নতুন দিল্লী, ১১ জানুৱাৰী (হি.স.)। ৰাষ্ট্ৰীয় স্বয়ংসেৱক সংঘ (আৰ এছ এছ)ৰ সৰসংঘচালক মোহন ভাগৱতে কয় যে ডা° কেশৱ বলিৰাম হেডগেৱাৰৰ জীৱন আৰএছএছৰ আত্মা আৰু ইয়াৰ মূল মন্ত্ৰ হৈছে ভাৰত সৰ্বোচ্চ । সময়ৰ লগে লগে আৰ এছ এছৰ পৰিৱৰ্তন হোৱা নাই বৰঞ্চ ইয়াৰ মূল মতাদৰ্শ, মূল্যবোধ, নীতিৰ সৈতে অহৰহ বিকশিত হৈ আছে।
দিল্লীৰ কেশৱ কুঞ্জত দেওবাৰে অনুষ্ঠিত এক বিশেষ অনুষ্ঠানত আৰ এছ এছৰ ১০০ বছৰীয়া ঐতিহাসিক যাত্ৰাৰ আধাৰত নিৰ্মিত ছবি শতকৰ প্ৰথমটো গীত ভগৱা হেয় অপনি পেহচান উন্মোচন কৰা হয়। আৰ এছ এছৰ সৰসংঘচালক ডা° মোহন ভাগৱতে আনুষ্ঠানিকভাৱে উন্মোচন কৰে গীতটি।
অনুষ্ঠানত ভাষণ দি ডা° ভাগৱতে কয় যে শতক ছবিখন আৰু ইয়াৰ গীতে আৰ এছ এছৰ দেশপ্ৰেম, আভ্যন্তৰীণ শক্তি, সেৱাৰ মনোভাৱক ফলপ্ৰসূভাৱে উজ্জ্বল কৰি তুলিছে। এই ছবিখনত আৰ এছ এছৰ এনে কাহিনীও আলোকপাত কৰা হৈছে যিবোৰ এতিয়াও জনসাধাৰণৰ কাষ চাপিব পৰা নাই। ডা° হেডগেৱাৰৰ মানুহক একত্ৰিত কৰাৰ এক অসাধাৰণ ক্ষমতা আছিল। জীৱনৰ কঠিনতম প্ৰত্যাহ্বানকো তেওঁ সমতাৰে সন্মুখীন হৈছিল আৰু এই গুণ এতিয়াও সংঘৰ কাৰ্য্যকলাপত স্পষ্ট হৈ পৰিছে। সংঘৰ মতাদৰ্শ স্থিৰ নহয় বৰঞ্চ সমাজ আৰু ৰাষ্ট্ৰৰ প্ৰয়োজন অনুযায়ী অহৰহ বিকশিত হৈ আছে।
তেওঁ কয় যে ভগৱা হেয় অপনি পেহচান গীতটোত গেৰুৱা ৰঙক কেৱল প্ৰতীক হিচাপে নহয়, ভাৰতৰ সভ্য চেতনা আৰু পৰিচয় হিচাপে উপস্থাপন কৰা হৈছে। গীতটোত কেশৰক ত্যাগ, তপস্যা, অনুশাসন, সেৱা আৰু আধ্যাত্মিক শক্তিৰ প্ৰতীক হিচাপে বৰ্ণনা কৰা হৈছে। ই সমাজক সামূহিক চেতনাৰে একত্ৰিত হৈ জাতীয় স্বাৰ্থৰ হকে কাম কৰিবলৈ আহ্বান জনায়।
প্ৰখ্যাত গায়ক সুখৱিন্দৰ সিঙে নিজৰ ওজস্বী কণ্ঠেৰে গীতটোক সাৱলীল কৰিছে। সুৰকাৰ ছনী ইন্দৰৰ শক্তিশালী সুৰ আৰু গীতিকাৰ ৰাকেশ কুমাৰ পালৰ ওজস্বী গীতে গীতটোক আবেগ আৰু আৱেগিক গভীৰতা প্ৰদান কৰিছে।
এই উপলক্ষে সুখৱিন্দৰ সিঙে কয় যে মোহন ভাগৱতৰ জৰিয়তে গীতৰ উন্মোচন তেওঁৰ বাবে এক গৌৰৱ আৰু আশীৰ্বাদৰ মুহূৰ্ত। এই গীতটো তেওঁৰ বাবে কেৱল পেছাদাৰী কাম নহয় বৰঞ্চ ৰাষ্ট্ৰৰ সেৱা। তেওঁ অন্তৰেৰে গাইছে আৰু আশা প্ৰকাশ কৰিছে যে ই প্ৰতিজন ভাৰতীয়ৰ হৃদয় স্পৰ্শ কৰিব।
উল্লেখযোগ্য যে ১৯২৫ চনত নাগপুৰত আৰম্ভ হোৱা ৰাষ্ট্ৰীয় স্বয়ংসেৱক সংঘৰ ১০০ বছৰীয়া যাত্ৰাক চিত্ৰিত কৰা হৈছে ‘শতক’ ছবিখনত। সংঘৰ সামাজিক, সাংস্কৃতিক, ৰাষ্ট্ৰীয় অৱদানৰ বিষয়ে বিতংভাৱে উপস্থাপন কৰা হৈছে ছবিখনত। আশীষ মলৰ পৰিচালনা আৰু বীৰ কাপুৰে প্ৰযোজনা কৰা ছবিখনৰ পৰিকল্পনাৰ দায়িত্বত আছে অনিল ডি আগৰৱালা। ছবিখনৰ সহ-প্ৰযোজক আশীষ তিৱাৰী। ছবিখন এ ডি এ ডিগ্ৰী এল এল পিয়ে প্ৰস্তুত কৰিছে।
হিন্দুস্থান সমাচাৰ / মনোজ কুমাৰ শইকীয়া
