ঢাকা, ১০ জানুৱাৰী (হি.স.)। বাংলাদেশৰ টেষ্ট অধিনায়ক নাজমুল হোছেইনে শুকুৰবাৰে কয় যে আইচিচি টি-২০ বিশ্বকাপক লৈ চলি থকা বিতৰ্কই খেলুৱৈসকলৰ ওপৰত গভীৰ মানসিক প্ৰভাৱ পেলাইছে আৰু দলটোৱে “সকলো ঠিকেই আছে” বুলি অভিনয় কৰিবলৈ চেষ্টা কৰিছে, আনহাতে বাস্তৱতা সম্পূৰ্ণ পৃথক।

ভাৰতত প্ৰস্তাৱিত টি-২০ বিশ্বকাপত বাংলাদেশৰ অংশগ্ৰহণ সন্দৰ্ভত অনিশ্চয়তা অব্যাহত আছে। বাংলাদেশ ক্ৰিকেট ব’ৰ্ডে ইংগিত দিছে যে যদিহে তেওঁলোকৰ মেচসমূহ ভাৰতৰ বাহিৰলৈ স্থানান্তৰিত নহয় তেন্তে দলটোৱে প্ৰতিযোগিতাখনত অংশগ্ৰহণ নকৰিবও পাৰে। এই পৰিস্থিতিয়ে খেলুৱৈসকলক মানসিকভাৱে ক্লান্ত কৰি তুলিছে, আৰু বহুতৰ নিদ্ৰা হৰণ হৈছে।

শুকুৰবাৰে সাংবাদিকৰ আগত নাজমুলে কয় যে, যদি আপুনি আমাৰ বিশ্বকাপৰ প্ৰদৰ্শন চায়, তেন্তে আমি কেতিয়াও ধাৰাবাহিকভাৱে ভাল ক্ৰিকেট খেলিব পৰা নাই। যোৱা বছৰ আমি ভাল খেলিছিলো, কিন্তু তাতকৈ ভাল সুযোগ আছিল, কিন্তু আমি সেইবোৰৰ মূলধন ল'ব পৰা নাছিলো। তিনিটা বিশ্বকাপৰ অভিজ্ঞতাৰ ভিত্তিত মই ক'ব পাৰো যে প্ৰতিটো বিশ্বকাপৰ পূৰ্বে কিবা নহয় কিবা এটা বা আনটো ঘটে আৰু ইয়াৰ প্ৰভাৱ নিশ্চিতভাৱে পৰে।

তেওঁ স্পষ্টকৈ ক'লে, আমি দেখুৱাবলৈ চেষ্টা কৰোঁ যে আমি একো গুৰুত্ব নিদিওঁ আৰু আমি সম্পূৰ্ণ পেছাদাৰী ক্ৰিকেটাৰ। আপোনালোকেও বুজি পায় যে আমি অভিনয় কৰিছো—এয়া সহজ নহয়।

নাজমুলে আৰু কয় যে খেলুৱৈসকলে সকলো অসুবিধাৰ মাজতো দলৰ হৈ ভাল প্ৰদৰ্শন কৰিবলৈ চেষ্টা কৰে।

তেওঁ লগতে কয়, প্লেয়াৰসকলে এই সকলোবোৰ বিক্ষিপ্ততা আঁতৰাই দলৰ হৈ খেলিবলৈ চেষ্টা কৰে। স্পষ্টভাৱে এইবোৰ নহ'লে ভাল হ'ব, কিন্তু বহু কথা আমাৰ নিয়ন্ত্ৰণৰ বাহিৰত।

বিশ্বকাপৰ সন্দৰ্ভত তেওঁ কয় যে যদি আমি সঠিক মানসিকতাৰে বিশ্বকাপলৈ যাওঁ, আৰু আমি য’তেই খেলো, তেন্তে আমাৰ গুৰুত্ব দলটোৰ বাবে আমাৰ শ্ৰেষ্ঠখিনি দিয়াত হ’ব লাগে।’

এই সময়ছোৱাত বাংলাদেশ ক্ৰিকেট ব’ৰ্ডৰ সঞ্চালক এম নাজমুল ইছলামে ছ’চিয়েল মিডিয়াত দিয়া মন্তব্যক লৈও নাজমুলে তীব্ৰ অসন্তুষ্টি প্ৰকাশ কৰে। বিচিবিৰ সঞ্চালকগৰাকীয়ে প্ৰাক্তন অধিনায়ক তামিম ইকবালক “ভাৰতীয় এজেণ্ট” বুলি উল্লেখ কৰিছিল, যাৰ বাবে ব্যাপক সমালোচনাৰ সন্মুখীন হৈছিল।

নাজমুলে কয়, এয়া অতি দুখৰ কথা। এনে শব্দ ব্যৱহাৰ কৰা হৈছিল এজন ক্ৰিকেটাৰৰ বিৰুদ্ধে, বিশেষকৈ এজন প্ৰাক্তন অধিনায়ক তথা বাংলাদেশৰ অন্যতম সফল খেলুৱৈৰ বিৰুদ্ধে, যাক আমি চাই ডাঙৰ হৈছো।

তেওঁ আৰু কয়, এজন খেলুৱৈ হিচাপে আমি সন্মান আশা কৰোঁ, সেয়া প্ৰাক্তন অধিনায়ক হওক, নিয়মীয়া খেলুৱৈ হওক বা কম সফল কোনোবাই হওক। দিনৰ শেষত প্ৰতিজন ক্ৰিকেটাৰে সন্মান বিচাৰে।

নাজমুলে বিচিবিক প্ৰশ্ন কৰি কয় যে, আটাইতকৈ আঘাতজনক কথাটো হ'ল ক্ৰিকেট ব'ৰ্ড আমাৰ অভিভাৱক হোৱাৰ কথা। আমি তেওঁলোকৰ পৰা সুৰক্ষা আৰু সমৰ্থন আশা কৰোঁ। এজন খেলুৱৈ হিচাপে মই এনে মন্তব্য মানি ল'ব নোৱাৰো।

পৰিয়ালৰ উদাহৰণেৰে এই কথা বুজাই তেওঁ কয়, পিতৃ-মাতৃয়ে ৰাজহুৱাভাৱে নহয়, ঘৰতে সংশোধন কৰে। গতিকে আমাৰ অভিভাৱক হ'বলগীয়া কোনোবা এজনৰ এনে মন্তব্য অতি গ্ৰহণযোগ্য নহয়। এজন খেলুৱৈ হিচাপে মই সেইবোৰ সম্পূৰ্ণৰূপে নাকচ কৰো।

हिन्दुस्थान समाचार / মনোজ কুমাৰ শইকীয়া