ইছলামাবাদ, ০২ এপ্ৰিল (হি.স.)। পাকিস্তানৰ ৰাষ্ট্ৰপতি আছিফ আলী জাৰ্দাৰীক কৰাচীৰ এখন চিকিৎসালয়ত ভৰ্তি কৰোৱা হৈছে। চিকিৎসালয়ত তেওঁৰ স্বাস্থ্য পৰীক্ষা কৰা হৈছে। শীঘ্ৰে তেওঁক চিকিৎসালয়ৰ পৰা মুকলি কৰি দিয়াৰ সম্ভাৱনা আছে। চিকিৎসালয়ত ভৰ্তি হোৱাৰ বাতৰি সংবাদ মাধ্যমত প্ৰকাশ পোৱাৰ পিছতে মঙলবাৰে প্ৰধানমন্ত্ৰী শ্বাহবাজ শ্বৰীফে ৰাষ্ট্ৰপতি আছিফ আলী জাৰ্দাৰীৰ সৈতে যোগাযোগ কৰি তেওঁৰ স্বাস্থ্যৰ বিষয়ে সোধা-পোছা কৰে।
অৱশ্যে ৰাষ্ট্ৰপতিৰ কাৰ্যালয় বা পিপিপিৰ সহ-সভাপতিৰ স্বাস্থ্য সন্দৰ্ভত কোনো আনুষ্ঠানিক বিবৃতি দিয়া হোৱা নাই বুলি ডন কাকতখনে প্ৰকাশ কৰিছে। ৰাতিপুৱা সংবাদ মাধ্যমে সূত্ৰৰ উদ্ধৃতি দি জনাইছে যে ৰাষ্ট্ৰপতি জাৰ্দাৰীক নৱাবশ্বাহৰ পৰা অনাৰ পিছত কৰাচীৰ এখন চিকিৎসালয়ত ভৰ্তি কৰা হৈছিল। দলটোৰ ঘনিষ্ঠ এক সূত্ৰই জনোৱা মতে, তেওঁৰ ওপৰত কিছু পৰীক্ষা সম্পন্ন কৰা হৈছে আৰু শীঘ্ৰে তেওঁক ডিচচাৰ্জ দিয়া হ’ব।
প্ৰেছ তথ্য বিভাগে প্ৰকাশ কৰা এক বিবৃতিত কোৱা হৈছে যে প্ৰধানমন্ত্ৰী শ্বাহবাজে ৰাষ্ট্ৰপতিৰ সৈতে যোগাযোগ কৰি তেওঁৰ স্বাস্থ্যৰ বিষয়ে সোধা-পোছা কৰি তেওঁৰ আশু আৰোগ্য কামনা কৰে। ইফালে সিন্ধৰ ৰাজ্যপাল কামৰাণ টেছ’ৰীৰ কাৰ্যালয়ে জাৰ্দাৰীৰ স্বাস্থ্য সন্দৰ্ভত সোধা-পোছা কৰিবলৈ ৰাষ্ট্ৰপতিৰ চিকিৎসক ডাঃ অসীম হুছেইনক ফোন কৰি শুভেচ্ছা জনায় বুলি জানিবলৈ দিয়ে। ২০২৪ চনৰ অক্টোবৰ মাহত ৰাষ্ট্ৰপতিগৰাকীয়ে বিমানৰ পৰা নামি যাওঁতে ভৰি ভাঙিছিল। পৰি যোৱাৰ লগে লগে তেওঁক চিকিৎসাৰ বাবে চিকিৎসালয়লৈ লৈ যোৱা হয়। পৰীক্ষাৰ পিছত ডাক্তৰে ভৰিখনত প্লাষ্টাৰ লগাইছিল।
উল্লেখ্য যে ৬৯ বছৰীয়া ৰাষ্ট্ৰপতিগৰাকীয়ে যোৱা কিছু বছৰত কেইবাটাও স্বাস্থ্যজনিত সমস্যাত ভুগিছে। ২০২৩ চনৰ মাৰ্চ মাহত সংযুক্ত আৰব আমিৰশ্বাহীত তেওঁৰ চকুৰ অস্ত্ৰোপচাৰ কৰা হয়। ২০২২ চনত বুকুৰ সংক্ৰমণৰ চিকিৎসাৰ বাবে এসপ্তাহৰ বাবে কৰাচীৰ ডাঃ জিয়াউদ্দিন হাস্পতালত ভৰ্তি কৰোৱা হয়। তেওঁৰ পুত্ৰ তথা পিপিপিৰ অধ্যক্ষ বিলোৱাল ভুট্টো জৰ্দাৰীৰ মতে, ২০২২ চনৰ জুলাই মাহত তেওঁৰ ক’ভিড-১৯ পজিটিভ আছিল, কিন্তু সামান্য লক্ষণহে দেখা দিছিল। ইয়াৰ এবছৰ পূৰ্বে অহৰহ ভ্ৰমণৰ ফলত হোৱা ভাগৰুৱা অৱস্থাৰ বাবে কৰাচীৰ এখন ব্যক্তিগত চিকিৎসালয়ত জাৰ্দাৰীক ভৰ্তি কৰোৱা হৈছিল ।
হিন্দুস্থান সমাচাৰ / মনোজ কুমাৰ শইকীয়া
