ঢাকা, ০২ এপ্ৰিল (হি.স.)। বাংলাদেশৰ ঢাকা-চিটাগং ঘাইপথত প্ৰায় ১২ ঘণ্টাত সংঘটিত দুটাকৈ পথ দুৰ্ঘটনাত দহজন যাত্ৰী নিহত হোৱাৰ লগতে ২৭জন আহত হয়। আজি পুৱা সংঘটিত দুৰ্ঘটনাত প্ৰাণ হেৰুওৱা ৭ জন লোকৰ কোনো এজনকো এতিয়াও চিনাক্ত কৰিব পৰা হোৱা নাই।
চট্টগ্ৰামৰ লোহাগৰা উপাজিলাৰ ঢাকা-চিট্টগং ঘাইপথত আজি পুৱা প্ৰায় ৭ বজাত যাত্ৰীবাহী বাছ আৰু মিনিবাছৰ মাজত মুখামুখি সংঘৰ্ষত কমেও ৭ জন লোক নিহত হোৱাৰ লগতে দুজন লোক আহত হয় বুলি দ্য ডেইলী ষ্টাৰ কাকতত প্ৰকাশ পাইছে। লোহাগড়া আৰক্ষী থানাৰ ভাৰপ্ৰাপ্ত বিষয়া আৰিফুৰ ৰহমানে জানিবলৈ দিয়া মতে, মৃত লোককেইজনৰ চিনাক্তকৰণ হোৱা নাই। চুন্থী ঘাইপথ অংশৰ বনাঞ্চলত সংঘটিত হয় এই দুৰ্ঘটনা। কক্স বজাৰলৈ যোৱা এখন মিনিবাছৰ সৈতে সংঘৰ্ষত লিপ্ত হয় ৰিলাক্স ট্ৰেন্সপ’ৰ্ট বাছ। থিতাতে মৃত্যু হয় মিনি বাছখনৰ ৭ জন যাত্ৰীৰ। আটাইকেইটা মৃতদেহ লোহাগড় মহকুমা স্বাস্থ্যকেন্দ্ৰলৈ প্ৰেৰণ কৰা হৈছে।
ইয়াৰ উপৰিও একেটা ঘাইপথতে মঙলবাৰে সন্ধিয়া প্ৰায় ৬:৩০ বজাত কুমিলাৰ চান্দিনা মহকুমাত এখন বাছে বৈদ্যুতিক খুঁটা আৰু গছত খুন্দা মৰাৰ ফলত তিনিজন যাত্ৰী (সকলো পুৰুষ) নিহত হোৱাৰ লগতে কমেও ২৫ জন আহত হয়। এতিয়াও চিনাক্ত হোৱা নাই মৃতক। আহতসকলক চান্দিনা মহকুমা স্বাস্থ্য কেন্দ্ৰৰ পৰা কুমিলা মেডিকেল কলেজ হাস্পতাললৈ প্ৰেৰণ কৰা হয়।
हिन्दुस्थान समाचार / মনোজ কুমাৰ শইকীয়া
