নতুন দিল্লী, ২৫ জুলাই (হি.স.)। প্ৰধানমন্ত্ৰী নৰেন্দ্ৰ মোদীয়ে আজি শুকুৰবাৰে মালদ্বীপত ৰাষ্ট্ৰপতি মহম্মদ মুইজুৰ সৈতে বিভিন্ন কাৰ্যসূচীত অংশগ্ৰহণ কৰে আৰু বিস্তৃত আলোচনা কৰি দ্বিপাক্ষিক সহযোগিতা আৰু অধিক গভীৰ কৰাৰ প্ৰতিশ্ৰুতি প্ৰকাশ কৰে।
মালেত আয়োজন কৰা আদৰণি ভোজৰ অন্তত প্ৰধানমন্ত্ৰীয়ে কয় যে মালদ্বীপৰ স্বাধীনতা দিৱসৰ মুখ্য অতিথি হোৱাটো তেওঁৰ বাবে এক সন্মানৰ কথা। তেওঁ ভাৰতবাসীৰ হৈ মালদ্বীপবাসীক সম্ভাষণ জনাই কয় যে দুয়োখন দেশৰ সম্পৰ্ক ইতিহাস, সংস্কৃতি আৰু সহযোগিতাৰ গভীৰ ভেটিৰ ওপৰত প্ৰতিষ্ঠিত।
প্ৰধানমন্ত্ৰীয়ে কয়, ভাৰতৰ 'চুবুৰীয়া প্ৰথম' নীতিত মালদ্বীপৰ বিশেষ স্থান আছে। আমি দুয়ো 'গ্ল'বেল চাউথ'ৰ অংশীদাৰ আৰু ভাৰত মালদ্বীপৰ উন্নয়ন যাত্ৰাৰ প্ৰকৃত অংশীদাৰ হৈ আহিছে। তেওঁ বাণিজ্য, নিৰাপত্তা আৰু বহনক্ষম উন্নয়নৰ ক্ষেত্ৰত সহযোগিতা বৃদ্ধিৰ প্ৰয়োজনীয়তাৰ ওপৰত গুৰুত্ব আৰোপ কৰে।
ভাৰত-মালদ্বীভৰ কূটনৈতিক সম্পৰ্কৰ ৬০ বছৰ সম্পূৰ্ণ হোৱাৰ স্মৃতিত দুয়োজন নেতাই এক বিশেষ ডাক টিকট মুকলি কৰে। ই দ্বিপাক্ষিক বন্ধুত্বৰ প্ৰতীক। ভাৰতৰ সাহায্যত নিৰ্মিত প্ৰতিৰক্ষা মন্ত্ৰালয়ৰ ভৱনটোও নেতাসকলে মালেত উদ্বোধন কৰে। প্ৰতিৰক্ষা সহযোগিতাৰ দিশত এয়া এক গুৰুত্বপূৰ্ণ পদক্ষেপ।
পৰিৱেশ সুৰক্ষা আৰু জলবায়ু কাৰ্য্যৰ প্ৰতি ভাগ-বতৰা দায়বদ্ধতাৰ অংশ হিচাপে প্ৰধানমন্ত্ৰী মোডী আৰু ৰাষ্ট্ৰপতি মুইজুৱে ‘মাতৃৰ নামত এজোপা গছ’ পদক্ষেপৰ অধীনত গছপুলি ৰোপণ কৰে। প্ৰধানমন্ত্ৰীয়ে মালদ্বীপ চৰকাৰে ৫০ লাখ গছপুলি ৰোপণৰ পৰিকল্পনাক ভাৰতৰ সমৰ্থন পুনৰবাৰ প্ৰকাশ কৰে।
স্বাস্থ্য সহযোগিতা বৃদ্ধিৰ লক্ষ্যৰে প্ৰধানমন্ত্ৰীয়ে ৰাষ্ট্ৰপতি মুইজুক ‘ভীষ্ম’ কিউব প্ৰদান কৰে। এই ভ্ৰাম্যমাণ চিকিৎসা ইউনিটসমূহ জৰুৰীকালীন স্বাস্থ্যসেৱা প্ৰদান কৰিবলৈ সক্ষম আৰু ভাৰতৰ স্বাস্থ্য পদক্ষেপ ‘সহযোগ, হিত আৰু মৈত্ৰী’ৰ অংশ।
উল্লেখযোগ্য যে প্ৰধানমন্ত্ৰীৰ আগমনৰ লগে লগে ৰাষ্ট্ৰপতি মুইজু আৰু কেবিনেটৰ সদস্যসকলে তেওঁক বিমানবন্দৰত উষ্ম আদৰণি জনায়। ইয়াৰ পিছত হোৱা দ্বিপাক্ষিক আলোচনাত গৃহ নিৰ্মাণ, আন্তঃগাঁথনি, সংযোগ, প্ৰতিৰক্ষা, ডিজিটেল প্ৰযুক্তি, জলবায়ু পৰিৱৰ্তন, নবীকৰণযোগ্য শক্তি আৰু সাংস্কৃতিক বিনিময় আদি ক্ষেত্ৰত সহযোগিতা আৰু অধিক শক্তিশালী কৰাৰ ব্যৱস্থাৰ বিষয়ে আলোচনা কৰা হয়।
হিন্দুস্থান সমাচাৰ / মনোজ কুমাৰ শইকীয়া
