নতুন দিল্লী, ৩০ জুন (হি.স.)। কেন্দ্ৰীয় গৃহ আৰু সমবায় মন্ত্ৰী অমিত শ্বাহে মঙলবাৰে মুকলি কৰে ফচিআৰএ ২.০ আৰু ই-ওচিআই (ইলেক্টনিক অভাৰচিজ চিটিজেন অফ ইণ্ডিয়া) কাৰ্ড। তেওঁ কয় যে এই দুটা ডিজিটেল পদক্ষেপে নাগৰিকৰ সুবিধা বৃদ্ধি কৰিব, কাগজ-পত্ৰ হ্ৰাস কৰিব, আৰু বিদেশী অৱদানৰ (এফচিআৰএ) বাস্তৱ সময়ৰ নিৰীক্ষণ নিশ্চিত কৰিব।
এই অনুষ্ঠানত গৃহ সচিব গোবিন্দ মোহন, বৈদেশিক সচিব বিক্ৰম মিশ্ৰী, চোৰাংচোৱা ব্যুৰোৰ বিশেষ সঞ্চালক মহেশ দীক্ষিত,কে ধৰি অন্যান্য জ্যেষ্ঠ বিষয়াসকলো উপস্থিত থাকে।
অমিত শ্বাহে কয় যে প্ৰধানমন্ত্ৰী নৰেন্দ্ৰ মোডীৰ নূন্যতম চৰকাৰ, সৰ্বোচ্চ শাসনৰ দৃষ্টিভংগীৰ লগত সংগতি ৰাখি প্ৰযুক্তিৰ জৰিয়তে শাসন ব্যৱস্থা অধিক স্বচ্ছ, সহজ, আৰু সুৰক্ষিত কৰি তোলা হৈছে। তেওঁ কয় যে এফচিআৰএ ব্যৱস্থাটো আগতে ফাইল আৰু জটিল পদ্ধতিৰ সৈতে জড়িত আছিল যদিও এতিয়া ইয়াক আধুনিকীকৰণ কৰি অধিক ফলপ্ৰসূ কৰা হৈছে।
তেওঁ কয় যে এফচিআৰএ ২.০ পৰ্টেলে এতিয়া আবেদন, নবীকৰণ, আৰু বাৰ্ষিক ৰিটাৰ্ণকে ধৰি সকলো মূল প্ৰক্ৰিয়াক সম্পূৰ্ণৰূপে ডিজিটেল কৰি তুলিব । ইয়াৰ দ্বাৰা ভৌতিক নথিপত্ৰ দাখিলৰ প্ৰয়োজনীয়তা নাইকিয়া হ’ব আৰু ই-চিন-ভিত্তিক প্ৰমাণীকৰণ, অ’চিআৰ (অপটিকেল চৰিত্ৰ চিনাক্তকৰণ)-ভিত্তিক নথিপত্ৰ বিশ্লেষণ, আৰু এন জি অ’ দৰ্পনকে ধৰি বিভিন্ন চৰকাৰী তথ্যকোষৰ সৈতে সংহত পৰীক্ষণৰ দৰে বৈশিষ্ট্য প্ৰদান কৰা হ’ব। তেওঁ কয় যে এই পৰ্টেলৰ জৰিয়তে বিদেশী অৱদানৰ লাভ আৰু ব্যৱহাৰৰ ফলপ্ৰসূ বাস্তৱ সময়ৰ নিৰীক্ষণ সম্ভৱ হ’ব, যাৰ ফলত ৰাষ্ট্ৰীয় নিৰাপত্তা আৰু সুশাসন দুয়োটা শক্তিশালী হ’ব।
গৃহমন্ত্ৰীয়ে উল্লেখ কৰে যে অনাগত মাহত এফচিআৰএ মোবাইল এপ, কৃত্ৰিম বুদ্ধিমত্তা (এআই) ভিত্তিক চেটবট, বেংকৰ বাবে নিৰ্দিষ্ট অনলাইন ডেচব’ৰ্ডো মুকলি কৰা হ’ব।
বিদেশত বাস কৰা ভাৰতীয় মূলৰ লোকসকলৰ বাবে ই-অ’চিআই কাৰ্ডক এক ডাঙৰ সুবিধা বুলি অভিহিত কৰি শ্বাহে কয় যে ইয়াৰ দ্বাৰা ৫০ লাখৰো অধিক অ’চিআই কাৰ্ডধাৰীক উপকৃত হ’ব। তেওঁ লগতে কয় যে এতিয়া ২০ বছৰ বয়সৰ পিছত নতুন পাছপ’ৰ্ট জাৰি কৰাৰ লগে লগে অ’চিআইৰ পুস্তিকা পুনৰ জাৰি কৰাৰ প্ৰয়োজন নহ’ব।কাৰ্ডধাৰীয়ে কেৱল অনলাইনযোগে নতুন পাছপ’ৰ্টৰ সবিশেষ আপডেট কৰিব লাগিব। তেওঁ কয় যে ডিজিটেল অ’চিআই কাৰ্ডে হেৰুৱা বা নষ্ট হোৱা নথি-পত্ৰৰ সমস্যা দূৰ কৰিব আৰু লগতে বাস্তৱ সময়ৰ পৰীক্ষণৰ সুবিধাও লাভ কৰিব।
মন কৰিবলগীয়া যে বৰ্তমান দেশত বিদেশী অৱদান (নিয়ন্ত্ৰণ) আইন (এফচিআৰএ)ৰ অধীনত প্ৰায় ১৪,৫০০ সক্ৰিয় সংস্থা পঞ্জীয়ন কৰা হৈছে। প্ৰতি বছৰে প্ৰায় ১৫,০০০ৰ পৰা ২০,০০০ নতুন বা নবীকৰণৰ আবেদন আৰু প্ৰায় ১৭,০০০ বাৰ্ষিক ৰিটাৰ্ণ লাভ কৰা হয়। মেঘৰাজ (ৰাষ্ট্ৰীয় চৰকাৰী ক্লাউড)ত প্ৰস্তুত কৰা এফচিআৰএ ২.০ পৰ্টেলটো পেন, আধাৰ, অ’চিআই, এনজিঅ’ দৰ্পান, আইচিএআইৰ ইউডিএন ব্যৱস্থা, বেংককে ধৰি বিভিন্ন চৰকাৰী ব্যৱস্থাৰ সৈতে একত্ৰিত কৰা হৈছে। ইয়াৰ ফলত আবেদন প্ৰক্ৰিয়াকৰণ ক্ষিপ্ৰ হ’ব, অনুসৰণ নিৰীক্ষণ শক্তিশালী হ’ব, আৰু বিদেশী অৱদানৰ অপব্যৱহাৰৰ বিৰুদ্ধে ফলপ্ৰসূ নিয়ন্ত্ৰণ নিশ্চিত হ’ব।
ই-অ’চিআই কাৰ্ড ব্যৱস্থাৰ অধীনত আবেদনৰ পৰা কাৰ্ড প্ৰদানলৈকে সমগ্ৰ প্ৰক্ৰিয়াটো অনলাইন হ’ব। ইয়াৰ ফলত ভৌতিক নথি-পত্ৰৰ প্ৰয়োজনীয়তা নাইকিয়া হ’ব, প্ৰক্ৰিয়াকৰণৰ সময় হ্ৰাস পাব, প্ৰশাসনিক খৰচ কম হ’ব আৰু বিমানবন্দৰত ডিজিটেল পৰীক্ষণৰ জৰিয়তে ভ্ৰমণ অধিক সুবিধাজনক আৰু সুৰক্ষিত হ’ব ।
-----------------
হিন্দুস্থান সমাচাৰ / অৰৱিন্দ
