অভিনেতা পৰেশ ৰাৱালৰ আগন্তুক ছবি ‘দ্য তাজ ষ্ট’ৰী’ৰ ট্ৰেইলাৰ ১৬ অক্টোবৰত মুক্তি পালে। ২ মিনিট ৫৮ ছেকেণ্ডৰ এই ট্ৰেইলাৰত দৰ্শকক চিনেমাখনৰ গুৰুতৰ আৰু স্পৰ্শকাতৰ বিষয়বস্তুৰ সৈতে পৰিচয় কৰাই দিয়া হৈছে। ট্ৰেইলাৰত পৰেশ ৰাৱালে বৌদ্ধিক সন্ত্ৰাসবাদ আৰু সামাজিক সমস্যাৰ সৈতে যুঁজি থকা এটা চৰিত্ৰত অভিনয় কৰিছে।
তুষাৰ অমৃশ গোৱালে পৰিচালনা কৰা ছবিখনৰ সৃষ্টিশীল প্ৰযোজক হিচাপে বিকাশ ৰাধেশ্যাম। সংগীত ৰচনা কৰিছে ৰোহিত শৰ্মাই। ট্ৰেইলাৰে নিজেই ইংগিত দিয়ে যে এইটো এটা সামাজিক আৰু ঐতিহাসিকভাৱে উল্লেখযোগ্য প্ৰকল্প। ছবিখনত পৰেশ ৰাৱালে বিষ্ণুদাস গাইডৰ চৰিত্ৰত অভিনয় কৰিছে। তেওঁৰ চৰিত্ৰটোৱে তাজমহল নিৰ্মাণৰ ঐতিহাসিক তথ্যক লৈ প্ৰশ্ন উত্থাপন কৰি দৰ্শকক চিন্তা কৰিবলৈ বাধ্য কৰে। স্বাধীনতাৰ ৭৯ বছৰৰ পাছতো ভাৰত বৌদ্ধিক সন্ত্ৰাসবাদৰ দাস হৈ আছে নেকি এই ছবিখনৰ কেন্দ্ৰীয় বাৰ্তা। এই থিমে সামাজিক আৰু ৰাজনৈতিক দৃষ্টিকোণৰ পৰা ছবিখনক অত্যন্ত গুৰুত্বপূৰ্ণ কৰি তুলিছে।
পৰেশ ৰাৱালৰ উপৰিও ছবিখনত জাকিৰ, অমৰুতা খানভিলকাৰ, স্নেহা ৱাঘ, আৰু নমিত দাসে গুৰুত্বপূৰ্ণ চৰিত্ৰত অভিনয় কৰিছে। তেওঁলোকৰ উপস্থিতিয়ে ছবিখনৰ আখ্যান আৰু অধিক শক্তিশালী কৰি তোলে। ট্ৰেইলাৰত দেখুওৱা দৃশ্যবোৰে স্পষ্টকৈ দেখুৱাইছে যে ছবিখনে সিংহাসন আৰু ক্ষমতা, ইতিহাস আৰু বৰ্তমান, ব্যক্তিগত আৰু সামাজিক সংঘাতৰ দৰে জটিল বিষয়সমূহৰ ওপৰত গুৰুত্ব আৰোপ কৰিছে। ২০২৫ চনৰ ৩১ অক্টোবৰত চিনেমাগৃহত মুক্তি পাবলগীয়া ‘দ্য তাজ ষ্ট’ৰী’ৰ ট্ৰেইলাৰ মুক্তি পোৱাৰ লগে লগে ছ’চিয়েল মিডিয়াত চৰ্চা লাভ কৰিছে। ছবিখনৰ স্পৰ্শকাতৰ বিষয় আৰু পৰেশ ৰাৱালৰ শক্তিশালী অভিনয়ক লৈ উৎফুল্লিত হৈ পৰিছে দৰ্শক। বহু অনুৰাগীয়ে লিখিছে, ট্ৰেইলাৰটো নিজেই চিন্তা-উদ্দীপক। পৰেশ ৰাৱালে এক উজ্জ্বল চৰিত্ৰত অভিনয় কৰিছে।
ছবিখনৰ পৰিচালক তুষাৰ অমৃশ গোৱালে ট্ৰেইলাৰ মুকলি অনুষ্ঠানত কয়, এই ছবিখনৰ জৰিয়তে আমি কেৱল ইতিহাসৰ কিছুমান দিশক লৈ প্ৰশ্ন উত্থাপন কৰাই নহয় আজিৰ সমাজত বৌদ্ধিক স্বাধীনতা আৰু সমালোচনাত্মক চিন্তাৰ গুৰুত্বৰ ওপৰতো আলোকপাত কৰিছো। এই ছবিখন কেৱল মনোৰঞ্জন নহয়, বৰঞ্চ দৰ্শকক চিন্তা আৰু প্ৰশ্ন কৰিবলৈও অনুপ্ৰাণিত কৰে।
हिन्दुस्थान समाचार / অৰৱিন্দ
