নতুন দিল্লী, ১৮ আগষ্ট (হি.স.)। ৰাজ্যসভাত সোমবাৰে ধ্বনিভোটত গৃহীত হয় ভাৰতীয় বন্দৰ বিধেয়ক, ২০২৫। এই বিধেয়কখন ইতিমধ্যে লোকসভাত গৃহীত হৈছে। এই বিধেয়কখনে বন্দৰ সম্পৰ্কীয় আইনসমূহ শক্তিশালী কৰাৰ, সংহত বন্দৰ উন্নয়নক প্ৰসাৰিত কৰা, বাণিজ্যৰ সুবিধা প্ৰদান কৰা আৰু ভাৰতৰ উপকূলৰ সৰ্বোচ্চ ব্যৱহাৰ নিশ্চিত কৰাৰ চেষ্টা কৰিছে। বিধেয়কখন গৃহীত হোৱাৰ পাছত মঙলবাৰে পুৱা ১১ বজালৈ ৰাজ্যসভাৰ কাম-কাজ স্থগিত ৰখা হয়।
বিহাৰৰ ভোটাৰ তালিকাৰ বিশেষ নিবিড় পুনৰীক্ষণ (এছআইআৰ)ক লৈ সদনত হুলস্থুলৰ সৃষ্টি কৰে বিৰোধী সদস্যসকলে। ৰাজ্যসভাৰ বিৰোধী দলপতি মল্লিকাৰ্জুন খৰ্গে “ভোট চুৰি”ৰ অভিযোগ উত্থাপন কৰি কয় যে ভাৰতৰ নিৰ্বাচন আয়োগে বিৰোধী দলসমূহক “ভাবুকি” দিছে। সভাপতিৰ আসনৰ পৰা সাস্মিত পাত্ৰই কয় যে এই বিষয়টো উল্লেখিত কাৰ্যসূচীৰ সৈতে জড়িত নহয়। এই সন্দৰ্ভত বিৰোধীৰ অভিযোগৰ প্ৰতি সঁহাৰি জনাই সদনৰ নেতা জে পি নড্ডাই কয় যে চৰকাৰে যিকোনো বিষয়ৰ ওপৰত আলোচনা কৰিবলৈ সাজু, কিন্তু বৰ্তমান এই বিধেয়কখনৰ ওপৰত আলোচনা চলি আছে। বিৰোধীৰ আচৰণৰ বাবে ৬৯ ঘণ্টা অপচয় হোৱা বুলিও নড্ডাই কয়। দেশবাসীয়ে এই দায়িত্বহীন আচৰণৰ ওপৰত চকু ৰাখিছে। বিৰোধীয়ে বিতৰ্ক ভাল নাপায়, বৰঞ্চ অৰাজকতাবাদ, বাধাবাদ ভাল পায়।
ইফালে বিৰোধীয়ে প্ৰতিবাদ অব্যাহত ৰাখিছে। বিহাৰৰ ভোটাৰ তালিকাৰ বিশেষ নিবিড় সংশোধনৰ সন্দৰ্ভত আলোচনাৰ দাবীত বিৰোধীয়ে সদনৰ পৰা ওলাই আহিছিল। ডি এম কেৰ আপত্তি মাফিয়া শব্দটোৰ ওপৰত বিধেয়কখনৰ ওপৰত আলোচনাৰ সময়ত তামিলনাডুৰ ডি এম কে চৰকাৰক লৈ এ আই এ ডি এম কেৰ সাংসদ থাম্বিদুৰাইয়ে কৰা মন্তব্যৰ বাবে সদনত কিছু সময়ৰ বাবে হুলস্থুলৰ সৃষ্টি হয়। এআইএডিএমকেৰ সাংসদ থাম্বিদুৰাইয়ে ভাৰতীয় বন্দৰ বিধেয়ক, ২০২৫ সন্দৰ্ভত আলোচনাৰ সময়ত অভিযোগ কৰে যে ডিএমকে ক্ষমতালৈ অহাৰ পিছৰে পৰা তামিলনাডুলৈ ড্ৰাগছ সৰবৰাহ হৈ আছে। ডি এম কে চৰকাৰে কোনো ব্যৱস্থা গ্ৰহণ কৰা নাই। ৰাজ্যৰ বন্দৰৰ পৰা জব্দ কৰা ড্ৰাগছসমূহ ডি এম কেৰ লোকে চলাই আছে, কিন্তু কোনো ব্যৱস্থা গ্ৰহণ কৰা হোৱা নাই। ডি এম কে চৰকাৰে বন্দৰসমূহৰ “অপব্যৱহাৰ” কৰাৰ অভিযোগ উত্থাপন কৰি তেওঁ কয় যে এনে কাৰ্যত “ডি এম কে মাফিয়া” জড়িত হৈ আছে। ইফালে ডি এম কেৰ সকলো সাংসদ সদনত আহি হুলস্থুলৰ সৃষ্টি কৰিবলৈ ধৰিলে।
সভাপতিৰ দায়িত্ব বহন কৰি থকা সাস্মিত পাত্ৰই মাফিয়া শব্দটো ব্যৱহাৰ কৰাত আপত্তি কৰি ইয়াক অসংসদীয় বুলি অভিহিত কৰে।
ডি এম কেৰ সদস্য তিৰুচি শিৱই এটা পইণ্ট অৱ অৰ্ডাৰ উত্থাপন কৰি থাম্বিদুৰাইৰ এই মন্তব্যত আপত্তি কৰে। তেওঁ কয় যে তামিলনাডু চৰকাৰক লৈ হোৱা আলোচনা বিষয়টোৰ প্ৰেক্ষাপটত অপ্রাসংগিক৷ ইয়াক সদনৰ কাৰ্য্যবিধিৰ পৰা আঁতৰাই পেলাব লাগে। ইয়াৰ প্ৰতি সভাপতি অধ্যক্ষ পাত্ৰই কয় যে উপ অধ্যক্ষই ইয়াৰ ওপৰত সিদ্ধান্ত ল’ব।
অৱশ্যে থাম্বিদুৰাইয়ে কয় যে তেওঁৰ মন্তব্য বন্দৰৰ পৰিচালনাৰ সৈতে জড়িত আৰু সেয়েহে তেওঁৰ মন্তব্য প্ৰাসংগিক। কংগ্ৰেছৰ কোনো নীতি নাছিল।
বন্দৰ, জাহাজ আৰু জলপথ মন্ত্ৰী সৰ্বানন্দ সোণোৱালে বিধেয়কখনৰ ওপৰত হোৱা চৰ্চাৰ ওপৰত উত্তৰ দি কয় যে এই প্ৰস্তাৱিত আইনখনে বন্দৰ পৰিচালনাৰ বাবে অনুশাসন, বহনক্ষম পদ্ধতিৰ প্ৰসাৰ ঘটাব আৰু কেন্দ্ৰ আৰু ৰাজ্য চৰকাৰে যাতে এই খণ্ডত একেলগে কাম কৰিব পাৰে সেয়া নিশ্চিত কৰিব। বিৰোধীৰ ওপৰত কটাক্ষ কৰি তেওঁ কয় যে কংগ্ৰেছ দশক দশক ধৰি ক্ষমতাত আছিল, কিন্তু ইয়াৰ বাবে তেওঁলোকৰ কোনো নীতি নাছিল। কংগ্ৰেছে এই মন্ত্ৰালয়ৰ প্ৰতি গুৰুত্ব নিদিলে, গতিকে তেওঁলোকে মাত্ৰ এটা আইনহে বনাব পাৰিলে। তেওঁ তুলনা কৰিলে যে বৰ্তমানৰ চৰকাৰখনে এঘাৰ বছৰত এঘাৰটা আইন প্ৰৱৰ্তন কৰাৰ বিপৰীতে কংগ্ৰেছ নেতৃত্বাধীন চৰকাৰে ২০০৪ চনৰ পৰা ২০১৪ চনৰ ভিতৰত মাত্ৰ এখন আইন প্ৰৱৰ্তন কৰিছিল।
তেওঁ যুক্তি দিছিল, নীতিসমূহ পৰিৱেশ অনুকূল আৰু জনসমৰ্থক হ'লেহে সংস্কাৰ সম্ভৱ হ'ব। সোণোৱালে কয় যে এই বিধেয়কখনে দেশৰ বন্দৰ আৰু জাহাজ চলাচল শক্তিশালী কৰিব।
তেওঁ প্ৰস্তাৱিত আইনখনৰ পাঁচটা গুৰুত্বপূৰ্ণ বিধানৰ তালিকা প্ৰস্তুত কৰে। য'ত সংহতি - দীৰ্ঘম্যাদী পৰিকল্পনা আৰু তথ্যভিত্তিক সিদ্ধান্ত গ্ৰহণৰ সুবিধা প্ৰদান, দ্ৰুত, স্বচ্ছ সমাধান প্ৰদান কৰিবলৈ বিবাদ নিষ্পত্তি ব্যৱস্থাৰ প্ৰৱৰ্তন, দক্ষ তথ্য বিনিময় আৰু সংগ্ৰহ সক্ষম কৰিবলৈ ডিজিটেল সংহতি আদি অন্তৰ্ভুক্ত।
ভাৰতীয় বন্দৰ বিধেয়ক কি এই বিধেয়কখন ভাৰতৰ বন্দৰসমূহৰ সৈতে জড়িত আইনসমূহক একত্ৰিত কৰা, বন্দৰ উন্নয়ন সুশৃংখলিত কৰা, ব্যৱসায় কৰাত সহজতা বৃদ্ধি কৰা আৰু দেশৰ সাগৰীয় উপকূলৰ উন্নত ব্যৱহাৰ নিশ্চিত কৰাৰ লক্ষ্যৰে অনা হৈছে। এই বিধেয়কত ডাঙৰ বন্দৰৰ বাহিৰে আন বন্দৰৰ বাবে ৰাজ্যিক সামুদ্ৰিক ব’ৰ্ড গঠনৰ ব্যৱস্থা কৰা হৈছে। লগতে বন্দৰ খণ্ডৰ উন্নয়নৰ বাবে সামুদ্ৰিক ৰাজ্যিক উন্নয়ন পৰিষদ গঠনৰ ব্যৱস্থা আছে। প্ৰদূষণ, দুৰ্যোগ, জৰুৰীকালীন, নিৰাপত্তা, নেভিগেচন আৰু ডাটা মেনেজমেণ্টৰ ক্ষেত্ৰতো বন্দৰসমূহত উন্নত ব্যৱস্থা কৰাৰ ব্যৱস্থা কৰা হৈছে। ইয়াৰ উপৰিও ভাৰতৰ আন্তঃৰাষ্ট্ৰীয় দায়িত্ব পালন, বন্দৰ সুৰক্ষা আৰু বন্দৰ সম্পৰ্কীয় বিবাদ নিষ্পত্তিৰ বাবে বিবাদ নিষ্পত্তিৰ ব্যৱস্থা গঢ়ি তোলাৰ ব্যৱস্থাও আছে।
হিন্দুস্থান সমাচাৰ / মনোজ কুমাৰ শইকীয়া
