জগদলপুৰ, ১৬ জুলাই (হি.স.)। পশ্চিমবংগৰ কৃষ্ণনগৰৰ পৰা তৃণমূল কংগ্ৰেছৰ সাংসদ মহুৱা মইত্ৰাই ছত্তীশগড় আৰক্ষীৰ বিৰুদ্ধে গুৰুতৰ অভিযোগ উত্থাপন কৰি দাবী কৰিছে যে ছত্তীশগড় আৰক্ষীয়ে তেওঁৰ লোকসভা সমষ্টিৰ ৯ জন শ্ৰমিকক কৰ্মস্থলীৰ পৰা অপহৰণ কৰিছে। টিএমচিৰ সাংসদগৰাকীৰ উক্ত বক্তব্যৰ সন্দৰ্ভত বুধবাৰে বস্তৰৰ পৰা বিজেপিৰ সাংসদ মহেশ কাশ্যপে প্ৰতিক্ৰিয়া প্ৰকাশ কৰি কয় যে এয়া বস্তৰ, বংগ নহয়, আৰক্ষীয়ে বাংলাদেশী মানুহৰ বিৰুদ্ধে ব্যৱস্থা গ্ৰহণৰ কাম কৰিব। টি এম চিয়ে পশ্চিম বংগত বাংলাদেশৰ জনসাধাৰণক আশ্ৰয় দি ৰাজ্যখন ধ্বংস কৰিছে, আমি বস্তৰত এনেকুৱা হ’বলৈ নিদিওঁ। মহেশ কাশ্যপে কয় যে মহুৱা মইত্ৰাৰ বস্তৰৰ বিষয়ে কোনো বক্তব্য দিয়াৰ কোনো অধিকাৰ নাই।
সাংসদ মহুৱা মইত্ৰাই যোৱা ১৫ জুলাইত এটা ভিডিঅ’ প্ৰকাশ কৰি কয় যে এই শ্ৰমিকসকলৰ পৰিয়াল চিন্তিত, কিন্তু ছত্তীশগড় আৰক্ষীয়ে এই সন্দৰ্ভত তেওঁলোকৰ পৰিয়াল বা পশ্চিমবংগ চৰকাৰক কোনো তথ্য দিয়া নাই। ছত্তীশগড়ত চৰকাৰ আৰু আৰক্ষীৰ দ্বাৰা সঞ্চালিত ধাৰাবাহিক অপহৰণ চলি আছে । জানিব পৰা মতে, যোৱা ১৩ জুলাইত বস্তৰ জিলাৰ আলবেলাপাৰাৰ এখন ব্যক্তিগত বিদ্যালয়ৰ নির্মাণ কার্যত নিয়োজিত ৯ জন বাঙালী ৰাজমিস্ত্ৰীক আৰক্ষীয়ে জিম্মাত লৈছিল। শ্ৰমিকসকলৰ বৈধ নথি-পত্ৰ আছিল, তথাপিও তেওঁলোকক জেলত ভৰোৱা হৈছিল আৰু পৰিয়ালৰ সৈতে যোগাযোগ কৰিবলৈ দিয়া হোৱা নাছিল।
ছত্তীশগড়ৰ এজন আই পি এছৰ সৈতে যোগাযোগ কৰা হৈছিল যদিও তেওঁৰ কথা-বতৰাই আচৰিত কৰি তুলিছিল। তেওঁ কয় যে বস্তৰৰ সমীপৰ জগদলপুৰ কাৰাগাৰত ৯ জন শ্ৰমিকক বন্দী কৰা হৈছে, তেওঁলোকৰ বিৰুদ্ধে ভাৰতীয় ন্যায় সংহিতা (বিএনএছ)ৰ ১২৮ বি (পৰিচয় লুকুৱাই অপৰাধমূলক ষড়যন্ত্ৰ) ধাৰাত গোচৰ ৰুজু কৰা হৈছে। এজন আৰক্ষী অধীক্ষকৰ সৈতে হোৱা কথা-বতৰাৰ কথা উল্লেখ কৰি মাহুৱাই কয় যে এই শ্ৰমিকসকলে জনজাতীয় মহিলাক ধৰ্ষণ কৰাৰ অভিযোগ উত্থাপন কৰা বুলি বিষয়াগৰাকীয়ে দাবী কৰিছে, যাৰ তদন্ত চলি আছে। অৱশ্যে মহুৱাই ইয়াক ‘ভুৱা অভিযোগ’ বুলি অভিহিত কৰি চৰকাৰী অপহৰণ বুলি কয়।
সাংবাদিকৰ সৈতে কথা পতাৰ সময়ত বস্তৰৰ সাংসদ মহেশ কাশ্যপে পশ্চিম বংগৰ সাংসদ মহুৱা মইত্ৰাই কোণ্ডাগাঁৱত ৭ জন বাংলাদেশীক গ্ৰেপ্তাৰ কৰি কাৰাগাৰত বন্দী কৰা সন্দৰ্ভত দিয়া বক্তব্যক প্ৰতিহত কৰি কয় যে বস্তৰ পঞ্চম অনুসূচী আৰু পেছা আইনৰ সৈতে স্পৰ্শকাতৰ অঞ্চল। বাংলাদেশী মানুহৰ বিৰুদ্ধে ব্যৱস্থা লোৱাটো আৰক্ষী আৰু আদালতৰ বিষয়, তেওঁলোকে কথা কোৱাৰ আগতে এই বিষয়ে চিন্তা কৰা উচিত। টিএমচিয়ে পশ্চিমবংগত বাংলাদেশী মানুহক আশ্ৰয় দি ৰাজ্যখন ধ্বংস কৰিছে, আমি বস্তৰত এনেকুৱা হ’বলৈ নিদিওঁ। কাৰ বিৰুদ্ধে কি ব্যৱস্থা লোৱা হ’ব সেইটো আৰক্ষীৰ কাম।
हिन्दुस्थान समाचार / Monoj Kumar Saikia
