তেহৰাণ, ১৭ জুলাই (হি.স.)। ইৰাণৰ সশস্ত্ৰ বাহিনীৰ জ্যেষ্ঠ মুখপাত্ৰ ব্ৰিগেডিয়াৰ জেনেৰেল আবোলফাজল শ্বেকাৰচিয়ে বৃহস্পতিবাৰে (স্থানীয় সময় অনুসৰি) সকীয়াই দিয়ে যে দেশখনৰ সামৰিক সুবিধাসমূহ আক্ৰমণ কৰিলে তেহৰানে সমগ্ৰ পশ্চিম এছিয়াত থকা আমেৰিকাৰ সামৰিক ঘাটিসমূহত আক্ৰমণ কৰিব। তেওঁ কয় যে হৰমুজ জলদ্বীপত নিৰাপত্তাহীনতাৰ মূল কাৰণ হৈছে আমেৰিকাৰ সামৰিক উপস্থিতি । এই তথ্য ইৰাণ ৱায়াৰ, ইছলামিক ৰিপাব্লিক অৱ ইৰাণ ব্ৰডকাষ্টিং (আই আৰ আই বি), আৰু ফক্স নিউজে প্ৰকাশ কৰিছে।

আই আৰ আই বিত সম্প্ৰচাৰিত এক সাক্ষাৎকাৰত শ্বেকাৰচিয়ে কয় যে আমেৰিকা আৰু ইজৰাইলৰ এই অঞ্চলত উপস্থিত থকাৰ কোনো অধিকাৰ নাই। ইৰাণৰ নিয়ন্ত্ৰণত নিৰাপদ হৰমুজ জলদ্বীপ। এই কৌশলগত জলপথত উত্তেজনা বৃদ্ধি পোৱাৰ বাবে তেওঁ আমেৰিকাৰ সামৰিক অৱৰোধক দোষাৰোপ কৰে। শ্বেকাৰচিয়ে চুবুৰীয়া দেশসমূহক ইৰাণৰ সৈতে সহযোগিতা কৰিবলৈ আহ্বান জনায়।

মুখপাত্ৰগৰাকীয়ে কয় যে যদিহে ক্ষতি হয় তেন্তে অঞ্চলটোৰ আমেৰিকাৰ সকলো আন্তঃগাঁথনি আমাৰ লক্ষ্য হ’ব । শত্ৰুপক্ষক আমি বলপূৰ্বক আক্ৰমণ কৰিম বুলিও কয়। আমি বছৰ বছৰ ধৰি যুঁজিব পাৰো। ইৰাণৰ খাটাম আল-আনবিয়া কেন্দ্ৰীয় মুখ্য কাৰ্যালয়ৰ মুখপাত্ৰৰ পৰাও একেধৰণৰ সতৰ্কবাণীৰ পিছতে তেওঁৰ এই মন্তব্য। খাটাম আল-আনবিয়া কেন্দ্ৰীয় মুখ্য কাৰ্যালয় হৈছে ইৰাণৰ সৰ্ববৃহৎ অপাৰেচনেল কমাণ্ড ইউনিট। ই সেনা আৰু ইছলামিক ৰিভল্যুচনেৰী গাৰ্ড কৰ্পছ (আই আৰ জি চি)ৰ মাজত সামৰিক অভিযানৰ সমন্বয় সাধন কৰে।

খাটাম আল আনবিয়া কেন্দ্ৰীয় মুখ্য কাৰ্যালয়ৰ বিবৃতিত কোৱা হৈছে যে আমেৰিকাই কোনো কাৰণতে আৰু কোনো ধৰণে এই জলপথত হস্তক্ষেপ কৰিবলৈ দিয়া নহ’ব। বিবৃতিটোত কোৱা হৈছে যে আমেৰিকাই ইৰাণৰ তেল আৰু গেছ ৰপ্তানি পথক লক্ষ্য কৰি লৈছে। যদি এই ধাৰা বন্ধ নহয় তেন্তে অঞ্চলটোত আমেৰিকা আৰু ইয়াৰ মিত্ৰ দেশসমূহৰ স্বাৰ্থৰ সৈতে জড়িত সকলো আন্তঃগাঁথনি ধ্বংস হৈ যাব।’

শেহতীয়াকৈ আমেৰিকাই ইৰাণৰ দক্ষিণ বন্দৰসমূহত নৌসেনাৰ অৱৰোধ পুনৰ আৰম্ভ কৰাৰ লগতে দক্ষিণ ইৰাণৰ সামৰিক ঘাটিসমূহত বিমান আক্ৰমণ তীব্ৰতৰ কৰাৰ সময়তে এই ভাবুকি আহিছে । আমেৰিকাৰ ৰাষ্ট্ৰপতি ড’নাল্ড ট্ৰাম্পে সকীয়াই দিছে যে যদি কোনো চুক্তিত উপনীত নহয় তেন্তে আমেৰিকাৰ আক্ৰমণ ইৰাণৰ আন্তঃগাঁথনি, বিদ্যুৎ কেন্দ্ৰ আৰু দলংকে ধৰি সম্প্ৰসাৰিত হ’ব । আমেৰিকাৰ ৰাষ্ট্ৰপতি ট্ৰাম্পে ফক্স নিউজক কয় যে অহা সপ্তাহ ইৰাণৰ বাবে অতি শোচনীয় হ'ব। আমেৰিকাই বিদ্যুৎ কেন্দ্ৰ আৰু দলং আক্ৰমণ কৰিব।

-----------------

হিন্দুস্থান সমাচাৰ / অৰৱিন্দ