গোলাঘাট, ০২ এপ্ৰিল (হি.স.)। ত্ৰিশ বৰ্ষতকৈও অধিক কাল জ্ঞানৰ পোহৰ বিলাই শিক্ষাজীৱনৰ পৰা অৱসৰ গ্ৰহণ কৰিলে গোলাঘাট জিলাৰ খুমটাইৰ নভেটা প্ৰাথমিক বিদ্যালয়ৰ আদৰ্শ শিক্ষক প্ৰবোধ শৰ্মাই ৷ ১৯৯৪ চনতে নভেটা প্ৰাথমিক বিদ্যালয়ত যোগদান কৰি কৃতি শিক্ষক জনে অৱসৰ গ্ৰহণ কৰিলে ৷
শিক্ষকজনৰ আজি বিদায় সভা উপলক্ষে বিদ্যালয়খনৰ শিক্ষক,ছাত্ৰ-ছাত্ৰী,পৰিচালনা সমিতি আৰু স্থানীয় গাঁওবাসীয়ে আয়োজন কৰিলে আড়ম্বৰপূৰ্ণ অনুষ্ঠানৰ ৷ বিদায় সভাত শিক্ষক প্ৰবোধ শৰ্মাক বিদ্যালয়ৰ শিক্ষক,ছাত্ৰ ছাত্ৰী,পৰিচালনা সমিতি,প্ৰাক্তন ছাত্ৰ-ছাত্ৰীৰ লগতে বিভিন্ন অনুষ্ঠান প্ৰতিষ্ঠানে সম্বৰ্দ্ধনা জ্ঞাপন কৰে ৷ জীৱনৰ প্ৰায় ত্ৰিশ বছৰ একেখন বিদ্যালয়তে শিক্ষকতা কৰি বিদায় মুহূৰ্তত আবেগিক হৈ পৰিল শিক্ষক প্ৰবোধ শৰ্মাৰ লগতে বিদ্যালয়খনৰ আন শিক্ষক তথা গাঁওবাসী ৷ সকলোৰে পৰা পোৱা অকৃত্ৰিম মৰমত অভিভূত হৈ পৰিল শিক্ষকজন ৷
হিন্দুস্থান সমাচাৰ / কিশোৰ মিশ্ৰ