-এফ টি এ সন্দৰ্ভত পুনৰ আলোচনা আৰম্ভ হোৱাক আদৰণি জনাইছে বাণিজ্য মন্ত্ৰালয়ে
নতুন দিল্লী, ২০ নৱেম্বৰ (হি.স.)। আগন্তুক ২০২৫ চনৰ নতুন বছৰত ভাৰত আৰু ব্ৰিটেইনৰ মাজত মুক্ত বাণিজ্য চুক্তি (এফটিএ) সম্পৰ্কীয় আলোচনা পুনৰ আৰম্ভ হ’ব। ব্ৰাজিলৰ ৰিঅ’ ডি জেনেইৰ’ত অনুষ্ঠিত জি-২০ সন্মিলনৰ সময়ত প্ৰধানমন্ত্ৰী নৰেন্দ্ৰ মোডী আৰু ব্ৰিটিছ প্ৰধানমন্ত্ৰী ছাৰ কেয়াৰ ষ্টাৰমাৰৰ মাজত হোৱা বৈঠকৰ পিছত এই কথা ঘোষণা কৰা হৈছে।
বাণিজ্য আৰু উদ্যোগ মন্ত্ৰালয়ে বুধবাৰে এই তথ্য প্ৰদান কৰিছে। ব্ৰিটেইনৰ প্ৰধানমন্ত্ৰী ছাৰ কেয়াৰ ষ্টাৰমাৰে ভাৰত আৰু ব্ৰিটেইনৰ মাজত মুক্ত বাণিজ্য চুক্তি (এফ টি এ)ৰ আলোচনা পুনৰ আৰম্ভ কৰাৰ ঘোষণাক মন্ত্ৰালয়ে আদৰণি জনাইছে। মন্ত্ৰালয়ে কয় যে ২০২৫ চনৰ আৰম্ভণিতে এফ টি এ সন্দৰ্ভত আলোচনাৰ তাৰিখ অতি সোনকালে কূটনৈতিক মাধ্যমেৰে চূড়ান্ত কৰা হ’ব।
ব্ৰিটিছ চৰকাৰে প্ৰকাশ কৰা এক বিবৃতিত কোৱা হৈছে যে প্ৰধানমন্ত্ৰী ছাৰ কেয়াৰ ষ্টাৰমাৰে নতুন বছৰত ব্ৰিটেইন-ভাৰতৰ বাণিজ্যিক আলোচনা পুনৰ আৰম্ভ হ’ব বুলি ঘোষণা কৰিছে। দুয়োখন দেশৰ মাজত প্ৰস্তাৱিত এফটিএৰ বাবে আলোচনা ২০২২ চনৰ জানুৱাৰী মাহৰ পৰা আৰম্ভ হৈছিল। এই পৰ্যন্ত দুয়োপক্ষৰ মাজত ১৪ ৰাউণ্ড আলোচনা হৈছে। অৱশ্যে বহু বিতৰ্কিত বিষয়ৰ সমাধান বাকী আছে।
বাণিজ্য মন্ত্ৰালয়ৰ মতে, এফটিএ আলোচনাই পূৰ্বে লাভ কৰা অগ্ৰগতিৰ ওপৰত ভিত্তি কৰি আলোচনা পুনৰ আৰম্ভ কৰিব আৰু বাণিজ্যিক চুক্তি দ্ৰুতভাৱে সম্পূৰ্ণ কৰাৰ বাবে ব্যৱধান দূৰ কৰাৰ চেষ্টা কৰিব। ব্ৰিটেইনৰ সৈতে ভাৰতৰ বাণিজ্যিক সম্পৰ্ক ক্ৰমাগতভাৱে বৃদ্ধি পাইছে। ২০২৪ চনৰ এপ্ৰিলৰ পৰা ছেপ্টেম্বৰলৈকে শেহতীয়া তথ্য অনুসৰি ভাৰতৰ পৰা ব্ৰিটেইনলৈ ৰপ্তানি ১২.৩৮ শতাংশ বৃদ্ধি পাই ২০২৩ চনৰ একে সময়ছোৱাত ৬.৫১ বিলিয়ন ডলাৰ হোৱাৰ বিপৰীতে ৭.৩২ বিলিয়ন ডলাৰ হৈছে। ভাৰতৰ বাবে ২০২৯-৩০ বিত্তীয় বৰ্ষৰ ভিতৰত এক ট্ৰিলিয়ন ডলাৰৰ ৰপ্তানিৰ লক্ষ্যত উপনীত হোৱাত ব্ৰিটেইন অগ্ৰাধিকাৰ দেশ, যিটো ২০২৯-৩০ চনৰ ভিতৰত ৩০ বিলিয়ন ডলাৰ হ’ব বুলি আশা কৰা হৈছে।
হিন্দুস্থান সমাচাৰ / অৰৱিন্দ
