ধুবুৰী, ০৯ জানুৱাৰী (হি.স.)। ধুবুৰী জিলাৰ গৌৰীপুৰ আৰক্ষীৰ অভিযানত ১০ টাকৈ চোৰাং গৰু সহ এখন বাহন জব্দ কৰা হৈছে।

গৌৰীপুৰ আৰক্ষীৰ এক গোপন তথ্যৰ ভিত্তিত আৰক্ষীৰ এটা দলে পশ্চিম বংগৰ পৰা গৌৰীপুৰ অভিমুখে আহি থকা এখন ধানৰ গুৰি ভৰ্তি এএছ ১৭ চি ৭৭৭৮ নম্বৰৰ টাটা ডি আই বাহনক গৌৰীপুৰৰ চৌৰংগী মোৰৰ পৰা আৰক্ষীয়ে খেদি খেদি দলশিঙেৰ আলগা প্ৰথম খণ্ড গাঁৱত আটক কৰিবলৈ সক্ষম হয়।

বাহনখনৰ চালকজন আৰক্ষীৰ চকুত ধূলি দি বাহনখন এৰি থৈ পলায়ন কৰিবলৈ সক্ষম হয় যদিও আৰক্ষীয়ে ধানৰ গুৰি ভৰ্তি বাহনখনত তালাচী চলাই বাহনখনৰ ওপৰত ধানৰ গুৰি আৰু তলত ১০ টাকৈ চোৰাং গৰু উদ্ধাৰ কৰিবলৈ সক্ষম হয়। আৰক্ষীয়ে উদ্ধাৰকৃত ১০ টাকৈ চোৰাং গৰু সহ টাটা ডি আই বাহনখন জব্দ কৰি গৌৰীপুৰ থানালৈ লৈ আনে। ঘটনা সন্দৰ্ভত গৌৰীপুৰ আৰক্ষীয়ে তদন্ত অব্যাহত ৰাখিছে বুলি জানিব পৰা গৈছে।

---------------

হিন্দুস্থান সমাচাৰ / প্ৰকাশ ডেকা