ৱাশ্বিংটন, ১৬ জুলাই (হি.স.)। ৰাষ্ট্ৰপতি ড’নাল্ড ট্ৰাম্পে বুধবাৰে ঘোষণা কৰে যে ইৰাণে ২০২৪ চনৰ ডিচেম্বৰৰ পৰা ইৰাণত ভুলকৈ বন্দী হৈ থকা এগৰাকী আমেৰিকান মহিলাক মুকলি কৰি দিছে । ট্ৰাম্পে তেওঁৰ পৰিচয় প্ৰকাশ কৰা নাই বা মুক্তিৰ পৰিস্থিতিৰ বিষয়ে কোনো অতিৰিক্ত তথ্য প্ৰদান কৰা নাই। ইয়াৰ বাবে তেওঁ ইৰাণৰ প্ৰতি কৃতজ্ঞতা প্ৰকাশ কৰে ।

ৰাষ্ট্ৰপতি ড’নাল্ড ট্ৰাম্পে তেওঁৰ ট্ৰুথছ’চিয়েলত এই ভাল খবৰটো শ্বেয়াৰ কৰে। তেওঁ লিখিছে, ইৰাণে এগৰাকী আমেৰিকান নাগৰিকক দেশ এৰি যাবলৈ অনুমতি দিছে । ২০২৪ চনৰ ডিচেম্বৰ মাহত 'স্লিপি জো বাইডেন'ৰ ৰাষ্ট্ৰপতিত্বৰ সময়ত তেওঁক অন্যায়ভাৱে আটক কৰা হৈছিল। এতিয়া তেওঁ নিৰাপদে ইৰাণৰ পৰা ওলাই আহিছে আৰু ভালেই আছে আমেৰিকাই ইৰাণৰ এই সদিচ্ছাৰ ইংগিতৰ শলাগ লৈছে।”

চিএনএনৰ বাতৰি অনুসৰি ৰাষ্ট্ৰপতিগৰাকীৰ ট্ৰুথছ’চিয়েল পদৰ পিছত মহিলাগৰাকীৰ পৰিচয় সন্দৰ্ভত হোৱাইট হাউছ আৰু পণবন্দী বিষয়ৰ বিশেষ দূতৰ কাৰ্যালয়ৰ সৈতে যোগাযোগ কৰা হয়। পিছত মুকলি কৰি দিয়া মহিলাগৰাকীক তেওঁৰ অধিবক্তাই ডিনা কাৰাৰী বুলি চিনাক্ত কৰে।

আন্তঃৰাষ্ট্ৰীয় মানৱ অধিকাৰ অধিবক্তা জেৰেড জেনছাৰে এক্সত লিখিছে, মই ঘোষণা কৰি আনন্দিত আৰু উৎফুল্লিত যে মোৰ ক্লায়েণ্ট ডিনা কাৰাৰী, এগৰাকী আমেৰিকাৰ নাগৰিক এতিয়া মুক্ত। ২০২৪ চনৰ ডিচেম্বৰৰ পৰা তেওঁক ভুৱা অভিযোগত ইৰাণত ৰখা হৈছিল। তেওঁ ৰাষ্ট্ৰপতি ট্ৰাম্পক ধন্যবাদ জনাই কয় যে তেওঁৰ ক্লায়েণ্ট এতিয়া নিৰাপদ আৰু আমেৰিকালৈ উভতি আহিছে ।

আমেৰিকাৰ এজন বিষয়াই জনোৱা মতে, যোৱা মাহৰ পৰ্যন্ত ইৰাণত বন্দী হৈ থকা কমেও ছয়জন আমেৰিকান লোকৰ অৱস্থা আমেৰিকা চৰকাৰে নিৰীক্ষণ কৰি আছে। ইয়াৰে দুজনক ভুলকৈ আটক কৰা বুলি চিনাক্ত কৰা হৈছে ।

-----------------

হিন্দুস্থান সমাচাৰ / অৰৱিন্দ