নতুন দিল্লী, ২৪ জুলাই (হি.স.)। কেন্দ্ৰীয় বিদ্যালয় সংগঠন (কেভিএছ) আৰু নৱোদয় বিদ্যালয় সমিতি (এনভিএছ)ত ১২ হাজাৰৰো অধিক শিক্ষকৰ পদ খালী হৈ আছে।
বৃহস্পতিবাৰে ৰাজ্যসভাত শিক্ষা বিভাগৰ ৰাজ্যিক মন্ত্ৰী জয়ন্ত চৌধুৰীয়ে কয় যে কেন্দ্ৰীয় বিদ্যালয়ত ৭,৭৬৫ টা শিক্ষক পদ আৰু নৱোদয় বিদ্যালয়ত ৪,৩২৩ টা শিক্ষক পদ খালী আছে। তেওঁ কয় যে নতুন বিদ্যালয় খোলা, অৱসৰ, বদলি, পদত্যাগ আদি কাৰণত এই খালী পদৰ সৃষ্টি হয়। খালী পদ পূৰণৰ প্ৰক্ৰিয়া চলি আছে, আৰু পাঠদানৰ কামত যাতে বাধাৰ সৃষ্টি নহয় তাৰ বাবে ঠিকাভিত্তিক শিক্ষক নিযুক্তিও অস্থায়ীভাৱে কৰা হৈছে।
তেওঁ কয় যে নেশ্যনেল কাউন্সিল অৱ এডুকেচনেল ৰিচাৰ্চ এণ্ড ট্ৰেইনিং (এনচিইআৰটি)ত ১৪৩টা গ্ৰুপ ‘এ’ শিক্ষক পদ খালী হৈ আছে আৰু তেওঁলোকৰ নিযুক্তি প্ৰক্ৰিয়াও চলি আছে। একে সময়তে নেচনেল কাউন্সিল ফৰ টিচাৰ এডুকেশ্যন (এনচিটিই)ত ৬০টা পদ খালী হৈ আছে।
চৌধুৰীয়ে কয় যে যদি আমি এই প্ৰধান প্ৰতিষ্ঠানসমূহত অশিক্ষক কৰ্মচাৰীৰ কথা কওঁ তেন্তে কেভিএছত ১৬১৭টা, এনভিএছত ৩০৫৬টা, এনচিইআৰটিত ১১৮৩টা আৰু এনচিটিইত ৬০টা পদ খালী হৈ আছে। অৰ্থাৎ চাৰিওটা প্ৰতিষ্ঠানতে মুঠ ৫,৯১৬টা অশিক্ষক কৰ্মচাৰীৰ পদ খালী।
শিক্ষা বিশেষজ্ঞসকলৰ মতে ইমান বৃহৎ সংখ্যক খালী পদে কেৱল প্ৰশাসনিক কাম-কাজত প্ৰভাৱ পেলোৱাই নহয়, ছাত্ৰ-ছাত্ৰীক গুণগত শিক্ষা প্ৰদান কৰাটোও প্ৰত্যাহ্বানমূলক কৰি তোলে। শিক্ষা মন্ত্ৰালয়ৰ পৰা দাবী জনাইছে যে অতি সোনকালে খালী পদ পূৰণ কৰক, যাতে দেশৰ ল’ৰা-ছোৱালীয়ে উন্নত শৈক্ষিক পৰিৱেশ লাভ কৰিব পাৰে।
हिन्दुस्थान समाचार / মনোজ কুমাৰ শইকীয়া
