কাঠমাণ্ডু, ১৭ এপ্ৰিল (হি.স.)। নেপালৰ মূল বিৰোধী দলৰ নেতা পুষ্প কমল দাহালৰ ‘প্ৰচণ্ড’ৰ বক্তব্যৰ পিছতে ৰাজনীতি উত্তপ্ত হৈ পৰিছে, য’ত তেওঁ দাবী কৰিছিল যে অলি চৰকাৰ অতি সোনকালে পতিত হ’ব আৰু শাসকীয় নেপালী কংগ্ৰেছৰ নেতৃত্বত নতুন চৰকাৰ গঠন হ’ব। এতিয়া শাসকীয় দলৰ নেতাসকলে নিজৰ চৰকাৰক অহৰহ সমালোচনাৰ ফলত আস্থাৰ সংকটৰ সৃষ্টি কৰিছে।

বৰ্তমানৰ অলি চৰকাৰৰ বিৰুদ্ধে জাগৰণ অভিযানৰ নেতৃত্ব দিয়া মাওবাদী দলৰ সভাপতি প্ৰচণ্ডই বুধবাৰে পুৱা নৱালপাৰাচী জিলাৰ পৰা এক বিবৃতি দিছিল যে দেশত নতুন চৰকাৰ গঠন সন্দৰ্ভত তেওঁৰ দলৰ নেতা আৰু শাসকীয় দল নেপালী কংগ্ৰেছৰ সৈতে ধাৰাবাহিক আলোচনা চলি আছে। প্ৰচণ্ড ইয়াতেই ক্ষান্ত নাথাকিল, তেওঁ আৰু কয় যে অতি সোনকালে অলি চৰকাৰ পতিত হ’ব আৰু নেপালী কংগ্ৰেছৰ নেতৃত্বত নতুন চৰকাৰ গঠন হ’ব। প্ৰচণ্ডৰ এই বক্তব্যৰ পিছতে বুধবাৰে সন্ধিয়া প্ৰধানমন্ত্ৰী কে পি শৰ্মা অলিয়ে মিত্ৰজোঁটৰ মূল সমষ্টি দুটা কংগ্ৰেছ আৰু ইউ এম এলৰ শীৰ্ষ নেতাৰ বৈঠক আহ্বান কৰে। এই বৈঠকত নেপালী কংগ্ৰেছ পাৰ্টিৰ দুগৰাকী উচ্চপদস্থ বিষয়া অনুপস্থিত আছিল, যাৰ ফলত মিত্ৰজোঁটৰ বিভাজন সন্দৰ্ভত আলোচনা আৰু অধিক শক্তিশালী হৈ উঠিছিল।

কংগ্ৰেছ দলৰ উপ-সভাপতি তথা চৰকাৰ চলোৱাৰ বাবে গঠিত উচ্চ পৰ্যায়ৰ সমিতিৰ আহ্বায়ক পূৰ্ণ বাহাদুৰ খাদকা আৰু দলৰ সাধাৰণ সম্পাদক গগন থাপা এই বৈঠকত উপস্থিত নোহোৱাত ৰাজনৈতিক কৰিড’ৰত আলোড়নৰ সৃষ্টি হয়। বুধবাৰে গভীৰ নিশালৈকে চলি থকা বৈঠকত উপস্থিত থকা গৃহমন্ত্ৰী ৰমেশ লেখাকে বৈঠকৰ অন্তত ওলাই আহি সংবাদ মাধ্যমৰ আগত কয় যে মিত্ৰতাত কোনো বিভাজন নাই আৰু একেলগে চৰকাৰ চলোৱাৰ প্ৰতিশ্ৰুতি পুনৰবাৰ প্ৰকাশ কৰা হৈছে। তেওঁ নিজৰ দলৰ নেতাসকলে চৰকাৰক ৰাজহুৱাভাৱে কৰা সমালোচনাক মিত্ৰজোঁটৰ নীতিৰ বিৰুদ্ধে বুলি অভিহিত কৰে।

বৃহস্পতিবাৰে পুৱাৰে পৰা মিত্ৰজোঁটৰ দুয়োটা প্ৰধান সমষ্টিবাসীয়ে পৃথক পৃথক বৈঠকত মিলিত হয়। নেপালী কংগ্ৰেছৰ সভাপতি শ্বেৰ বাহাদুৰ দেউবাই পুৱা সকলো দলৰ বিষয়া-মন্ত্ৰীৰ যুটীয়া বৈঠকত মিলিত হৈ মিত্ৰজোঁটত কোনো সমস্যা নহ’ব বুলি ইংগিত দিয়ে। এই বৈঠকত অংশগ্ৰহণ কৰা দলৰ মুখপাত্ৰ ড° প্ৰকাশ শৰণ মাহে কয় যে চৰকাৰক কোনেও সমালোচনা নকৰিব বুলি সকলো দলৰ নেতাক নিৰ্দেশ দিয়া হৈছে। যিয়ে কিবা ক’ব বিচাৰে দলীয় সভা বা মিত্ৰতাৰ সভাত তেনেকৈ ক’ব লাগে।

আনহাতে, খোদ বৃহস্পতিবাৰে প্ৰধানমন্ত্ৰী অলিয়ে দলীয় বিষয়াসকলৰ এখন বৈঠক আহ্বান কৰে, য’ত মিত্ৰজোঁটৰ সমস্যাসমূহৰ বিষয়ে আলোচনা কৰা হয়। দলৰ মুখপাত্ৰ প্ৰদীপ জ্ঞাৱালীয়ে কয় যে কংগ্ৰেছ দলৰ একাংশ জ্যেষ্ঠ নেতা আৰু বিষয়াই চৰকাৰৰ কাম-কাজ সন্দৰ্ভত ৰাজহুৱা সমালোচনাৰ বাবে অনাস্থাৰ সংকট দেখা দিয়া যেন লাগে, কিন্তু বাস্তৱত তেনেকুৱা একো নাই। পাৰস্পৰিক মতানৈক্য যিয়েই নহওক কিয়, সেইবোৰ বৈঠকতে সমাধান কৰা হ’ব বুলিও তেওঁ কয়।

হিন্দুস্থান সমাচাৰ / মনোজ কুমাৰ শইকীয়া