মস্কো, ৩০ আগষ্ট (হি.স.)। ৰাষ্ট্ৰপতি ভ্লাদিমিৰ পুটিনে কয় যে ৰাছিয়া আৰু চীনে দুয়োখন ৰাষ্ট্ৰৰ সমৃদ্ধিৰ বাবে একেলগে কাম কৰি যাব। পুটিনে কয় যে চীন ভ্ৰমণৰ সময়ত দুয়োখন দেশৰ বাবে পাৰস্পৰিকভাৱে লাভজনক সহযোগিতাৰ নতুন সম্ভাৱনা আৰু ব্যৱস্থাৰ ওপৰত গভীৰ আলোচনা হ’ব।
ৰাছিয়াৰ ৰাষ্ট্ৰপতি পুটিনে চীনলৈ যোৱাৰ প্ৰাকক্ষণত সংবাদ সংস্থা ছিনহুয়াক দিয়া এক লিখিত সাক্ষাৎকাৰত এইদৰে কয়। চীনৰ টিয়ানজিন চহৰত অনুষ্ঠিত হ’বলগীয়া চাংহাই সহযোগিতা সংস্থাৰ সন্মিলন আৰু বেইজিঙত চীনৰ স্বাধীনতা দিৱসৰ সামৰিক পেৰেডত অংশগ্ৰহণ কৰিব পুটিনে।
সাক্ষাৎকাৰত পুটিনে মে’ মাহত চীনৰ ৰাষ্ট্ৰপতি ছি জিনপিঙৰ ৰাছিয়া ভ্ৰমণক এক বৃহৎ সফলতা বুলি অভিহিত কৰে। তেওঁ কয় যে ছি এজন দৃঢ় ইচ্ছাশক্তিৰ মানুহ। তেওঁ কৌশলগত দৃষ্টিভংগী আৰু বিশ্ব দৃষ্টিভংগীৰে সমৃদ্ধ। জাতীয় স্বাৰ্থৰ প্ৰতি তেওঁৰ দায়বদ্ধতা অদম্য। ৰাষ্ট্ৰপতি পুটিনে জোৰ দি কয় যে, “ৰাছিয়াই কেতিয়াও পাহৰিব নোৱাৰে যে ১৯৪১-১৯৪২ চনৰ আটাইতকৈ কঠিন মাহবোৰত চীনে জাপানক ছোভিয়েট ইউনিয়নৰ পিঠিত ছুৰীৰে আঘাত কৰাত বাধা দিছিল।”
তেওঁ কয় যে দ্বিতীয় বিশ্বযুদ্ধৰ ইতিহাস বিকৃত কৰাৰ যিকোনো প্ৰচেষ্টাক ৰাছিয়া আৰু চীনে তীব্ৰ গৰিহণা দিয়ে। পুটিনে কয় যে সেই যুদ্ধৰ ফলাফল ৰাষ্ট্ৰসংঘৰ চনদ আৰু অন্যান্য আন্তঃৰাষ্ট্ৰীয় চুক্তিত সন্নিবিষ্ট কৰা হৈছে। পুটিনে কয় যে ৰাছিয়া আৰু চীনৰ মাজত অৰ্থনৈতিক সম্পৰ্ক অভূতপূৰ্ব স্তৰত উপনীত হৈছে। ২০২১ চনৰ পৰা দ্বিপাক্ষিক বাণিজ্য প্ৰায় ১০০ বিলিয়ন ডলাৰ বৃদ্ধি পাইছে।
চীন বহু দূৰলৈকে ৰাছিয়াৰ আগশাৰীৰ অংশীদাৰ। ৰাছিয়া আৰু চীনৰ মাজত লেনদেন প্ৰায় সম্পূৰ্ণৰূপে ৰুবল আৰু ইউয়ানত হয়।
ৰাষ্ট্ৰপতি পুটিনে কয় যে ৰাছিয়াই চীনত তেল আৰু গেছৰ প্ৰধান ৰপ্তানিকাৰক হিচাপে নিজৰ স্থান দৃঢ়ভাৱে বজাই ৰাখিছে। চীনৰ গাড়ী ৰপ্তানিৰ ক্ষেত্ৰত ৰাছিয়া বিশ্বৰ অন্যতম আগশাৰীৰ বজাৰ বুলিও তেওঁ কয়। পুটিনে কয় যে ২০৩০ চনৰ ভিতৰত দুয়োখন দেশৰ মাজত সাংস্কৃতিক বিনিময়ৰ ওপৰত গুৰুত্ব আৰোপ কৰা ১০০ৰো অধিক প্ৰকল্পই গঢ় লৈ উঠিব।
हिन्दुस्थान समाचार / মনোজ কুমাৰ শইকীয়া
