নতুন দিল্লী, ০২ মাৰ্চ (হি.স.)। মধ্যপ্ৰাচ্যত শত্ৰুতা বৃদ্ধি পোৱাৰ পিছত খাৰুৱা তেলৰ মূল্য ৭%তকৈ অধিক বৃদ্ধি পাইছে। খাৰুৱা তেলৰ মূল্যৰ এই উত্থান হৈছে ইৰাণৰ ওপৰত আমেৰিকা-ইজৰাইলৰ সামৰিক বাহিনীয়ে আক্ৰমণ কৰাৰ পিছত।
সোমবাৰে বিশ্বৰ বজাৰত ব্ৰেণ্ট খাৰুৱা তেলৰ মূল্য ৭.৬০% বৃদ্ধি পাই ৭৮.৪১ ডলাৰ হোৱাৰ বিপৰীতে আমেৰিকাৰ পশ্চিম টেক্সাছ ইণ্টাৰমিডিয়েট (ডব্লিউ টি আই) খাৰুৱা তেলৰ মূল্য ৭.১৯% বৃদ্ধি পাই ৭১.৮৬ ডলাৰ হয়। ইফালে পেট্ৰলিয়াম ৰপ্তানিকাৰক দেশসমূহৰ আগশাৰীৰ সংস্থা অ’পেকে অহা মাহৰ পৰা খাৰুৱা তেলৰ উৎপাদন বৃদ্ধিৰ বাবে সন্মতি প্ৰকাশ কৰিছে। ছৌদি আৰব আৰু ৰাছিয়াৰ নেতৃত্বত মূল সদস্য দেশসমূহে প্ৰতিদিনে অতিৰিক্ত ২ লাখ ৬০ হাজাৰ বেৰেল উৎপাদন কৰিব।
বিশ্লেষকসকলে কয় যে মধ্যপ্ৰাচ্য বা পশ্চিম এছিয়াত বৃদ্ধি পোৱা ভূ-ৰাজনৈতিক উত্তেজনাৰ বাবেই বিশ্বৰ ভৱিষ্যত বজাৰত খাৰুৱা তেলৰ মূল্য বৃদ্ধি পাইছে। অঞ্চলটোত তেল যোগানত বাধাৰ সৃষ্টি হোৱাৰ আশংকাত ব্যৱসায়ীসকলে ক্ৰয় বৃদ্ধি কৰিছে। বাতৰি অনুসৰি যদিহে হৰমুজ জলদ্বীপত এই ব্যাঘাত অব্যাহত থাকে তেন্তে ব্ৰেণ্ট খাৰুৱা তেলৰ মূল্য প্ৰতি বেৰেলত ৯০ ডলাৰৰ ওপৰলৈ বৃদ্ধি পাব পাৰে। বহল আঞ্চলিক সংঘাতৰ সৃষ্টি হ’লে খাৰুৱা তেলৰ মূল্য আনকি প্ৰতি বেৰেলত ১০০ ডলাৰতকৈও অধিক হ’ব পাৰে।
মধ্যপ্ৰাচ্যত দীৰ্ঘদিনীয়া উত্তেজনাই পৰিবহণ আৰু সামুদ্ৰিক বীমাৰ খৰচ বৃদ্ধি কৰিব পাৰে। উপসাগৰীয় অঞ্চললৈ যোৱা সাগৰীয় পথসমূহ ব্যাঘাত জন্মাব পাৰে, যাৰ ফলত বাণিজ্যিক ভাৰসাম্যৰ ওপৰত অতিৰিক্ত হেঁচা পৰিব পাৰে।
हिन्दुस्थान समाचार / মনোজ কুমাৰ শইকীয়া
