ইছলামাবাদ, ০১ এপ্ৰিল (হি.স.)। আজিৰ পৰা আৰম্ভ হ’ব পাকিস্তানত অবৈধভাৱে বসবাস কৰা আফগান শৰণাৰ্থীসকলক ঘূৰাই পঠোৱাৰ প্ৰক্ৰিয়া। এই লোকসকলৰ স্বেচ্ছামূলকভাৱে ঘূৰি যোৱাৰ ৩১ মাৰ্চৰ সময়সীমা শেষ হৈছে। খৈবাৰ পাখতুনখোৱা গৃহ বিভাগৰ সৈতে জড়িত সূত্ৰই জনোৱা মতে, আজিৰ পৰা আফগান শৰণাৰ্থীক আফগানিস্তানলৈ ঘূৰাই পঠিওৱা হ’ব।
সবিশেষ দি জিঅ’ নিউজ চেনেলত প্ৰকাশিত এক প্ৰতিবেদনত কোৱা হৈছে যে তালিবান চৰকাৰৰ অনুৰোধৰ পিছতো যোৱা সপ্তাহত ফেডাৰেল চৰকাৰে সময়সীমা বৃদ্ধিৰ বিৰুদ্ধে সিদ্ধান্ত লৈছিল। বিদেশী নাগৰিকৰ সৈতে জড়িত বহিঃৰাজ্যৰ ৰাষ্ট্ৰীয় নিৰাপত্তা কোষৰ ডেচব’ৰ্ড আপডেট কৰিবলৈ ২৭ মাৰ্চৰ ভিতৰত খাইবাৰ পাখতুনখোৱাত থকা আফগান ছাত্ৰ-ছাত্ৰীৰ অভিলেখো চৰকাৰে প্ৰাদেশিক চৰকাৰৰ পৰা বিচাৰিছিল।
সন্ত্ৰাসবাদী আক্ৰমণ বৃদ্ধি পোৱাৰ মাজতে দেশখনৰ নিৰাপত্তা পৰিস্থিতি উন্নত কৰাৰ প্ৰচেষ্টাৰ অংশ হিচাপে অবৈধ আফগান শৰণাৰ্থীক বহিষ্কাৰ কৰাৰ নীতি গ্ৰহণ কৰা হৈছে। আফগান ভূখণ্ডৰ পৰা চলি থকা সন্ত্ৰাসবাদী সংগঠনক ইছলামাবাদে বাৰে বাৰে দোষাৰোপ কৰি আহিছে। ৰেডিঅ’ পাকিস্তানে আজি প্ৰকাশ কৰা বাতৰি অনুসৰি এতিয়ালৈকে পাকিস্তানত অবৈধভাৱে বসবাস কৰা ৮ লাখ ৭৮ হাজাৰ ৯৭২ জন আফগান লোক নিজৰ দেশলৈ উভতি গৈছে। ইফালে মানৱ অধিকাৰ নিৰীক্ষণ সংস্থা এমেনেষ্টী ইণ্টাৰনেশ্যনেলে পাকিস্তানক দেশখনত বাস কৰা অবৈধ অনুপ্ৰৱেশকাৰী আৰু আফগান নাগৰিকক বহিষ্কাৰ কৰাৰ সন্দৰ্ভত অস্বচ্ছ অবৈধ বিদেশী প্ৰত্যাৱৰ্তন আঁচনি প্ৰত্যাহাৰ কৰিবলৈ আহ্বান জনাইছে।
উল্লেখ্য যে আন যিকোনো চহৰতকৈ পেছাৱাৰত আফগান নাগৰিকৰ সংখ্যা বেছি। হাজাৰ হাজাৰ লোকে নিজাকৈ ব্যৱসায় চলাই থকাৰ বিপৰীতে আন কিছুমানে যোৱা কেইবা দশক ধৰি চহৰখনত কাম কৰি আছে। স্থানীয় জনসাধাৰণৰ লগতে বহু চহৰ, উপনগৰ আৰু গ্ৰাম্য অঞ্চলত বসবাস কৰি আছে।
हिन्दुस्थान समाचार / মনোজ কুমাৰ শইকীয়া
