তেহৰাণ/ৱাশ্বিংটন, ১৮ জুলাই (হি.স.)। ইৰাণৰ হৰমুজ জলদ্বীপ যুদ্ধক্ষেত্ৰলৈ ৰূপান্তৰিত হৈছে। আমেৰিকা আৰু ইৰাণৰ মাজত যুদ্ধ কমি যোৱাৰ কোনো লক্ষণ দেখা পোৱা নাই। আমেৰিকাৰ চেণ্ট্ৰেল কমাণ্ডে (চেণ্টকাম) ইৰাণৰ ওপৰত নতুনকৈ আক্ৰমণ চলাইছে। ইৰাণৰ দাবী যে শনিবাৰে পুৱা হৰমুজ জলদ্বীপৰ কাষৰীয়া হৰমোজগান প্ৰদেশত সংঘটিত আক্ৰমণত কমেও তিনিজন সাধাৰণ নাগৰিক নিহত হোৱাৰ লগতে আন ৮ জন আহত হয়। চেণ্টকমে এই দাবী অস্বীকাৰ কৰি কয় যে দুখন তেল টেংকাৰে হৰমুজ জলদ্বীপত মাইনত খুন্দা মাৰে আৰু ইয়াৰ ফলত বিস্ফোৰণ ঘটে । বাহৰেইন, জৰ্ডান, কুৱেইটত থকা আমেৰিকাৰ সামৰিক ঘাটিসমূহক লক্ষ্য কৰি লৈছে ইৰাণৰ সেনাই।

আল জাজিৰা, চিএনএন, গালফ নিউজ, আৰু চিবিএছ নিউজৰ বাতৰি অনুসৰি, ইৰাণৰ সেনাবাহিনীৰ উদ্ধৃতিৰে তাছনিম সংবাদ সংস্থাই কয় যে ড্ৰ’ন আক্ৰমণৰ ফলত কুৱেইট আৰু জৰ্ডানত আমেৰিকাৰ কেইবাটাও সামৰিক আন্তঃগাঁথনি লক্ষ্য কৰি লোৱা হৈছে । ইৰাণে সকীয়াই দিছে যে তেওঁলোকৰ আক্ৰমণ তীব্ৰতৰ হ’ব। বন্দৰ আব্বাছৰ বিষয়াসকলে বিদ্যুতৰ সুবিধা আৰু এটা ৰে’ল ষ্টেচনত আক্ৰমণৰ খবৰ দিয়ে। এই সংঘৰ্ষৰ ফলত উপসাগৰীয় অঞ্চলতো উত্তেজনা বৃদ্ধি পাইছে। কাটাৰে কয় যে ডোহাৰ সমীপত ক্ষেপণাস্ত্ৰ আক্ৰমণক বাধা দিছিল। কাটাৰে ইৰাণৰ বিৰুদ্ধে সামৰিক ব্যৱস্থা ল’বলৈ সন্মতি দিয়া দাবীক ভিত্তিহীন বুলি উলাই কৰে। ডুবাইৰ ডাউনটাউনত বিস্ফোৰণৰ দাবী খাৰিজ কৰিলে ডুবাইৰ বিষয়াসকলে।

চেণ্টকমে কয় যে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ নিৰ্দেশত একেৰাহে সপ্তম নিশা ইৰাণৰ ওপৰত সেনাই আক্ৰমণ চলাইছিল । ইছলামিক ৰিভল্যুচনেৰী গাৰ্ড কৰ্পছে দাবী কৰিছে যে বিগত কেইঘণ্টামানৰ ভিতৰত আমেৰিকাৰ বিমান আক্ৰমণ তীব্ৰতৰ হৈ পৰিছে। মধ্য চহৰ ইয়াজদ আৰু দক্ষিণৰ চহৰ লাৰ, আহভাজ, ছিৰিক, বুশ্বেহৰ, বান্দৰ আব্বাছ, আৰু দাৰাবত বিস্ফোৰণ সংঘটিত হয়। কেছম দ্বীপতো একেৰাহে দ্বিতীয় নিশা বিস্ফোৰণ সংঘটিত হয়। হৰমোজগান প্ৰদেশৰ স্থানীয় বিষয়াসকলে জনোৱা মতে, আমেৰিকাৰ বিমান আক্ৰমণে প্ৰদেশখনৰ দুখন দলং আৰু এটা সুৰংগক লক্ষ্য কৰি লৈছিল। শনিবাৰে পুৱা প্ৰদেশখনত সংঘটিত কেইবাটাও আক্ৰমণত তিনিজন লোক নিহত হোৱাৰ লগতে আন ৮ জন আহত হয় বুলি হৰমোজগানৰ উপ-ৰাজ্যপালগৰাকীয়ে জনায়।

আই আৰ জি চিয়ে জনোৱা মতে, বুশ্বেহৰৰ ওপৰেৰে এখন এম কিউ-৯ ড্ৰ’নক অনুসৰণ কৰি ভূপাতিত কৰি পেলোৱা হৈছিল। তদুপৰি উত্তৰ ভাৰত মহাসাগৰত আমেৰিকাৰ এখন জাহাজক তীৰৰ পৰা সাগৰলৈ ক্ৰুজ মিছাইলেৰে লক্ষ্য কৰি লোৱা হৈছিল। বাহৰেইনত থকা আমেৰিকাৰ সামৰিক ঘাটিত আক্ৰমণৰ কথাও নিশ্চিত কৰিছে আই আৰ জি চিয়ে। আই আৰ জি চিয়ে দাবী কৰা মতে, আমেৰিকা সমৰ্থিত চাৰিখন জাহাজে হৰমুজ জলদ্বীপ পাৰ হ’বলৈ চেষ্টা কৰিছিল যদিও ক্ষেপণাস্ত্ৰ আৰু ড্ৰ’নৰ সংযুক্ত অভিযানৰ সময়ত ৰখাই দিয়া হৈছিল। ইয়াৰ উপৰিও হৰমুজ জলদ্বীপৰ দক্ষিণে থকা মাইনফিল্ডৰ মাজেৰে পাৰ হৈ যোৱাৰ পিছত দুখন তেল টেংকাৰ বিস্ফোৰণ হৈ জুই লাগিছিল।

তাছনিমৰ মতে ইৰাণৰ সেনাই কুৱেইট আৰু জৰ্ডানৰ কেইবাটাও আমেৰিকাৰ সামৰিক আন্তঃগাঁথনি স্থানক লক্ষ্য কৰি ড্ৰ’ন আক্ৰমণ চলাইছে। এই স্থানসমূহৰ ভিতৰত আছে কেম্প উডাইৰী (কুৱেইট) গোলাবাৰুদ ডিপো, আলী আল চেলেম ঘাটি (কুৱেইট) মুখ্য কাৰ্যালয়ৰ ভৱন, গোলাবাৰুদ ডিপো আৰু ওচৰৰ সংযোগী দলং, মুৱাফাক ছালটি, আল আজৰাক বিমান ঘাটি (জৰ্ডান), আৰু সামৰিক ইন্ধনৰ টেংক। ইফালে ইৰাণৰ সৰ্বোচ্চ নেতা আয়াতুল্লাহ ছেইয়দ মোজতাবা খামেনেইৰ জ্যেষ্ঠ সামৰিক উপদেষ্টা মহচেন ৰেজাইয়ে সকীয়াই দিছে যে ১৪ দফীয়া চুক্তি ভংগ হোৱাৰ পিছত আমেৰিকাই ইছলামিক ৰিপাব্লিকৰ বিৰুদ্ধে চলি থকা সংঘাত আৰু সামৰিক অভিযান অব্যাহত ৰাখিলে তেহৰানে প্ৰতিশোধমূলক আক্ৰমণৰ বাহিৰেও ব্যৱস্থা গ্ৰহণ কৰিব।

-----------------

হিন্দুস্থান সমাচাৰ / অৰৱিন্দ