ৱাশ্বিংটন, ০৩ এপ্ৰিল (হি.স.)। আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ব্যাপক শুল্ক ঘোষণাই কঁপাই তুলিলে আমেৰিকাৰ শ্বেয়াৰ বজাৰ। বুধবাৰে সন্ধিয়ালৈকে ডাউ ফিউচাৰ ১০০০ পইণ্টতকৈ অধিক হ্ৰাস পাইছে। ডাউ জ’নছ ইণ্ডাষ্ট্ৰিয়েল এভাৰেজ ১১০০ পইণ্ট (২.৭ শতাংশ), এছ এণ্ড পি ৫০০ ফ্যুচাৰ ৩.৯ শতাংশ আৰু নাছডাক-১০০ ফ্যুচাৰ ৪.৭ শতাংশ হ্ৰাস পাইছে। ট্ৰাম্পে কয় যে এই শুল্কে আমেৰিকাক বিদেশী সামগ্ৰীৰ ওপৰত নিৰ্ভৰশীলতাৰ পৰা মুক্ত কৰিব। ট্ৰাম্পৰ এই পদক্ষেপৰ বাবে অৰ্থনীতিবিদসকলে অৰ্থনৈতিক মন্দাৱস্থাৰ আশংকা প্ৰকাশ কৰিছে।

এবিচি নিউজ চেনেলৰ তথ্য অনুসৰি শুল্ক ঘোষণাৰ লগে লগে শ্বেয়াৰ বজাৰত আন্তঃৰাষ্ট্ৰীয় বাণিজ্য যুদ্ধ গভীৰ হোৱাৰ আশংকা অধিক গভীৰ হৈ পৰে। নাইক আৰু এপলৰ শ্বেয়াৰ ৭ শতাংশতকৈ অধিক হ্ৰাস পাইছে, আৰু আমাজনৰ শ্বেয়াৰ ৫ শতাংশতকৈ অধিক হ্ৰাস পাইছে। বুধবাৰে এনভিডিয়াৰ শ্বেয়াৰ ৪.৫ শতাংশ আৰু টেছলাৰ শ্বেয়াৰ ৬ শতাংশ হ্ৰাস পায়। আমদানিকৃত সামগ্ৰীৰ ওপৰত অধিক নিৰ্ভৰশীল আমেৰিকাৰ কোম্পানীসমূহৰ শ্বেয়াৰ আটাইতকৈ বেছি হ্ৰাস পাইছে। ডলাৰ ট্ৰি ১১ শতাংশ হ্ৰাস আৰু ফাইভ বিলো ১৫ শতাংশ হ্ৰাস পাইছে।

হোৱাইট হাউছৰ ৰোজ গাৰ্ডেনত শুল্ক ঘোষণাৰ সময়ত ট্ৰাম্পে কয় যে, ‘মোৰ সতীৰ্থ আমেৰিকানসকল, এইটো মুক্তি দিৱস। ২০২৫ চনৰ ২ এপ্ৰিলৰ দিনটোক আমেৰিকাৰ উদ্যোগৰ পুনৰ জন্ম হোৱাৰ দিন হিচাপে চিৰদিনৰ বাবে স্মৰণ কৰা হ’ব। আমেৰিকা পুনৰ সমৃদ্ধিশালী হ’ব।'' আমেৰিকান বিশ্ববিদ্যালয়ৰ অৰ্থনীতিবিদ কাৰা ৰেইনল্ডছে কয় যে ট্ৰাম্পৰ এই পদক্ষেপে আমেৰিকাক মন্দাৱস্থাৰ দিশে লৈ যাব পাৰে। মুডীজ এনালিটিক্সৰ মুখ্য অৰ্থনীতিবিদ মাৰ্ক জাণ্ডীয়েও কয় যে এই শুল্কৰ ফলত অৰ্থনৈতিক মন্দাৱস্থাৰ সৃষ্টি হ’ব।

हिन्दुस्थान समाचार / মনোজ কুমাৰ শইকীয়া