কলম্বো, ৩০ আগষ্ট (হি.স.)। শ্ৰীলংকাৰ চাৰিজন বিশিষ্ট বৌদ্ধ সন্ন্যাসীয়ে থাইলেণ্ড আৰু কম্বোডিয়াৰ মাজত শান্তিৰ আহ্বান জনাইছে। এই সন্দৰ্ভত এখন পত্ৰ আজি দেশৰ মন্ত্ৰী বিজিতা হেৰাথৰ হাতত অৰ্পণ কৰা হৈছে। ইয়াত থাইলেণ্ড আৰু কম্বোডিয়াৰ মাজত শান্তি আৰু সম্প্ৰীতিৰ বাবে আহ্বান জনোৱা হৈছে। এই পত্ৰখনত বৌদ্ধ সন্ন্যাসী থিব্বোটুৱাৱে শ্ৰী সিদ্ধাৰ্থ সুমংগল মহানায়ক থেৰো (মালৱাট্টা অধ্যায়), ৱাৰকাগোডা ধৰ্মসিদ্ধি শ্ৰী জ্ঞানৰাথ্ন মহানায়ক থেৰো (অসগিৰিয়া অধ্যায়), মাকুলেভে শ্ৰী বিমলা মহানায়ক থেৰো (ৰমন্ন পন্থা) আৰু কৰগোডা উয়াংগোডা মৈত্ৰী মূৰ্তি মহানায়ক থেৰো (আমৰাপুৰ পন্থা)ৰ স্বাক্ষৰ আছে।
দুয়োখন দেশৰ মাজত সৃষ্টি হোৱা সংঘাতক লৈ গভীৰ উদ্বেগ প্ৰকাশ কৰিছে পত্ৰখনত। ধৰ্মীয় আৱেগক সংঘাতৰ বাবে ব্যৱহাৰ কৰাটো বুদ্ধৰ শিক্ষাৰ বিৰোধী বুলি পত্ৰখনত গুৰুত্ব আৰোপ কৰা হৈছে। একে সময়তে দুয়োখন চৰকাৰৰ লগতে থাইলেণ্ড আৰু কম্বোডিয়াৰ ধৰ্মগুৰু আৰু অনুগামীসকলক শান্তিপূৰ্ণভাৱে মতানৈক্য সমাধান কৰি আৰু সমন্বয়ৰ প্ৰসাৰ ঘটাই বৌদ্ধ ধৰ্মৰ মহান ঐতিহ্য বজাই ৰাখিবলৈ আহ্বান জনোৱা হৈছিল।
পত্ৰখনত লিখা আছিল, বুদ্ধৰ অনুগামী হিচাপে তেওঁৰ শান্তি আৰু অহিংসাৰ শিক্ষা যাতে পালন কৰা হয় সেয়া নিশ্চিত কৰাটো আমাৰ সৰ্বোচ্চ কৰ্তব্য। হিংসা প্ৰতিৰোধ আৰু সহাৱস্থানৰ প্ৰসাৰত সন্ন্যাসীৰ গুৰুত্বপূৰ্ণ ভূমিকা ইতিহাসে দেখুৱাইছে বুলি পত্ৰখনত সোঁৱৰাই দিয়া হৈছে।
মন কৰিবলগীয়া যে থাইলেণ্ড আৰু কম্বোডিয়াৰ মাজত বিবাদৰ মূল কাৰণ হ’ল দুয়োখন দেশৰ সীমান্তত অৱস্থিত প্ৰাচীন মন্দিৰৰ মালিকীস্বত্ব, বিশেষকৈ প্ৰেহ ভিহেয়াৰ মন্দিৰ আৰু ইয়াৰ আশে-পাশে থকা মাটি। এই বিবাদ ১৯৫০ চনৰ পৰাই অব্যাহত আছে। ২০০৮ চনত এই মন্দিৰটো ইউনেস্ক’ৰ বিশ্ব ঐতিহ্য ক্ষেত্ৰৰ তালিকাত অন্তৰ্ভুক্ত কৰা হৈছে। এই মন্দিৰসমূহ ঐতিহাসিকভাৱে গুৰুত্বপূৰ্ণ। দুয়োখন দেশেই তেওঁলোকৰ ওপৰত সাংস্কৃতিক আৰু জাতীয় নিয়ন্ত্ৰণ দাবী কৰে।
১৯৬২ চনত আন্তঃৰাষ্ট্ৰীয় ন্যায়ালয়ে প্ৰেহ ভিহেয়াৰ মন্দিৰক কম্বোডিয়াৰ বুলি ঘোষণা কৰিছিল যদিও ইয়াৰ চাৰিওফালে থকা মাটিক লৈ হোৱা বিবাদৰ সমাধান হ’ব পৰা নাছিল। এই বিবাদে চলিত বৰ্ষৰ জুলাই মাহত ভয়ংকৰ ৰূপ ধাৰণ কৰিছিল। থাইলেণ্ড আৰু কম্বোডিয়াৰ সৈন্যৰ মাজত তীব্ৰ যুদ্ধ হৈছিল। এই যুদ্ধত কেইবা ডজন লোক নিহত হোৱাৰ লগতে লাখ লাখ লোক স্থানচ্যুত হয়। দুয়োখন দেশে সীমান্তত সামৰিক উপস্থিতি বৃদ্ধি কৰাৰ লগতে ইজনে সিজনৰ ওপৰত সীমান্তৰ নিষেধাজ্ঞাও আৰোপ কৰিছে।
हिन्दुस्थान समाचार / মনোজ কুমাৰ শইকীয়া
