নতুন দিল্লী, ০৬ জানুৱাৰী (হি.স.)। তাৰকা ফুটবলাৰ লিয়নেল মেছিয়ে যোৱা ৪ জানুৱাৰীত তেওঁৰ কৃতিত্বত আৰু এক উপলদ্ধি সংযোজন কৰিছিল যেতিয়া তেওঁক আমেৰিকাৰ সৰ্বোচ্চ অসামৰিক সন্মান ৰাষ্ট্ৰপতিৰ স্বাধীনতা পদক প্ৰদান কৰা হৈছিল। হোৱাইট হাউছে নিজৰ অফিচিয়েল এক্স হেণ্ডেলত বঁটা বিজয়ীসকলৰ নাম ঘোষণা কৰে।

আমেৰিকাৰ সমৃদ্ধি, মূল্যবোধ বা নিৰাপত্তা, বিশ্ব শান্তি বা অন্যান্য গুৰুত্বপূৰ্ণ সামাজিক, ৰাজহুৱা বা ব্যক্তিগত প্ৰচেষ্টাত অৰিহণা যোগোৱা ব্যক্তিক এই পদক প্ৰদান কৰা হয়। মেছিয়ে এই বঁটা লাভ কৰা প্ৰথমজন পুৰুষ ফুটবলাৰ (ছকাৰ খেলুৱৈ) আৰু ২০২২ চনত মেগান ৰেপিনোৰ পিছত এই ক্ৰীড়াৰ পৰা দ্বিতীয়জন খেলুৱৈ হিচাপে পৰিগণিত হয়। মাৰ্কিন ৰাষ্ট্ৰপতি জো বাইডেনে এই বঁটা প্ৰদান কৰে, আৰ্জেণ্টিনাৰ খেলুৱৈগৰাকীয়ে ১৯ গৰাকী প্ৰাপকৰ ভিতৰত অন্যতম।

মেছিৰ ক্লাব ইণ্টাৰ মিয়ামীয়ে এক বিবৃতিত কয়, মেছিয়ে অনুষ্ঠানৰ পূৰ্বে হোৱাইট হাউছক জনাইছিল যে তেওঁ নিজকে অতি সন্মানিত অনুভৱ কৰিছে আৰু এই সন্মান লাভ কৰাটো তেওঁৰ বাবে এক বৃহৎ সন্মান। অৱশ্যে সময়সূচীৰ সংঘাত আৰু পূৰ্বৰ প্ৰতিশ্ৰুতিৰ বাবে। ইয়াৰ বাবেই। তেওঁ উপস্থিত থাকিব নোৱাৰিলে আৰু তেওঁ কয় যে অদূৰ ভৱিষ্যতে লগ পোৱাৰ সুযোগ পাব বুলি আশা কৰিছে।

২০২৩ চনৰ জুলাই মাহত পেৰিছ চেণ্ট জাৰ্মেইনৰ পৰা বিনামূলীয়া ট্ৰেন্সফাৰত ইণ্টাৰ মিয়ামি যোগদান কৰা মেছিয়ে মেজৰ লীগ ছকাৰ (এম এল এছ) দলটোৰ হৈ ৩৯খন মেচত ৩৪টা গ’ল আৰু ১৮টা এছিষ্ট কৰিছে। তেওঁ এতিয়ালৈকে দলটোৰ সৈতে লীগ কাপ আৰু এম এল এছ চাপ’ৰ্টাৰ্ছ শ্বিল্ড লাভ কৰিছে। আমেৰিকাত থকা সময়ছোৱাত তেওঁ এবাৰ বেলন ডি অ’ৰ আৰু ২০২৩ চনত ফিফা পুৰুষৰ শ্ৰেষ্ঠ খেলুৱৈৰ সন্মান লাভ কৰাৰ লগতে যোৱা বছৰ আৰ্জেণ্টিনাক কোপা আমেৰিকাৰ খিতাপ সফলতাৰে ৰক্ষা কৰাত সহায় কৰিছিল। মিয়ামিৰ নিয়মীয়া ছিজনৰ ১৫খন খেলত অংশ ল’ব নোৱাৰিলেও তেওঁক এম এল এছৰ সৰ্বাধিক মূল্যৱান খেলুৱৈ হিচাপে নিৰ্বাচিত কৰা হয়।

हिन्दुस्थान समाचार / Monoj Kumar Saikia