কাঠমাণ্ডু, ০৩ এপ্ৰিল (হি.স.)। নেপালৰ ৰাজধানী কাঠমাণ্ডুত যোৱা শুকুৰবাৰে ৰাজতন্ত্ৰৰ সমৰ্থনত বিক্ষোভৰ সময়ত সংঘটিত হোৱা হিংসাত্মক পৰিস্থিতিৰ দায়িত্ব ল’বলৈ অস্বীকাৰ কৰিছে প্ৰাক্তন ৰজা জ্ঞানেন্দ্ৰ শ্বাহৰ সচিবালয়ে। শ্বাহৰ উদ্ধৃতি দি বৃহস্পতিবাৰে সচিবালয়ে প্ৰকাশ কৰা এক বিবৃতিত এই মৰ্মান্তিক ঘটনাৰ বাবে চৰকাৰৰ অভাৱ আৰু দুৰ্বলতা দায়ী বুলি অভিযোগ উত্থাপন কৰিছে।

এক বিবৃতিত সচিবালয়ৰ যোগাযোগ সম্পাদক ফণীৰাজ পাঠকে কয় যে প্ৰতিবাদৰ সময়ত সংঘটিত হিংসা, লণ্ড–ভণ্ড লুণ্ঠনৰ দায়িত্ব নিৰ্মল নিৱাছ আৰু প্ৰাক্তন ৰজাৰ সমৰ্থকসকলে ল’ব নোৱাৰে। পাঠকে দাবী কৰে যে ২৮ মাৰ্চত টিংকুনে অঞ্চলত সংঘটিত হোৱা ভাঙি-ছিঙি, অগ্নিসংযোগ আৰু দুজন লোকৰ মৃত্যুৰ বাবে প্ৰাক্তন ৰজা জ্ঞানেন্দ্ৰ শ্বাহক দোষাৰোপ কৰি অলি চৰকাৰে নিজৰ দুৰ্বলতা লুকুৱাবলৈ চেষ্টা কৰিছে।প্ৰধানমন্ত্ৰী অলিয়ে সংসদত সংঘটিত ঘটনাৰ বাবে প্ৰাক্তন ৰজাক পোনপটীয়াকৈ জগৰীয়া কৰি তেওঁৰ বিৰুদ্ধে আইনী ব্যৱস্থা গ্ৰহণ কৰাৰ সকীয়াই দিছিল।

উল্লেখযোগ্য যে প্ৰাক্তন ৰজা জ্ঞানেন্দ্ৰ শ্বাহৰ ৮৭ বছৰীয়া অটল সমৰ্থক নৱৰাজ সুবেদীৰ নেতৃত্বত সংযুক্ত জনসংগ্ৰাম সমিতিয়ে এই বিক্ষোভ চলাইছিল। সুবেদিয়ে দাবী কৰিছিল যে প্ৰাক্তন ৰজাই নিজেই তেওঁক এই কমিটিৰ নেতৃত্ব দিবলৈ কৈছিল। শুকুৰবাৰৰ ঘটনাৰ পিছৰে পৰা সুবেদীক গৃহবন্দী কৰি ৰখা হৈছে।

हिन्दुस्थान समाचार / মনোজ কুমাৰ শইকীয়া