শিৱসাগৰ, ০২ এপ্ৰিল (হি.স.)। বৰছিলা চাহ বাগিছাৰ মূখ্য কাৰ্যালয়ৰ সন্মুখত ১ ঘণ্টীয়া ধৰ্ণা, সহস্ৰাধিক শ্ৰমিকৰ উত্তাল প্ৰতিবাদ।
ৰাজ্যৰ প্ৰতিখন চাহ বাগিচাৰ লগতে বৰছিলা চাহ বাগিচাত আজি পুৱা ৮ বজাৰ পৰা ১ ঘণ্টীয়া ধৰ্ণা কাৰ্যসূচী ৰূপায়ন কৰা হয়। অসম চাহ মজদুৰ সংঘৰ আহ্বানত আয়োজিত এই প্ৰতিবাদত সহস্ৰাধিক চাহ শ্ৰমিকে অংশগ্ৰহণ কৰে।
প্ৰতিবাদকাৰী শ্ৰমিকসকলে হাতে হাতে প্লে কাৰ্ড লৈ বিজেপি চৰকাৰ আৰু বাগিচাৰ মালিক পক্ষৰ বিৰুদ্ধে তীব্ৰ প্ৰতিবাদ সাব্যস্ত কৰে। তেওঁলোকে শ্লোগানেৰে মালিক পক্ষৰ শোষণৰ বিৰুদ্ধে ক্ষোভ প্ৰকাশ কৰে আৰু শ্ৰমিকসকলৰ মৌলিক সমস্যাসমূহ সমাধানৰ দাবী তোলে।
প্ৰতিবাদকাৰীসকলে দাবী কৰে যে বাগিচাৰ মালিক পক্ষ শ্ৰমিকসকলক শোষণ কৰি আহিছে আৰু ন্যায্য প্ৰাপ্তি, বসবাসৰ সুবিধা, স্বাস্থ্যসেৱা, শিক্ষা আদি বিষয়ত কোনো ধৰণৰ উন্নতি নহয়। এইক্ষেত্ৰত চৰকাৰৰো গাফিলতি স্পষ্ট হৈছে বুলি শ্ৰমিকসকলে অভিযোগ কৰে।
প্ৰতিবাদৰ সময়ত শ্ৰমিকসকলে বাগিচাৰ মূখ্য কাৰ্যালয়ৰ প্ৰৱেশদ্বাৰত প্ৰতিবাদমুখী হৈ বিভিন্ন শ্লোগানেৰে উত্তাল পৰিবেশ সৃষ্টি কৰে।
হিন্দুস্থান সমাচাৰ / নিৰ্মলেন্দু
