নতুন দিল্লী, ১১ জানুৱাৰী (হি.স.)। প্ৰধানমন্ত্ৰী নৰেন্দ্ৰ মোদীয়ে দেওবাৰে কয় যে ভাৰতৰ যুৱক-যুৱতীসকলেও নিজৰ সাংস্কৃতিক শিপা শক্তিশালী কৰি তুলিছে। মোদীয়ে আজি শ্ৰীমদ্ বিজয়ৰত্ন সুন্দৰ সুৰিশ্বৰজী মহাৰাজৰ ৫০০ সংখ্যক গ্ৰন্থ উন্মোচনী অনুষ্ঠানত ভিডিঅ’ বাৰ্তাৰ জৰিয়তে এই মন্তব্য কৰে । এই গ্ৰন্থখনৰ বিষয়বস্তু হৈছে প্ৰেমনু বিশ্ব, বিশ্বানো প্ৰেম।
ভিডিঅ' বাৰ্তাটোত তেওঁ কয়, ভাৰত আজি বিশ্বৰ অন্যতম কম বয়সীয়া দেশ, য'ত ইয়াৰ যুৱক-যুৱতীসকলে এখন উন্নত ভাৰত গঢ়ি তুলিছে আৰু লগতে ইয়াৰ সাংস্কৃতিক শিপাও শক্তিশালী কৰিছে। মহাৰাজ চাহেবৰ দৰে সন্তসকলৰ পথ প্ৰদৰ্শন আৰু সাহিত্যই এই পৰিৱৰ্তনত গুৰুত্বপূৰ্ণ ভূমিকা পালন কৰে।
তেওঁ কয় যে এয়া কেৱল এখন কিতাপ নহয়, প্ৰেমৰ শক্তিৰ পৰিচয় দিয়া মন্ত্ৰ। বিশেষকৈ আজি যেতিয়া পৃথিৱীখনে বিভাজন আৰু সংঘাতৰ সৈতে যুঁজি আছে, তেনেস্থলত এই কিতাপখনৰ প্ৰয়োজন আগৰ তুলনাত অধিক হৈ পৰে।
প্ৰধানমন্ত্ৰী মোদীয়ে জৈন দৰ্শনৰ পথ প্ৰদৰ্শক নীতি পৰস্পৰপগ্ৰহ' জীৱনমৰ কথা উল্লেখ কৰি ইয়াৰ অৰ্থ ব্যাখ্যা কৰি কয় যে প্ৰতিটো জীৱন আন এটাৰ লগত সংযুক্ত। এই নীতি বুজি পালে আমাৰ দৃষ্টিভংগী ব্যক্তিৰ পৰা সামূহিক মংগললৈ স্থানান্তৰিত হয় আৰু আমি ব্যক্তিগত আকাংক্ষাৰ ওপৰলৈ উঠি সমাজ, ৰাষ্ট্ৰ আৰু মানৱতাৰ লক্ষ্যৰ বিষয়ে চিন্তা কৰিবলৈ আৰম্ভ কৰো।
তেওঁ কয় যে মহাৰাজৰ ৫০০ খন ৰচনা এক বিশাল সাগৰৰ দৰে, য’ত মানৱতাৰ সমস্যাৰ সহজ আৰু আধ্যাত্মিক সমাধান আগবঢ়োৱা অগণন চিন্তাৰ ৰত্ন সন্নিবিষ্ট কৰা হৈছে।
প্ৰধানমন্ত্ৰী মোদীয়ে আজি নৱকাৰ মন্ত্ৰ দিৱসৰ ঐতিহাসিক উপলক্ষে গ্ৰহণ কৰা ৯টা সংকল্পৰ পুনৰাবৃত্তি কৰে, যিবোৰ ৰাষ্ট্ৰ আৰু সমাজৰ উত্থানৰ বাবে অপৰিহাৰ্য। ইয়াৰ ভিতৰত পানী সংৰক্ষণ, মাতৃৰ নামত এজোপা গছ ৰোপণ কৰা, পৰিষ্কাৰ-পৰিচ্ছন্নতাৰ অভিযানক আগুৱাই নিয়া, স্থানীয় সামগ্ৰীৰ প্ৰচাৰ, ভাৰতীয় দৰ্শন গ্ৰহণ, প্ৰাকৃতিক কৃষি গ্ৰহণ, সুস্থ জীৱনশৈলী পালন, যোগ আৰু ক্ৰীড়াক নিজৰ জীৱনত সন্নিৱিষ্ট কৰা, দুখীয়াক সহায় কৰাৰ প্ৰতিশ্ৰুতি দিয়া আদি অন্যতম।
हिन्दुस्थान समाचार / অৰৱিন্দ
