-তুৰ্বটত কেচ ডিচিৰ কনভয়ত বিস্ফোৰণ

কুৱেটা, ২৮ অক্টোবৰ (হি.স.)। বিগত ২৪ ঘণ্টাত পাকিস্তানৰ বেলুচিস্তান প্ৰদেশত অচিনাক্ত সশস্ত্ৰ আক্ৰমণকাৰীয়ে সেনাবাহিনীক লক্ষ্য কৰি লৈ যায়। কেইবাজনো জোৱান নিহত হোৱাৰ লগতে আহত হয় একাংশ। কেচৰ উপ আয়ুক্তৰ (ডি চি) কনভয় উৰুৱাই দিয়াৰ চেষ্টাও কৰা হয়। ডিচি নিৰাপদ। কুচ জিলাত লেভিছ আৰক্ষী থানা আৰু কেইবাটাও অট্টালিকা জ্বলাই দিয়া হয়।

দ্য বেলুচিস্তান পোষ্ট (পাষ্টো ভাষা)ত প্ৰকাশিত এক প্ৰতিবেদন অনুসৰি কেচ জিলাৰ বুলেডা তহচিলৰ ৰংগানৰ ৰেইকো অঞ্চলত অচিনাক্ত অস্ত্ৰধাৰীয়ে পাকিস্তানী নিৰাপত্তা বাহিনীক আক্ৰমণ কৰে। এই আক্ৰমণত কেইবাজনো জোৱান নিহত হোৱাৰ লগতে কিছু আহত হয়। আক্ৰমণকাৰীয়ে জোৱানৰ অস্ত্ৰ-শস্ত্ৰও লুটপাত কৰে। বিষয়াসকলে এই কাণ্ডক লৈ মৌনতা অৱলম্বন কৰিছে, আৰু এতিয়াও কোনেও ইয়াৰ দায়িত্ব স্বীকাৰ কৰা নাই। যোৱা কেইমাহমানৰ পৰা বেলুচিস্তানত পাকিস্তানৰ নিৰাপত্তা বাহিনীৰ ওপৰত আক্ৰমণ বৃদ্ধি পাইছে। স্বাধীনতা সমৰ্থক গোটসমূহে সঘনাই নিৰাপত্তা বাহিনীক লক্ষ্য কৰি লয়।

ডন কাকতে প্ৰকাশ কৰা অনুসৰি সোমবাৰে তুৰ্বটত কেচৰ উপ আয়ুক্তৰ কনভয়ক লক্ষ্য কৰি পথৰ কাষত বোমা বিস্ফোৰণত ৯ জন লেভিছ বিষয়া আৰু এজন পথচাৰী আহত হয়। আন এক কাণ্ডত কেচ জিলাৰ এখন চহৰত কেইবা ডজন অস্ত্ৰধাৰীয়ে ধুমুহাৰ সৃষ্টি কৰি এখন থানাত জুই লগাই আৰক্ষীৰ সৈতে তীব্ৰ বন্দুকৰ যুঁজৰ অন্তত পলায়ন কৰে।

বিষয়াসকলে জনোৱা মতে, উপ আয়ুক্তৰ কনভয় তুৰবাটৰ থানা পথত উপস্থিত হোৱাৰ লগে লগে এখন নিৰাপত্তাৰক্ষীৰ বাহনৰ কাষত এখন মটৰ চাইকেলত লগোৱা এটা ইম্প্ৰভাইজড বিস্ফোৰক যন্ত্ৰ বিস্ফোৰণ ঘটে। তুৰবাটৰ উপ আৰক্ষী অধীক্ষক নাজিৰ আহমেদে কয় যে এই শক্তিশালী বিস্ফোৰণত নিৰাপত্তাৰক্ষী বাহনখনত থকা কমেও ৯ জন লেভিছ জোৱান আৰু এজন পথচাৰী আহত হয়। বুলেটপ্ৰুফ বাহনেৰে গৈ থকা উপায়ুক্তগৰাকী কোনো ক্ষতি হোৱা নাই।

বিস্ফোৰণৰ লগে লগে নিৰাপত্তা বাহিনী আৰু আৰক্ষী জোৱান ঘটনাস্থলীত উপস্থিত হয়, আৰু আহতসকলক তুৰ্বট জিলা চিকিৎসালয়লৈ লৈ যোৱা হয়। চিকিৎসালয়ৰ বিষয়াসকলৰ উদ্ধৃতিৰে আৰক্ষীয়ে কয় যে দুজন কৰ্মীৰ অৱস্থা সংকটজনক। বিস্ফোৰণত এখন নিৰাপত্তাৰক্ষীৰ বাহন ধ্বংস হয়। আনহাতে উপায়ুক্তগৰাকীৰ বুলেটপ্ৰুফ বাহনখনো ক্ষতিগ্ৰস্ত হয়। ইয়াৰ উপৰিও কমেও এক ডজন অট্টালিকা আৰু ওচৰতে ৰখাই থোৱা পাঁচখন বাহনৰ ক্ষতিসাধন হয়।

ইয়াৰ পূৰ্বে ডজন ডজন উগ্ৰপন্থীয়ে কুচ জিলাৰ ভাগ চহৰত আক্ৰমণ চলাই লেভিছ আৰক্ষী থানা আৰু অন্যান্য চৰকাৰী ভৱনত জুই লগাইছিল। বিষয়াসকলে জনোৱা মতে, দুজন আক্ৰমণকাৰীও নিহত হৈছে। এটা মৃতদেহ সন্ত্ৰাসবাদ বিৰোধী বিভাগে বন্দী কৰাৰ বিপৰীতে আনটো মৃতদেহ পলায়ন কৰা উগ্ৰপন্থীয়ে লৈ যায়। বিষয়াসকলে জনোৱা মতে, ৪:১৫ বজাত মটৰ চাইকেলত প্ৰায় ৫০ জন অস্ত্ৰধাৰী লোক আহি এখন পিকআপ ট্ৰাক, আৰক্ষী আৰু লেভিছ থানাত আক্ৰমণ চলায়। লেভিছৰ জোৱানক পণবন্দী কৰি ষ্টেচনত গুলীচালনা কৰে।

গুলী বিনিময়ত নিহত হয় ভাগৰ এছ এইচ অ’ লুতুফ খোছা। কুচ্চৰ এছ এছ পি মাজুৰ ৰহমানে কয় যে আমাৰ আৰক্ষী বিষয়া শ্বহীদ হয়, আৰু এজন আৰক্ষী কনিষ্টবল মহম্মদ আফজাল খোছা আহত হয়। তেওঁ লগতে কয় যে দুজন উগ্ৰপন্থীও নিহত হৈছে। এছ এছ পিৰ মতে, অস্ত্ৰধাৰী লোককেইজনে ন্যায়িক লকআপত প্ৰৱেশ কৰি ছয়জন আণ্ডাৰট্ৰাইল কাৰাবন্দীক মুকলি কৰি দিয়ে। তেওঁ কয় যে সন্ত্ৰাসবাদীয়ে তহচিলৰ কাৰ্যালয়তো আক্ৰমণ কৰি পাটোৱাৰখানাৰ ৰেকৰ্ড আৰু ইয়াৰ আচবাব লুট কৰে। ৰাষ্ট্ৰীয় বেংকৰ স্থানীয় শাখাত প্ৰৱেশৰ চেষ্টা চলাইছিল এছএছপিয়ে। তেওঁ কয় যে থানাখন সম্পূৰ্ণৰূপে জ্বলাই দিয়া হৈছে। এই আক্ৰমণত গধুৰ অস্ত্ৰ ব্যৱহাৰ কৰা হয়, যাৰ ফলত নেশ্যনেল বেংকৰ ভৱনটোও ক্ষতিগ্ৰস্ত হয়।

हिन्दुस्थान समाचार / অৰৱিন্দ