শ্বিলং, ২৫ জুলাই (হি.স.)। স্থানীয় প্ৰিয় দল শ্বিলং লাজং এফ চিয়ে শনিবাৰে ১৩৪ সংখ্যক ইণ্ডিয়ান অইল ডুৰাণ্ড কাপৰ গ্ৰুপ ই উদ্ধোধনী মেচত শ্বিলঙৰ জৱাহৰলাল নেহৰু ষ্টেডিয়ামত মালয়েছিয়ান সশস্ত্ৰ বাহিনী (এ টি এম এফ এ)ৰ বিৰুদ্ধে খেলিব । বিয়লি ৪:০০ বজাৰ পৰা আৰম্ভ হ’ব মেচখন, তাৰ পূৰ্বে মুকলি অনুষ্ঠান অনুষ্ঠিত হ’ব। ইয়াৰ উদ্বোধন কৰিব মেঘালয়ৰ মুখ্যমন্ত্ৰী কনৰাড চাংমাই।

স্থানীয় আই লীগৰ দল শ্বিলং লাজঙে ২০২৪ চনৰ ডুৰাণ্ড কাপ অভিযানৰ গতি আগুৱাই নিবলৈ চেষ্টা কৰিব, য’ত তেওঁলোকে কোৱাৰ্টাৰ ফাইনেলত ইষ্ট বেংগলক স্তম্ভিত কৰিছিল যদিও ছেমি ফাইনেলত অৱশেষত চেম্পিয়ন নৰ্থইষ্ট ইউনাইটেড এফ চিৰ হাতত পৰাস্ত হৈছিল। ৰেড ড্ৰেগনৰ বৰ্তমানৰ দলটোত স্থানীয় যুৱ প্ৰতিভা আৰু অভিজ্ঞ আন্তঃৰাষ্ট্ৰীয় খেলুৱৈৰ এক সুন্দৰ মিশ্ৰণ আছে। এই আক্ৰমণৰ নেতৃত্বত ডগলাছ টাৰ্ডাইনে ফিগো চিণ্ডাই, ফ্ৰাংগী বুয়াম আৰু কেনষ্টাৰ খাৰছঙৰ দৰে স্থানীয় তাৰকাইও গুৰুত্বপূৰ্ণ ভূমিকা গ্ৰহণ কৰাৰ সম্ভাৱনা আছে।

শ্বিলং লাজংৰ মুখ্য প্ৰশিক্ষক বীৰেন্দ্ৰ থাপাই কয়, “ডুৰাণ্ড কাপৰ প্ৰথমখন খেল আমাৰ ঘৰুৱা খেলপথাৰত খেলিবলৈ পাই আমি অতিশয় উৎসাহিত হৈছো। দলটো সকলো সাজু হৈ আছে আৰু নিজৰ শ্ৰেষ্ঠখিনি দিবলৈ আগ্ৰহী।

তেওঁলোকৰ প্ৰতিদ্বন্দ্বী মালয়েছিয়াৰ সশস্ত্ৰ বাহিনীয়ে প্ৰথমবাৰৰ বাবে ডুৰাণ্ড কাপত অংশগ্ৰহণ কৰিছে। মালয়েছিয়াৰ সশস্ত্ৰ বাহিনীক প্ৰতিনিধিত্ব কৰা দলটো অনুশাসন, ফিটনেছ আৰু তীব্ৰতাৰ বাবে পৰিচিত, যিয়ে তেওঁলোকক যিকোনো দলৰ বাবে প্ৰত্যাহ্বানমূলক প্ৰতিদ্বন্দ্বী কৰি তুলিব পাৰে।

খেলখনৰ প্ৰাকক্ষণত মালয়েছিয়ান চাৰ্ভিচেছ এফ টিৰ সহকাৰী মুখ্য প্ৰশিক্ষক মাছৰিজাৰ বিন মিজালানে কয়, ‘ডুৰাণ্ড কাপত আমাৰ অভিযান আৰম্ভ কৰিবলৈ পাই আমি উৎফুল্লিত হৈছো। আন্তঃৰাষ্ট্ৰীয় মঞ্চত মালয়েছিয়ান সশস্ত্ৰ বাহিনীক প্ৰতিনিধিত্ব কৰাটো সদায় বিশেষ। দলটোৱে কঠোৰ পৰিশ্ৰম কৰিছে আৰু খেলুৱৈসকলে ভাল প্ৰদৰ্শন কৰিবলৈ অনুপ্ৰাণিত হৈছে। আমি সম্পূৰ্ণৰূপে আমাৰ কৌশল কাৰ্যকৰী কৰা আৰু অনুশাসিত ফুটবল খেলাত মনোনিৱেশ কৰিছো।”

নৰ্থইষ্ট ইউনাইটেড এফ চি আৰু ৰংদাজিদ ইউনাইটেড এফ চিও গ্ৰুপ ইত থকাৰ বাবে প্ৰতিটো পইণ্ট বহুমূলীয়া হ’ব আৰু এই গ্ৰুপটো অত্যন্ত প্ৰতিযোগিতামূলক হ’ব। লাজঙে জয়লাভ কৰি গ্ৰুপটোৰ ওপৰত আগতীয়াকৈ নিয়ন্ত্ৰণ লাভ কৰিবলৈ বিচাৰিব যদিও মালয়েছিয়াৰ সশস্ত্ৰ বাহিনীয়ে প্ৰথমখন মেচতে প্ৰভাৱ পেলাবলৈ বিচাৰিব।

হিন্দুস্থান সমাচাৰ / মনোজ কুমাৰ শইকীয়া