নতুন দিল্লী, ২৬ ছেপ্টেম্বৰ (হি.স.)। কৰ্মচাৰী ৰাজ্যিক বীমা নিগমৰ ই এছ আই আঁচনিত জুলাই মাহত কমেও ২০.৩৬ লাখ নতুন কৰ্মচাৰীয়ে যোগদান কৰে। এয়া জুন মাহত নামভৰ্তি কৰা ১৯.৩৭ লাখ নতুন কৰ্মচাৰীৰ তুলনাত ৪.৮৬ শতাংশ বৃদ্ধি।

শুকুৰবাৰে শ্ৰম আৰু নিয়োগ মন্ত্ৰালয়ে এক বিবৃতিত উল্লেখ কৰিছে যে জুলাই মাহত ২০.৩৬ লাখ নতুন পঞ্জীয়নৰ ভিতৰত ৪৮.৩৭ শতাংশই ২৫ বছৰৰ তলৰ যুৱক-যুৱতী। ই এছ আই চিয়ে প্ৰকাশ কৰা পে-ৰোলৰ তথ্য অনুসৰি ২০২৫ চনৰ জুলাই মাহৰ ভিতৰত ই এছ আই আঁচনিৰ অধীনত ৩১,১৪৬টা নতুন প্ৰতিষ্ঠানক সামাজিক সুৰক্ষাৰ আওতালৈ অনা হৈছে, যাৰ ফলত অধিক শ্ৰমিকৰ সামাজিক সুৰক্ষা নিশ্চিত কৰা হৈছে। মন্ত্ৰালয়ৰ তথ্য অনুসৰি ই এছ আই আঁচনিৰ অধীনত সংযোজন কৰা নতুন কৰ্মচাৰীৰ ভিতৰত ২৫ বছৰ বয়সলৈকে বয়সৰ গোটটোৱে ৪৮ শতাংশতকৈ অধিক কৰ্মচাৰীক সামৰি লৈছে।

তথ্য অনুসৰি জুলাই মাহত যোগ কৰা ২০.৩৬ লাখ কৰ্মচাৰীৰ ভিতৰত ৯.৮৫ লাখ কৰ্মচাৰী ২৫ বছৰ পৰ্যন্ত বয়সৰ গোটত আছিল, যিটো মুঠ নামভৰ্তিৰ প্ৰায় ৪৮.৩৭%। কৰ্মচাৰী ৰাজ্যিক বীমা নিগমে প্ৰকাশ কৰা পে-ৰোলৰ তথ্য অনুসৰি জুলাই মাহত যোগ কৰা মুঠ ২০,৩৬,০০৮ জন কৰ্মচাৰীৰ ভিতৰত মহিলা সদস্যৰ সংখ্যা ৪.৩৩ লাখ পঞ্জীয়ন। ইয়াৰ উপৰিও জুলাই মাহত ই এছ আই চি আঁচনিৰ অধীনত মুঠ ৮৮ জন হিজড়াও পঞ্জীয়ন কৰা হৈছিল।

শ্ৰম আৰু নিয়োগ মন্ত্ৰালয়ে উল্লেখ কৰিছে যে ই এছ আই চি আঁচনিখন ভাৰতৰ এক সামাজিক সুৰক্ষা আঁচনি যিয়ে কৰ্মচাৰীসকলক অসুস্থতা, প্ৰসূতি, অক্ষমতা, আৰু কৰ্মসংক্ৰান্তীয় আঘাতৰ ফলত মৃত্যুৰ ক্ষেত্ৰত আৰ্থিক আৰু চিকিৎসাৰ সুবিধা প্ৰদান কৰে। ইয়াৰ উপৰিও বীমাকৃত ব্যক্তি আৰু তেওঁলোকৰ পৰিয়ালক চিকিৎসা সেৱা আগবঢ়ায়। এই আঁচনিখন নিৰ্দিষ্ট সংখ্যক কৰ্মচাৰী থকা কাৰখানা আৰু অন্যান্য কিছুমান প্ৰতিষ্ঠান, যেনে দোকান, হোটেল, শিক্ষানুষ্ঠানৰ ক্ষেত্ৰত প্ৰযোজ্য।

हिन्दुस्थान समाचार / অৰৱিন্দ