গ্লাছগো, ৩০ জুলাই (হি.স.)। কমনৱেলথ গেমছত বুধবাৰে ইতিহাস সৃষ্টি কৰিলে ভাৰতীয় পেৰা এথলেটিকছ দলটোৱে। পুৰুষৰ ১০০ মিটাৰ টি ৪৭ ইভেণ্টত ক্ৰমে স্বৰ্ণ আৰু ৰূপৰ পদক লাভ কৰি দিলীপ গাভিট আৰু মহম্মদ বেচিলে ভাৰতৰ হৈ ঐতিহাসিক ডাবল প’ডিয়াম ফিনিছিং নিশ্চিত কৰে।

দিলীপ গাভিটে ১০.৭১ ছেকেণ্ড সময়েৰে স্বৰ্ণ পদক লাভ কৰি কমনৱেলথ গেমছৰ নতুন অভিলেখ গঢ়িবলৈ সক্ষম হয়। মহম্মদ বেচিলে ১০.৮৩ ছেকেণ্ড সময়েৰে ৰূপৰ পদক লাভ কৰে। এই ইভেণ্টত দুয়োগৰাকী ভাৰতীয় খেলুৱৈয়ে নিজৰ ছিজনৰ শ্ৰেষ্ঠত্ব অৰ্জন কৰে।

২০২৬ চনৰ কমনৱেলথ গেমছত ভাৰতৰ এয়া তৃতীয় স্বৰ্ণ পদক। ইয়াৰ পূৰ্বে ভাৰোত্তোলনত মিৰাবাই চানুৱে আৰু পেৰা শ্বট পুটত শৰ্মিলা ধনকাৰে স্বৰ্ণ পদক লাভ কৰিছে।

সংগ্ৰামৰ পৰা শীৰ্ষ সন্মিলনলৈ দিলীপ গাভিটৰ যাত্ৰা

মহাৰাষ্ট্ৰৰ নাছিক জিলাৰ সমীপৱৰ্তী এখন সৰু গাঁও টোৰাণ ডংৰিৰ এটা সাধাৰণ কৃষক পৰিয়ালত জন্মগ্ৰহণ কৰা দিলীপ গাৱিতৰ জীৱন সংগ্ৰামেৰে ভৰি পৰিছে। সৰুতে তেওঁ পিতৃ-মাতৃৰ সৈতে পথাৰত কাম কৰিছিল।

পাঁচ-ছয় বছৰ বয়সত গছৰ পৰা পৰি সোঁহাতত গুৰুতৰভাৱে আঘাতপ্ৰাপ্ত হয়। সময়মতে আৰু উপযুক্ত চিকিৎসাৰ অভাৱত আঘাত গেংগ্ৰিনলৈ পৰিণত হয়, আৰু তেওঁৰ হাতখন কিলাকুটিৰ তলত কাটিবলগীয়া হয়।

প্ৰতিকূলতাৰ মাজতো দিলীপে অধ্যৱসায় কৰি পেৰা এথলেটিকছত নিজৰ পৰিচয় প্ৰতিষ্ঠা কৰিছিল। তেওঁ এইবাৰ ইণ্ডিয়া অ’পেন আৰু নতুন দিল্লী গ্ৰেণ্ড প্ৰিক্সত স্বৰ্ণ পদক লাভ কৰে। ২০২২ চনৰ এছিয়ান পেৰা গেমছত পুৰুষৰ ৪০০ মিটাৰ টি৪৭ ইভেণ্টতো স্বৰ্ণ পদক লাভ কৰিছে।

গ্লাছগোত অনুষ্ঠিত হোৱা ১০০ মিটাৰ টি ৪৭ ইভেণ্টত দিলীপ আৰু মহম্মদ বেচিলৰ তাৰকাময় প্ৰদৰ্শন ভাৰতীয় পেৰা এথলেটিকছৰ বাবে এক ঐতিহাসিক কৃতিত্ব বুলি গণ্য কৰা হয়। একেলগে প’ডিয়ামত স্থান দখল কৰি দুয়োগৰাকী খেলুৱৈয়ে ভাৰতলৈ গৌৰৱ কঢ়িয়াই আনি কমনৱেলথ গেমছত দেশৰ পদকৰ সংখ্যা যথেষ্ট বৃদ্ধি কৰে।

-----------------

হিন্দুস্থান সমাচাৰ / অৰৱিন্দ