ঢাকা, ০১ এপ্ৰিল (হি.স.)। বাংলাদেশ জাতীয়তাবাদী পাৰ্টিৰ অধ্যক্ষ তথা প্ৰাক্তন প্ৰধানমন্ত্ৰী খালেদা জিয়াই দেশৰ উন্নত ভৱিষ্যত আৰু দেশত গণতন্ত্ৰ প্ৰতিষ্ঠাৰ বাবে সকলোকে একত্ৰিত হ’বলৈ আহ্বান জনায়।
সোমবাৰে লণ্ডনৰ পৰা ঈদ-উল-ফিতৰ আৰু স্বাধীনতা দিৱস উপলক্ষে ঢাকাত উপস্থিত থকা দলৰ জ্যেষ্ঠ নেতা আৰু অন্যান্যসকলক দিয়া ভাৰ্চুৱেল ভাষণত খালেদা জিয়াই এই আহ্বান জনায়।
ঢাকা ট্ৰিবিউনে প্ৰকাশ কৰা অনুসৰি খালেদাই দলৰ জ্যেষ্ঠ নেতাসকলক ঈদ আৰু স্বাধীনতা দিৱসৰ শুভেচ্ছা জনায়। তেওঁ গণতন্ত্ৰ প্ৰতিষ্ঠাৰ বাবে পাৰস্পৰিক সহযোগিতা আৰু সামূহিক প্ৰচেষ্টাৰ প্ৰয়োজনীয়তাৰ ওপৰত গুৰুত্ব আৰোপ কৰে।
গুলশানত থকা তেওঁৰ কাৰ্যালয়ত এই অনুষ্ঠানৰ আয়োজন কৰা হৈছিল। পাৰ্টিৰ ভাৰপ্ৰাপ্ত সভাপতি তাৰিক ৰহমানেও ভাৰ্চুৱেলি লণ্ডনৰ পৰা ইয়াত অংশগ্ৰহণ কৰিছিল। অনুষ্ঠানৰ আৰম্ভণিতে বিএনপিৰ সাধাৰণ সম্পাদক মিৰ্জা ফখৰুল ইছলাম আলমগীৰে আদৰণি ভাষণ প্ৰদান কৰে।
ভাষণত খালেদা জিয়াই কয় যে দলৰ সদস্যসকলৰ ত্যাগ আৰু সংগ্ৰাম অসাৰ হৈ যোৱা নাই আৰু অসাৰ নাযায়। ৰাইজৰ ভোটাধিকাৰ সুনিশ্চিত কৰাৰ বাবে সকলোকে একত্ৰিত হৈ কাম কৰিবলৈ আহ্বান জনায়। লগতে দেশবাসীক ঈদৰ শুভেচ্ছা জনায়। বহুদিনৰ মূৰত সকলোকে দেখাৰ পিছত তেওঁ আৱেগিক হৈ পৰিল। উল্লেখযোগ্য যে কেইবামাহো ধৰি লণ্ডনৰ পুত্ৰৰ ঘৰত আশ্ৰয় লৈছিল প্ৰবীণ নেতা খালিদা জিয়াই। তেওঁ চিকিৎসাৰ বাবে লণ্ডনলৈ গৈছিল।
हिन्दुस्थान समाचार / মনোজ কুমাৰ শইকীয়া
