বৰ্তমান চলি থকা এছ এ ২০ লীগত নিয়োজিত হৈ আছে। ইফালে, আঘাতৰ বাবে আউট হোৱা শ্বামাৰ জোচেফ আৰু ইভিন লুইছক মেডিকেল ক্লিয়াৰেন্স লাভ কৰি দলত অন্তৰ্ভুক্ত কৰা হৈছে।

অৱশ্যে সতৰ্কতামূলক ব্যৱস্থা হিচাপে এই শৃংখলাৰ বাবে নিৰ্বাচিত হোৱা নাই বেগী বলাৰ আলজাৰী জোচেফ। ক্ৰিকেট ৱেষ্ট ইণ্ডিজে স্পষ্ট কৰি দিছে যে তেওঁৰ ফিটনেছক নিৰন্তৰ নিৰীক্ষণ কৰা হৈছে আৰু টি-২০ বিশ্বকাপৰ বাবে সম্ভাৱ্য নিৰ্বাচনৰ বাবে তেওঁৰ মূল্যায়ন অব্যাহত থাকিব।

ইফালে, ২০২৫ চনৰ কেৰিবিয়ান প্ৰিমিয়াৰ লীগ (চিপিএল)ৰ ব্ৰেকআউট খেলুৱৈ কুৱেণ্টিন চেম্পছনক প্ৰথমবাৰৰ বাবে আন্তঃৰাষ্ট্ৰীয় দলত অন্তৰ্ভুক্ত কৰা হৈছে। এই ছিৰিজৰ বাবে ৰভমেন পাৱেলৰ ঠাইত তেওঁক অন্তৰ্ভুক্ত কৰা হৈছে। জেছন হোল্ডাৰ আৰু ৰোমাৰিয়া শ্বেফাৰ্ডক কৰ্মবোজা ব্যৱস্থাপনাৰ বাবে জিৰণি দিয়া হৈছে।

আফগানিস্তানৰ বিৰুদ্ধে তিনিখন খেলৰ টি-২০ শৃংখলা ডুবাই আন্তঃৰাষ্ট্ৰীয় ক্ৰিকেট ষ্টেডিয়ামত ১৯ জানুৱাৰীৰ পৰা ২২ জানুৱাৰীলৈ অনুষ্ঠিত হ’ব। ৬ ফেব্ৰুৱাৰীৰ পৰা আৰম্ভ হ’বলগীয়া আইচিচি পুৰুষৰ টি-২০ বিশ্বকাপৰ প্ৰস্তুতিৰ বাবে এই ধাৰাবাহিকখন অতি গুৰুত্বপূৰ্ণ বুলি বিবেচিত হৈছে। ২৭ জানুৱাৰীৰ পৰা ৩১ জানুৱাৰীলৈ অনুষ্ঠিত হ’বলগীয়া দক্ষিণ আফ্ৰিকাৰ বিৰুদ্ধে টি-২০ শৃংখলাৰ পূৰ্বে ঘোষণা কৰা হ’ব ৱেষ্ট ইণ্ডিজৰ চূড়ান্ত বিশ্বকাপৰ দল।

আফগানিস্তানৰ বিৰুদ্ধে ৱেষ্ট ইণ্ডিজৰ টি-২০ দল

ব্ৰেণ্ডন কিং (অধিনায়ক), এলিক আথানেছ, কেছি কাৰ্টি, জনছন চাৰ্লছ, মেথিউ ফৰ্ড, জাষ্টিন গ্ৰীভছ, শ্বিমৰন হেটমায়াৰ, আমিৰ জাংগু, শ্বামাৰ জোচেফ, ইভিন লুইছ, গুডাকেশ মটি, খাৰী পিয়েৰ, কুৱেণ্টিন চেম্পছন, জেডেন ছিলছ, ৰেমন চিমণ্ডছ, শ্বামাৰ স্প্ৰিংগাৰ।

हिन्दुस्थान समाचार