অভিনেত্ৰী কংগনা ৰানাৱতৰ আগন্তুক ছবি ‘ভাৰত ভাগ্য বিধাতা’ৰ বাবে বাতৰিৰ শিৰোনাম। ছবিখনৰ ট্ৰেইলাৰ আৰু প্ৰথমটো গীত ‘নব নব নব’ৰ প্ৰতি ইতিবাচক সঁহাৰিৰ পিছত এতিয়া নিৰ্মাতাসকলে ইয়াৰ টাইটেল ট্ৰেক মুকলি কৰিছে। এই ছবিখনৰ জৰিয়তে প্ৰায় ডেৰ বছৰৰ মূৰত ডাঙৰ পৰ্দালৈ ঘূৰি আহিছে কংগনা। ইয়াৰ পূৰ্বে ২০২৫ চনৰ জানুৱাৰী মাহত মুক্তি পোৱা ‘ইমাৰ্জেন্সি’ ছবিখনত অভিনয় কৰিছিল।
মুক্তি পোৱা টাইটেল ট্ৰেকটোত কংগনাই এগৰাকী নিষ্ঠাবান নাৰ্ছক চিত্ৰিত কৰিছে যিয়ে ৰোগীক সেৱা আগবঢ়ায় আৰু নিজৰ কৰ্তব্যসমূহ পৰম নিষ্ঠাৰে পালন কৰে। গীতটোৱে তাইৰ চৰিত্ৰৰ সংগ্ৰাম, সংবেদনশীলতা আৰু সেৱাৰ মনোভাৱক উজ্জ্বল কৰি তুলিছে। প্ৰখ্যাত গায়ক সুখৱিন্দৰ সিঙে গীতটোৰ বাবে নিজৰ শক্তিশালী কণ্ঠ ধাৰলৈ দিছে, আনহাতে অমন পন্তই সংগীত ৰচনা কৰিছিল। গীতৰ কথা লিখিছে ছবিখনৰ পৰিচালক মনোজ তপৰিয়াই।
‘ভাৰত ভাগ্য বিধাতা’ মুম্বাইত ২৬/১১ সন্ত্ৰাসবাদী আক্ৰমণৰ সময়ত কামা হস্পিতালত সংঘটিত হোৱা সঁচা ঘটনাৰ পৰা অনুপ্ৰাণিত। ছবিখনত কংগনা ৰানাৱটে নাৰ্ছ গীতা মাধৱৰ চৰিত্ৰত অভিনয় কৰিছে। গিৰিজা অক, স্মিতা টাম্বে, আৰু আদিত্য মিশ্ৰইও গুৰুত্বপূৰ্ণ চৰিত্ৰত অভিনয় কৰিছে। স্পৰ্শকাতৰ আৰু প্ৰেৰণাদায়ক কাহিনীৰ আধাৰত নিৰ্মিত ছবিখন অহা ১২ জুনত চিনেমাগৃহত মুক্তি পোৱাৰ কথা।
হিন্দুস্থান সমাচাৰ / অৰৱিন্দ
