নতুন দিল্লী, ২২ জুলাই (হি.স.)। গ্ৰাহক সামগ্ৰীৰ আগশাৰীৰ কোম্পানী নেচলে ইণ্ডিয়াই ২০২৬-২৭ বিত্তীয় বৰ্ষৰ প্ৰথম ত্ৰৈমাসিক (এপ্ৰিল-জুন)ৰ ফলাফল ঘোষণা কৰিছে । এপ্ৰিল-জুন ত্ৰৈমাসিকত নেচলে ইণ্ডিয়াৰ সমন্বিত নিকা লাভ ৪৮.২৬% বৃদ্ধি পাই ৯৫৮.৬৮ কোটি ₹ হৈছে। পূৰ্বৰ ২০২৫-২৬ বিত্তীয় বৰ্ষৰ এপ্ৰিল-জুন ত্ৰৈমাসিকত ইয়াৰ সমন্বিত নিকা লাভ আছিল ₹৬৪৬.৫৯ কোটি ।
বুধবাৰে ষ্টক এক্সচেঞ্জত দাখিল কৰি কোম্পানীটোৱে উল্লেখ কৰিছে যে চলিত বিত্তীয় বৰ্ষ ২০২৬-২৭ৰ প্ৰথম ত্ৰৈমাসিকত সামগ্ৰী বিক্ৰীৰ পৰা নেচলে ইণ্ডিয়াৰ ৰাজহ ২৫.৪% বৃদ্ধি পাই ৬,৩৬৩.২৭ কোটি ₹ হৈছে, যিটো পূৰ্বৰ বিত্তীয় বৰ্ষৰ একে সময়ছোৱাত ৫,০৭৩.৯৬ কোটি টকা আছিল।
নেচলে ইণ্ডিয়াৰ অধ্যক্ষ আৰু পৰিচালন সঞ্চালক (চিএমডি) মনীষ তিৱাৰীয়ে কয়, আমি ত্ৰিমাসিকভাৱে শক্তিশালী প্ৰদৰ্শন আগবঢ়াইছো, বিক্ৰী ২৫.৪ শতাংশ বৃদ্ধি পাইছে, ভলিউম বৃদ্ধিৰ ফলত। বিক্ৰী ৬,৩৬৩.৩ কোটি টকাত উপনীত হৈছে, যিটো আমাৰ ব্ৰেণ্ডসমূহৰ ওপৰত গ্ৰাহকৰ অবিৰত আস্থা আৰু ফলপ্ৰসূ নিষ্পাদনৰ দ্বাৰা সমৰ্থিত। ভূ-ৰাজনৈতিক প্ৰত্যাহ্বানৰ মাজতো ৰপ্তানি ৩৫.৬ শতাংশ বৃদ্ধি পাইছে।
একেদৰে ২০২৬-২৭ বিত্তীয় বৰ্ষৰ প্ৰথম ত্ৰৈমাসিকত নেচলে ইণ্ডিয়াৰ মুঠ আয় ২৫.৫ শতাংশ বৃদ্ধি পাই ৬,৪০০.৬৫ কোটি ₹ হৈছে, যিটো যোৱা বিত্তীয় বৰ্ষৰ একে সময়ছোৱাত ৫,১০০.৩৩ কোটি টকা আছিল । কোম্পানীটোৰ মুঠ খৰচ ২০.৭১ শতাংশ বৃদ্ধি পাই ৫,০৭০.০৩ কোটি ₹ হয় ।
এপ্ৰিল-জুন ত্ৰৈমাসিকত ঘৰুৱা বিক্ৰী ২৫ শতাংশ বৃদ্ধি পাই ৬,০৭৩.০৫ কোটি টকা হয়, যিটো যোৱা বিত্তীয় বৰ্ষৰ একেটা ত্ৰৈমাসিকত ৪,৮৬০.০১ কোটি টকা আছিল । ইফালে কোম্পানীটোৰ ৰপ্তানি ৰাজহ ৩৫.৬৪ শতাংশ বৃদ্ধি পাই ২৯০.২২ কোটি ₹ হয়।
তিৱাৰীয়ে কয় যে প্ৰথম ত্ৰৈমাসিকৰ সময়ছোৱাত কোম্পানীটোৱে নিজৰ ব্ৰেণ্ডসমূহত বিনিয়োগ বৃদ্ধি কৰাৰ লগতে পৰিচালনা ব্যয় ৰাহি কৰাৰ প্ৰচেষ্টা ত্বৰান্বিত কৰি ৰাখিছে। বিজ্ঞাপনৰ ব্যয়ও ৪০ শতাংশতকৈ অধিক বৃদ্ধি পাইছে, আৰু কোম্পানীটোৰ কৰ পূৰ্বে আয় (ইবিআইটিডিএ)ৰ মাৰ্জিন ২৪.২ শতাংশ।
হাৰিয়ানাৰ গুৰুগ্ৰামত মুখ্য কাৰ্যালয় থকা নেচলে ইণ্ডিয়া হৈছে এক আগশাৰীৰ গ্ৰাহক সামগ্ৰী কোম্পানী। ১৯১২ চনত প্ৰতিষ্ঠা হোৱা নেচলেই মেগী, নেস্কাফে, কিটকেট, চেৰেলাকৰ দৰে জনপ্ৰিয় ব্ৰেণ্ড নিৰ্মাণ কৰে। ভাৰতত কোম্পানীটোৰ মুঠ ৯টা উৎপাদন কাৰখানা আছে।
-----------------
হিন্দুস্থান সমাচাৰ / অৰৱিন্দ
25 Jul 2026
