বৰপেটা, ০১ জুলাই (হি.স.)। তেজেৰে ৰঙালী হৈ পৰিল বৰপেটা ৰোডৰ খৈৰাৱাৰীৰ ৰাজপথ। এদল উদণ্ড যুৱকৰ আক্ৰমণত গুৰুতৰভাৱে আহত ৰাকিবুল ইছলাম নামৰ এজন যুৱক। তেজেৰে লুতুৰি পুতৰি হৈ পৰি থকা অৱস্থাত স্থানীয় ৰাইজে যুৱকজনক উদ্ধাৰ কৰি বৰপেটা ৰোডৰ চৰকাৰী চিকিৎসালয়লৈ প্ৰেৰণ কৰে যদিও যুৱকজনৰ স্বাস্থ্যৰ অধিক অৱনতি ঘটাত পৰবৰ্তী সময়ত উন্নত চিকিৎসাৰ বাবে বৰপেটাৰ ফখৰুদ্দিন আলি আহমেদ চিকিতসা মহাবিদ্যালয় আৰু হস্পিটাললৈ প্ৰেৰণ কৰে।
সম্প্ৰতি ৰাকিবুল ইছলাম নামৰ যুৱকজন চিকিৎসালয়ত মৃত্যুৰ সৈতে যুঁজি আছে। বৰপেটা ৰোডৰ খৈৰাৱাৰীত সংঘটিত হৈছে উক্ত ভয়ংকৰ মাৰপিটৰ ঘটনাটো। ঘটনা স্থলীত বৰপেটা ৰোড আৰক্ষী উপস্থিত হৈ পৰিস্থিতিৰ বুজ লোৱাৰ উপৰিও এজন যুৱকক কৰায়ত্ত কৰিছে বুলি জানিব পৰা গৈছে। ঘটনাৰ প্ৰকৃত কাৰণ বৰ্তমানো জানিব পৰা হোৱা নাই যদিও পৰবৰ্তী সময়ত আৰক্ষীৰ তদন্তত সমগ্ৰ ঘটনা পোহৰলৈ আহিব। উল্লেখ্য যে যোৱা প্ৰায় ৭দিন মান পুৰ্বে একেখন ঠাইতে সংঘটিত হৈছিল আন এক ভয়ংকৰ মাৰপিটৰ ঘটনা আৰু উক্ত ঘটনাতো এজন যুৱক গুৰুতৰভাৱে আহত হৈ চিকিৎসাধীন হ'বলগীয়া হৈছিল। একেখন ঠাইতে এনেকৈ এটাৰ পিছত আন এটাকৈ ভয়ংকৰ মাৰপিটৰ ঘটনা সংঘটিত হোৱাত আতংকিত হৈ পৰিছে স্থানীয় ৰাইজ।
হিন্দুস্থান সমাচাৰ / কিশোৰ মিশ্ৰ
